ରସୁଲପୁର,୨୦ା୩(ଡି.ଏନ.ଏ.): ରସୁଲପୁର ବ୍ଲକ ଅନ୍ତର୍ଗତ ନଠୁଆବର ଓ ଶ୍ରୀବନ୍ତପୁର ପଞ୍ଚାୟତର ମଧ୍ୟବର୍ତ୍ତୀ ସ୍ଥଳ କ୍ଷୀର ନଦୀ ପୀଠରେ ମା’ ବିରଜା ବିଶ୍ୱରୂପା ନବକୁଣ୍ଡିୟ ବିଶ୍ୱକଲ୍ୟାଣ ମହାଯଜ୍ଞ ପାଇଁ ପ୍ରସ୍ତୁତି ଆରମ୍ଭ ହୋଇଛି। ମା’ ବିରଜାଙ୍କ ନିର୍ଦ୍ଦେଶକ୍ରମେ ଭୂମିପୂଜନ ଦିବସରୁ ଆଜ୍ଞାମାଳ ଅଣାଯାଇ କାର୍ଯ୍ୟ ଚାଲିଛି। ଏପ୍ରିଲ ୨ ରୁ ୬ ତାରିଖ ୫ଦିନ ବ୍ୟାପୀ ଅନୁଷ୍ଠିତ ହେବାକୁ ଥିବା ଏହି ମହାଯଜ୍ଞ ପାଇଁ ଯଜ୍ଞ ପଡ଼ିଆ ସଜେଇ ହୋଇଉଠିଛି। ନଠୁଆବର ଓ ଭଗୀରଥପୁର ଗାଁର ସୀମାନ୍ତବର୍ତ୍ତୀ ଅଞ୍ଚଳରେ ଅବସ୍ଥିତ ବିସ୍ତୀର୍ଣ୍ଣ ଖେଳ ପଡ଼ିଆରେ ମା’ ବିଶ୍ୱରୂପାଙ୍କ ମୃଣ୍ମୟୀ ମୂର୍ତ୍ତି ପାଇଁ ଛାଞ୍ଚ ବନ୍ଧା ଆରମ୍ଭ ହୋଇଛି। ମା’ ବିରଜାଙ୍କ ବାଲୁକା ମୂର୍ତ୍ତି ସ୍ଥାପନ ନେଇ ପ୍ରସ୍ତୁତି କରାଯାଉଛି। ଯଜ୍ଞସ୍ଥଳରେ ସାଧୁଗ୍ରାମ ସ୍ଥାପନ, ଅଖଣ୍ଡ ଅନ୍ନଯଜ୍ଞ, ମା’ ବିରଜାଙ୍କ ମାହାତ୍ମ୍ୟ, ଆଧ୍ୟାତ୍ମିକ ବାର୍ତ୍ତା ପ୍ରଚାର ପାଇଁ ଷ୍ଟଲ୍ ସ୍ଥାପନ, ଅତିଥିଙ୍କ ବିଶ୍ରାମ, ଅପେକ୍ଷା ହଲ, ଶ୍ରଦ୍ଧାଳୁଙ୍କ ସୁବିଧା ସକାଶେ ଯଜ୍ଞସ୍ଥଳରେ ଉଠା ଦୋକାନ, ସାମୂହିକ ଶୌଚାଳୟ, ଯଜ୍ଞ ସ୍ଥଳରୁ ନିର୍ଗତ ବର୍ଯ୍ୟବସ୍ତୁ ପରିଚାଳନାର ସୁବନ୍ଦୋବସ୍ତ, ଯଜ୍ଞସ୍ଥଳକୁ ଭକ୍ତଙ୍କ ପ୍ରବେଶ, ପ୍ରସ୍ଥାନ ବ୍ୟବସ୍ଥା, ମୋଟର ସାଇକେଲ, ଚାରିଚକିଆ ଯାନ ଓ ପରିବହନରେ ବ୍ୟବହୃତ ଗାଡ଼ିଗୁଡିକର ପାର୍କିଂ, ସୂଚନା ଓ ପରାମର୍ଶ କେନ୍ଦ୍ର, ଗଣମାଧ୍ୟମ ପ୍ରତିନିଧିଙ୍କ ଗ୍ୟାଲେରି, ପାନୀୟ ଜଳ ବ୍ୟବସ୍ଥା, ଅଗ୍ନିଶମ ବିଭାଗ ପକ୍ଷରୁ ଯଜ୍ଞସ୍ଥଳକୁ ସୁରକ୍ଷିତ ରଖିବା ବ୍ୟବସ୍ଥା, ସାଧୁସନ୍ଥମାନଙ୍କ ପ୍ରବଚନ ମଞ୍ଚ ଓ ସର୍ବୋପରି ବିଶାଳ ଯଜ୍ଞ ମଣ୍ଡପରେ ୯ କୁଣ୍ଡର ବ୍ୟବସ୍ଥାକୁ ନେଇ ପ୍ରାରମ୍ଭିକ ପର୍ଯ୍ୟାୟରେ ନିର୍ମାଣ କାର୍ଯ୍ୟ ଜାରି ରହିଛି। ଯାଜପୁର ଜିଲାର ୫୦ରୁ ଊର୍ଦ୍ଧ୍ୱ କାରିଗରଙ୍କ ଦ୍ୱାରା ବିଭିନ୍ନ ନିର୍ମାଣ କାର୍ଯ୍ୟ କରାଯାଉଛି। ଯଜ୍ଞ ପରିଚାଳନାରେ ନିୟୋଜିତ ଆଞ୍ଚଳିକ ଶ୍ରୀବିରଜା ବିଶ୍ୱାରୂପା ବିଶ୍ୱକଲ୍ୟାଣ ଯଜ୍ଞ କମିଟି ପକ୍ଷରୁ ନିର୍ମାଣ କାର୍ଯ୍ୟ ତଦାରଖ କରାଯାଉଛି ବୋଲି ଯଜ୍ଞର ମୁଖ୍ୟ ପୁରୋଧା ବିରଜା ପୁତ୍ର ପୂଜ୍ୟ ସ୍ବାମୀ ଉଦୟାନନ୍ଦ ପର୍ବତ ମହାରାଜ ସୂଚନା ଦେଇଛନ୍ତି। ଏହି ଯଜ୍ଞରେ ଶୁଦ୍ଧ ଦେଶୀ ଗାଈ ଘିଅରେ ୧୮୦୦୦ ଆହୁତି ପ୍ରଦାନ କରାଯିବ। ଏଥିସହିତ ଅନନ୍ତ ମୁଖି ଭାଗବତ ପାଠ, ଧର୍ମସଭା, ରାଷ୍ଟ୍ରୀୟ ସାଧୁସନ୍ଥ ସମ୍ମିଳନୀ ଭଳି ଅନେକ ଆଧ୍ୟାତ୍ମିକ କାର୍ଯ୍ୟକ୍ରମ ଆୟୋଜନ ହେବାକୁ ନେଇ ପ୍ରସ୍ତୁତି ଜାରି ରହିଛି।