ଭୁବନେଶ୍ୱର,୬।୧୧(ବ୍ୟୁରୋ):ନିମାପଡ଼ା ନିର୍ବାଚନମଣ୍ଡଳୀରୁ କଂଗ୍ରେସ ପ୍ରାର୍ଥୀ ହୋଇଥିବା ଦିଲୀପ ନାୟକ ଏବଂ ଦିଗପହଣ୍ଡି ନିର୍ବାଚନମଣ୍ଡଳୀର ବରିଷ୍ଠ ନେତା ଉତ୍ତମ ପାଣିଗ୍ରାହୀ ଆନୁଷ୍ଠାନିକ ଭାବେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଉପସ୍ଥିତିରେ ଭାଜପାରେ ସାମିଲ ହୋଇଛନ୍ତି। ଭାଜପା ରାଜ୍ୟ କାର୍ଯ୍ୟାଳୟଠାରେ ଶୁକ୍ରବାର ଅନୁଷ୍ଠିତ ମିଶ୍ରଣ ପର୍ବରେ ଦିଲୀପଙ୍କ ସମେତ ବାଦଲ ବେହେରା, ନବଘନ ବଳବନ୍ତରାୟ, କାହ୍ନୁଚରଣ ଦାଶ ପ୍ରମୁଖ ବହୁ ସମର୍ଥକ ଆନୁଷ୍ଠାନିକ ଭାବେ ଭାଜପାରେ ସାମିଲ ହୋଇଛନ୍ତି।
ସେହିପରି ଉତ୍ତମଙ୍କ ସହ ଦିଗପହଣ୍ଡି ଅଞ୍ଚଳର ପ୍ରତାପ ବିଶୋୟୀ, ଶୁଭେନ୍ଦୁ ପାଢ଼ୀ, ଖଲି ମହାପାତ୍ର, ମନୋଜ ପଣ୍ଡା, ରଘୁନାଥ ସାମନ୍ତରାୟ, ବଳରାମ ପ୍ରଧାନ, ଅନିଲ ମିଶ୍ର, ଶୁଭ୍ରାଂଶୁ ପ୍ରଧାନ, ଅରୁଣ ଗୌଡ଼, ଅରବିନ୍ଦ ବିଶୋୟୀ, ନରସିଂହ ପଣ୍ଡାଙ୍କ ସମେତ ଶତାଧିକ କାର୍ଯ୍ୟକର୍ତ୍ତା ଭାଜପାରେ ସାମିଲ ହୋଇଛନ୍ତି। ଆଇନ ବାଟରେ ଛିଡ଼ାହୋଇ ରାଜ୍ୟବାସୀଙ୍କୁ ନ୍ୟାୟ ଦେବାରେ ବାଧା ସୃଷ୍ଟି କରାଯାଉଛି। କଳବଳ ବ୍ୟବହାରକରି ଶାସକ ବିଜେଡି ଯେଉଁଭଳି ଭାବେ ସ୍ବେଚ୍ଛାଚାରୀ ଶାସନ ଜାରି ରଖିଛି, ତାକୁ ରାଜ୍ୟବାସୀ କେବେହେଲେ ବରଦାସ୍ତ କରିବେ ନାହିଁ। ଆଗାମୀ ଦିନରେ ନିଶ୍ଚିତ ଭାବେ ଦୃଢ ଜବାବ ଦେବେ ବୋଲି ରାଜ୍ୟ ସଭାପତି ସମୀର ମହାନ୍ତି ଏହି ଅବସରରେ କହିଛନ୍ତି।