ଭୁବନେଶ୍ୱର, ୧୨।୨(କ୍ରୀଡ଼ା ପ୍ରତିନିଧି)-ଅଲରାଉଣ୍ଡର ଦୀପକ ରଞ୍ଜନ ବେହେରା ପ୍ରଥମ ଶ୍ରେଣୀ କ୍ରିକେଟର ସମସ୍ତ ଫର୍ମାଟରୁ ଅବସର ଘୋଷଣା କରିଛନ୍ତି। ଗତ ୧୩ ବର୍ଷ ଧରି ସେ ଓଡ଼ିଶା ପକ୍ଷରୁ ପ୍ରତିନିଧିତ୍ୱ କରି ଆସିଥିଲେ। ୨୦୧୧ ନଭେମ୍ବର ୩ରୁ ୬ ପର୍ଯ୍ୟନ୍ତ କଟକରେ ଅନୁଷ୍ଠିତ ସୌରାଷ୍ଟ୍ର ବିପକ୍ଷ ମ୍ୟାଚରେ ସେ ରଣଜୀ ଟ୍ରଫିରେ ପଦାର୍ପଣ କରିଥିଲେ। କ୍ୟାରିୟରରେ ୪୫ଟି ପ୍ରଥମଶ୍ରେଣୀ ମ୍ୟାଚ ଖେଳିଥିବା ଦୀପକ ୬୯ଟି ଇନିଂସରେ ୧୦୭୯ ରନ ସଂଗ୍ରହ କରିବା ସହ ୧୦୨ଟି ଉଇକେଟ ନେଇଛନ୍ତି। ତାଙ୍କ ସର୍ବାଧିକ ସ୍କୋର ହେଉଛି ୬୭। ଗୋଟିଏ ଇନିଂସରେ ତାଙ୍କ ଶ୍ରେଷ୍ଠ ବୋଲିଂ ଫିଗର ହେଉଛି ୬/୩୭ ଏବଂ ମ୍ୟାଚରେ ୯/୬୪। ସେହିପରି ସେ ଲିଷ୍ଟ-ଏ ରେ ୪୭ଟି ମ୍ୟାଚ ଖେଳି ୩୧୮ ରନ, ୫୧ ଉଇକେଟ ଏବଂ ଟି୨୦ର ୩୯ଟି ମ୍ୟାଚରେ ୨୬୯ ରନ ଏବଂ ୩୮ ଉଇକେଟ ହାସଲ କରିଛନ୍ତି। ଲିଷ୍ଟ-ଏ’ରେ ତାଙ୍କ ଶ୍ରେଷ୍ଠ ବୋଲିଂ ସଫଳତା ହେଉଛି ୬/୨୨ ଏବଂ ଟି୨୦ରେ ୩/୨୩। ଓଡ଼ିଶା କ୍ରିକେଟ ଆସୋସିଏଶନ ସଭାପତି ପଙ୍କଜ ଲୋଚନ ମହାନ୍ତି ଏବଂ ସମ୍ପାଦକ ସଞ୍ଜୟ ବେହେରା ତାଙ୍କ ଭବିଷ୍ୟତ କାର୍ଯ୍ୟପନ୍ଥା ନେଇ ଶୁଭକାମନା ଜଣାଇଛନ୍ତି।