ମୁମ୍ବାଇ: ବଲିଉଡ୍ କୁଇନ୍ ଦୀପିକା ପାଦୁକୋନ ଏବେ ତାଙ୍କ କୋଷ୍ଟାରଙ୍କ ପାଇଁ ଆଗେଇ ଆସିଛନ୍ତି । ମୁଭି ‘ଛପାକ’ରେ ତାଙ୍କ ସହ ଅଭିନୟ କରିଥିବା ବାଲା ଏବେ ଜୀବନ ମୃତ୍ୟୁ ସହ ସଂଗ୍ରାମ କରୁଛନ୍ତି । ବାଲା ହେଉଛନ୍ତି ଜଣେ ଏସିଡ୍ ପୀଡ଼ିତା । ଦୀର୍ଘ ପ୍ରାୟ ୯ ବର୍ଷ ତଳେ ପାରିବାରିକ କଳହକୁ ନେଇ ବାଲା ଓ ତାଙ୍କ ଦାଦାଙ୍କ ଉପରେ ହୋଇଥିଲା ଏସିଡ୍ ମାଡ । ଏଥିରେ ତାଙ୍କ ଦାଦାଙ୍କ ମୃତ୍ୟୁ ହୋଇଥିବା ବେଳେ ବାଲା ୧୨ଟି ସର୍ଜରୀ ପରେ ବଞ୍ଚି ଯାଇଥିଲେ । ହେଲେ ଏତିକିରେ ସେ ହାରି ଯାଇ ନ ଥିଲେ । ନିଜ ଗୋଡରେ ନିଜେ ଠିଆ ହେବାକୁ ଚେଷ୍ଟା କରିଥିଲେ । ଏବେ ସେ ଆଗ୍ରାରେ ସିରୋଜ ହ୍ୟାଙ୍ଗଆଉଟ କାଫେରେ କାମ କରୁଥିଲେ । ହେଲେ ହଠାତ୍ ଅସୁସ୍ଥ ହୋଇ ପଡିବାରୁ ଏବେ ତାଙ୍କର କିଡନୀ ଖରାପ ହୋଇଥିବା ଜଣାପଡିଛି । ଏଥିପାଇଁ ସିରୋଜ ହ୍ୟାଙ୍ଗଆଉଟ କାଫେ ବାଲାଙ୍କ ପାଇଁ ଅନ୍ ଲାଇନ୍ କ୍ରାଉଡ ଫଣ୍ଡିଂ ଯୋଗାଡ କରୁଛି । ଏହା ଜାଣିବା ପରେ ବଲିଉଡ୍ ଅଭିନେତ୍ରୀ ଦୀପିକା ପାଦୁକୋନ ସାହାଯ୍ୟର ହାତ ବଢାଇଛନ୍ତି । ସେ ବାଲାଙ୍କ ଚିକିତ୍ସା ପାଇଁ ୧୫ ଲକ୍ଷ ଟଙ୍କା ଦାନ କରିଛନ୍ତି । ସୂଚନାଯୋଗ୍ୟ, ଏସିଡ ପୀଡିତା ଲକ୍ଷ୍ମୀଙ୍କ ଜୀବନ କାହାଣୀ ଉପରେ ଆଧାରିତ ଫିଲ୍ମ ‘ଛପାକ’ ଦୀପିକାଙ୍କ ଉପରେ ଖୁବ୍ ପ୍ରଭାବ ପକାଇଛି । ଏଥିରେ ସେ ମୁଖ୍ୟ କଳାକାର ଥିବା ବେଳେ ବାଲା ବି ଏଥିରେ ଦୀପିକାଙ୍କ ସହ କାମ କରିଛନ୍ତି । ଏହାସହ ସେ ଦ କପିଲ ଶର୍ମା ଶୋକୁ ବି ଆସି ସାରିଛନ୍ତି । ଏବେ ଦୀପିକା ବାଲାଙ୍କ ସୁସ୍ଥ ଜୀବନ କାମନା କରିଛନ୍ତି ।