ମୁମ୍ବାଇ: ୟଶରାଜ ଫିଲ୍ମର ସବୁଠାରୁ ଷ୍ଟାଇଲିଷ୍ଟ ଆକ୍ସନ ଫ୍ରଞ୍ଚାଇଜ୍ ‘ଧୁମ’ର ୪ ନମ୍ବର ମୁଭିକୁ ଦର୍ଶକେ ବେଶ୍ କିଛିଦିନ ହେବ ଅପେକ୍ଷା ରଖିଛନ୍ତି । ‘ଧୁମ୍ ୪’ କୁ ନେଇ ୨୦୨୦ରେ କେତେ କଥା ଶୁଣିବାକୁ ମିଳିଥିଲା । କେଉଁମାନେ ଏଥିରେ ଅଭିନୟ କରିବେ ତାହା ବି ଚର୍ଚ୍ଚା ହୋଇଥିଲା । ହେଲେ ଶେଷରେ ଏହାସବୁ ଭୁଲ ପ୍ରମାଣିତ ହୋଇଥିଲା । କାରଣ ଫିଲ୍ମ ମେକର୍ସ କୌଣସି ଗୋଟିଏ କଥାରେ ମୋହର ମାରି ନ ଥିଲେ । ଏବେ ‘ଧୁମ୍ ୪’କୁ ନେଇ ଆସିଥିବା ଏକ ଖବରରୁ ଜଣାପଡିଛି କି ଏଥର ଦର୍ଶକେ ଏଥିରେ ମେଲ୍ ଚୋର ନୁହେଁ ବରଂ ଜଣେ ଫିମେଲ ଚୋରକୁ ଦେଖିବାକୁ ପାଇବେ । ତେବେ ୟଶରାଜ ବ୍ୟାନର ଏଥର ବଲିଉଡ୍ ବିୟୁଟି ଦୀପିକା ପାଦୁକୋନଙ୍କୁ ଏଥିରେ ଜଣେ ଷ୍ଟାଇଲିସ୍ ଚୋରଣୀ ଭୂମିକାରେ ଉପସ୍ଥାପନ କରିବାକୁ ଯାଉଛି । ଏହାକୁ ନେଇ ଦୀପିକା ଓ ୟଶରାଜ ବ୍ୟାନର ମଧ୍ୟରେ କଥା ଚାଲିଥିବା ବେଳେ ଦୀପିକା ତାଙ୍କ କ୍ୟାଲେଣ୍ଡରରେ ଏଥିପାଇଁ ଡେଟ୍ ଫିଟ୍ କରିବାରେ ଲାଗିଛନ୍ତି । ଯଦି ସବୁକିଛି ଠିକ୍ ଥିବ ତେବେ ‘ଧୁମ୍ ୪’ ଚଳିତ ବର୍ଷ ଶେଷ ବେଳକୁ ତା’ର ଶୁଟିଂ ଆରମ୍ଭ କରିବ । ପୂର୍ବରୁ କିଛି ଆକ୍ସନ ସିନ୍ କରିଥିବା ଦୀପିକା କିନ୍ତୁ ଏଥିରେ ସମ୍ପୂର୍ଣ୍ଣ ଭାବେ ଏକ ଭିନ୍ନ ଚରିତ୍ରରେ ଦେଖାଦେବେ ବୋଳି କୁହାଯାଉଛି । ଯାହାକୁ ତାଙ୍କ ପ୍ରଶଂସକ ନିଶ୍ଚିତ ଭାବେ ପସନ୍ଦ କରିବେ ।