ପ୍ୟାରିସ,୨୯।୬(ପି.ଟି.): ଭାରତୀୟ ମହିଳା ତୀରନ୍ଦାଜ ଦୀପିକା କୁମାରୀ ପୁଣିଥରେ ବିଶ୍ୱ ର଼୍ୟାଙ୍କିଙ୍ଗ୍ର ୧ ନମ୍ବର ସ୍ଥାନକୁ ପ୍ରତ୍ୟାବର୍ତ୍ତନ କରିଛନ୍ତି। ଏଠାରେ ଚାଲିଥିବା ଓ୍ବାଲର୍ଡ କପ୍ ଷ୍ଟେଜ୍ ୩ରେ ସେ ୩ଟି ସ୍ବର୍ଣ୍ଣ ପଦକ ହାସଲ କରି ଏହି ସଫଳତା ଅର୍ଜନ କରିଛନ୍ତି। ୨୦୧୨ ପରେ ରାଞ୍ଚିର ଦୀପିକା ପ୍ରଥମଥର ପାଇଁ ର଼୍ୟାଙ୍କିଙ୍ଗ୍ରେ ଶୀର୍ଷସ୍ଥାନକୁ ଫେରିଛନ୍ତି। ରବିବାର ସେ ୩ଟି ରିକର୍ଭ ଇଭେଣ୍ଟ ଯଥା ମହିଳା ବ୍ୟକ୍ତିଗତ, ଟିମ୍ ଓ ମିକ୍ସ ପେୟାରରେ ସ୍ବର୍ଣ୍ଣ ପଦକ ହାସଲ କରି ଏକ ବିରଳ ସଫଳତା ଅର୍ଜନ କରିଛନ୍ତି। ଓ୍ବାଲର୍ଡ ଆର୍ଚେରୀ ଏ ନେଇ ଟୁଇଟ୍ କରି ସୂଚନା ଦେଇଛି।
ଦୀପିକା ପ୍ରଥମେ ଅଙ୍କିତା ଭକତ ଓ ମୋଲିକା ବାରିଙ୍କ ସହ ମିଳିତ ଭାବେ ମେକ୍ସିକୋକୁ ହରାଇ ମହିଳା ରିକର୍ଭ ଟିମ୍ ସ୍ବର୍ଣ୍ଣ ପଦକ ହାସଲ କରିଥିଲେ। ଏହାପରେ ସେ ସ୍ବାମୀ ଅତନୁ ଦାସଙ୍କ ସହ ମିଶି ୫-୩ରେ ପ୍ରତିପକ୍ଷ ନେଦରଲାଣ୍ଡ୍ସ ଦଳକୁ ହରାଇ ମିକ୍ସଡ ପେୟାରରେ ସ୍ବର୍ଣ୍ଣ ଜିତିଥିଲେ। ଏହାପରେ ସେ ୧୭ତମ ର଼୍ୟାଙ୍କର ରୁଷୀୟ ତୀରନ୍ଦାଜ ଏଲିନା ଓସିପୋଭାଙ୍କୁ ୬-୦ରେ ହରାଇ ସ୍ବର୍ଣ୍ଣ ଜିତିଥିଲେ ଓ ଚତୁର୍ଥ ବ୍ୟକ୍ତିଗତ ବିଶ୍ୱକପ୍ ସ୍ବର୍ଣ୍ଣ ପଦକ ହାସଲ କରିଥିଲେ। ମୋଟ ଉପରେ ଦୀପିକା ବିଶ୍ୱକପ୍ରେ ୯ ସ୍ବର୍ଣ୍ଣ, ୧୨ ରୌପ୍ୟ ଓ ୭ ବ୍ରୋଞ୍ଜ ପଦକ ହାସଲ କରିଛନ୍ତି। ପ୍ରଥମଥର ପାଇଁ ବିଶ୍ୱକପ୍ରେ ସବୁ ୩ଟି ସ୍ବର୍ଣ୍ଣ ଜିତିଥିତ୍ବାରୁ ବେଶ୍ ଆତ୍ମସନ୍ତୋଷ ଲାଭ କରିଛି ବୋଲି ଦୀପିକା କହିଛନ୍ତି। ଡୋଲା ବାନାର୍ଜୀଙ୍କ ପରେ ଦ୍ୱିତୀୟ ଭାରତୀୟ ମହିଳା ଭାବେ ଦୀପିକା ୧ ନମ୍ବର ସ୍ଥାନ ହାସଲ କରିଛନ୍ତି। ଆସନ୍ତାମାସରେ ଆରମ୍ଭ ହେବାକୁ ଯାଉଥିବା ଟୋକିଓ ଅଲିମ୍ପିକ୍ସରେ ସେ ଏକମାତ୍ର ଭାରତୀୟ ତୀରନ୍ଦାଜ ଭାବେ ଭାରତ ପାଇଁ ପ୍ରତିନିଧିତ୍ୱ କରିବେ।