ଲଣ୍ଡନ୍,୧୧ା୮(ପି.ଟି) : ବର୍ତ୍ତମାନ ଦେଶରେ ଫୁଟବଲ ପରିଚାଳନାର ଭାର କମିଟି ଅଫ୍ ଆଡମିନିଷ୍ଟ୍ରେଟର (ସିଓଏ) ଉପରେ ନ୍ୟସ୍ତ ରହିଛି। ତେବେ ଫୁଟବଲ କାର୍ଯ୍ୟ ପରିଚାଳନାରେ ବାଧା ସୃଷ୍ଟି କରୁଥିବା କାରଣରୁ ସର୍ବଭାରତୀୟ ଫୁଟବଲ ସଂଘ ସଭାପତି ପ୍ରଫୁଲ୍ଲ ପଟେଲଙ୍କ ନାମରେ ମାନହାନି ମକଦ୍ଦମା ଜାରି କରିଛି ସିଓଏ। ସୁପ୍ରିମକୋର୍ଟଙ୍କ ନିର୍ଦ୍ଦେଶ ଅନୁସାରେ ଜାତୀୟ ଫେଡେରେଶନ ନିର୍ବାଚନ ହେବାକୁ ଥିବା ବେଳେ ଏହି ପ୍ରକ୍ରିୟାରେ ପଟେଲ ବାଧା ସୃଷ୍ଟି କରୁଥିବା ସିଓଏ ପକ୍ଷରୁ କୁହାଯାଇଛି। ୩୫ ଜଣିଆ ପୂର୍ବତନ ସଦସ୍ୟମାନଙ୍କ ସହିତ ପଟେଲ ବୈଠକ କରିବା ସହ ନିର୍ବାଚନ ପ୍ରକ୍ରିୟାକୁ ପ୍ରଭାବିତ କରିବାକୁ ପ୍ରୟାସ କରୁଥିବା ମାନହାନି ମକଦ୍ଦମାରେ ଉଲ୍ଲେଖ ରହିଛି। ଅଗଷ୍ଟ ୮ ତାରିଖ ପୂର୍ବାହ୍ନ ୧୧ଟା ସମୟରେ ଜୁମ୍ କଲ୍ ମାଧ୍ୟମରେ ଏହି ବୈଠକ କରାଯାଇଥିଲା। ଏହି ବୈଠକରେ ହୋଇଥିବା ବାର୍ତ୍ତାଳାପକୁ ମାନହାନି ମକଦ୍ଦମାରେ ସଂଯୁକ୍ତ କରାଯାଇଥିବା ଜଣାପଡିଛି। ଏହା ସହିତ ଫୁଟବଲ୍ ସମ୍ବନ୍ଧୀୟ କୌଣସ ବି କାର୍ଯ୍ୟରେ ଯୋଗ ଦେବାରୁ ପଟେଲଙ୍କ ଉପରେ କଟକଣା ଲଗାଇବା ପାଇଁ ଆବେଦନ କରାଯାଇଛି। ଫିଫା ହେଉ କିମ୍ବା ଏଏଫ୍ସି ଏଥିରେ କୌଣସି ପ୍ରକାର ପଦରେ ପଟେଲଙ୍କୁ ନ ରଖିବା ପାଇଁ ଆବେଦନ କରାଯାଇଛି।
ସର୍ବୋଚ୍ଚ କୋର୍ଟ ଏହି ମାମଲାର ତଦନ୍ତ କରିବା ସହ ଦୋଷୀଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ପାଇଁ ଆବେଦନରେ କୁହାଯାଇଛି। ପ୍ରଫୁଲ୍ଲଙ୍କ ବ୍ୟତୀତ ଆଇଏଫ୍ଏ ଚେୟାରମ୍ୟାନ୍ ସୁବ୍ରତ ଦତ୍ତା, ଦିଲ୍ଲୀ ଫୁଟବଲ ମୁଖ୍ୟ ଶାଜି ପ୍ରଭାକରନ୍ ଏବଂ ଅନ୍ୟ ୫ ଜଣ ଏହି ବୈଠକରେ ଯୋଗ ଦେଇଥିଲେ। ଏହି ବୈଠକରେ ଯୋଗ ଦେଇଥିବା ଅନ୍ୟମାନଙ୍କ ନାମରେ ମଧ୍ୟ କୋର୍ଟ ଅବମାନନା ମାମଲା ରୁଜୁ କରିବାକୁ ସିଓଏ ପକ୍ଷରୁ କୁହାଯାଇଛି। ଫିଫା ୧୭ ବର୍ଷରୁ କମ୍ ବିଶ୍ୱକପ ପୂର୍ବରୁ ନିର୍ବାଚନ କରିବାକୁ କଡା ନିର୍ଦ୍ଦେଶ ରହିଥିବା ବେଳେ ପଟେଲ ଏହି ଅଧିକାରୀମାନଙ୍କ ସହିତ ମିଶି ଏହାକୁ ଭଣ୍ଡୁର କରିବାକୁ ପ୍ରୟାସ ଚାଳାଇଥିବା ଅଭିଯୋଗରେ କୁହାଯାଇଛି। ପଟେଲ ବର୍ତ୍ତମାନ ଫିଫା କାଉନସିଲର ସଦସ୍ୟ ରହିଥିବାରୁ ସହଜରେ ବିଭିନ୍ନ ରାଜ୍ୟ ମୁଖ୍ୟମାନଙ୍କୁ ପ୍ରଭାବିତ କରୁଛନ୍ତି। ପୂର୍ବରୁ ସମସ୍ତ ରାଜ୍ୟ ସଂଘଗୁଡିକ ନିର୍ବାଚନ ପାଇଁ ହଁ ଭରିଥିଲେ ହେଁ ବର୍ତ୍ତମାନ ନିଜ ପ୍ରତିଶ୍ରୁତିରୁ ପଛକୁ ହଟୁଛନ୍ତି। ପ୍ରଥମେ ନିର୍ବାଚିତ କମିଟିରେ ୩୬ ଜଣ ପୂର୍ବତନ ଖେଳାଳିଙ୍କୁ ସାମିଲ କରାଯିବା ନିଷ୍ପତ୍ତିକୁ ଫିଫା ପକ୍ଷରୁ ବିରୋଧ କରାଯାଇଥିଲା। ଏହି ବିରୋଧାଭାସ ପରେ ଅଗଷ୍ଟ ୩ ତାରିଖରେ କେନ୍ଦ୍ର କ୍ରୀଡା ମନ୍ତ୍ରଣାଳୟ ପକ୍ଷରୁ ଏହାକୁ ଆଳ କରି ନିର୍ବାଚନ ରୋକିବାକୁ ଦାବି କରାଯାଇଥିଲା। ଫିଫାରେ ଗୁରୁଦାୟିତ୍ୱରେ ରହିଥିବା ପଟେଲ ନିଜ କ୍ଷମତାର ଦୁରୁପଯୋଗ କରି ନିର୍ବାଚନକୁ ପ୍ରଭାବିତ କରିବାକୁ ପ୍ରୟାସ କରୁଥିବାରୁ ତାଙ୍କୁ ନିଲମ୍ବିତ କରିବା ପାଇଁ ଏହି ମାନହାନି ମକଦ୍ଦମାରେ ଉଲ୍ଲେଖ କରାଯାଇଛି।
