ନୂଆଦିଲ୍ଲୀ,୮।୧୨: ତାମିଲନାଡୁର କୁନୁରଠାରେ ବୁଧବାର ଘଟିଥିବା ଚପର ଦୁର୍ଘଟଣାରେ ପ୍ରାଣ ହରାଇଥିବା ୧୩ ଜଣଙ୍କ ମଧ୍ୟରେ ରହିଛନ୍ତି ଦେଶର ପ୍ରଥମ ଚିଫ୍ ଅଫ୍ ଡିଫେନ୍ସ ଷ୍ଟାଫ ଜେନେରାଲ ବିପିନ ରାଓ୍ବତ। ଦୁର୍ଘଟଣା ବେଳେ ଚପରରେ ଉପସ୍ଥିତ ଥିବା ତାଙ୍କ ପତ୍ନୀ ମଧୁଲିକା ରାଓ୍ବତଙ୍କ ମଧ୍ୟ ମୃତ୍ୟୁ ଘଟିଛି। ଜଣେ ଗୁରୁତରଙ୍କ ଚିକିତ୍ସା ଚାଲିଛି ବୋଲି ସନ୍ଧ୍ୟାରେ ସୂଚନା ଦେଇଛି ଭାରତୀୟ ବାୟୁ ସେନା (ଆଇଏଏଫ୍)।
“ଗଭୀର ଦୁଃଖ ସହ ଘୋଷଣା କରିବାକୁ ପଡ଼ୁଛି ଯେ, ଦୁର୍ଭାଗ୍ୟଜନକ ଦୁର୍ଘଟଣାରେ ଜେନେରାଲ ବିପିନ ରାଓ୍ବତ ଓ ତାଙ୍କ ପତ୍ନୀଙ୍କ ସହ ଅନ୍ୟ ୧୧ ଜଣଙ୍କ ମୃତ୍ୟୁ ହୋଇଛି” ବୋଲି ଆଇଏଏଫ୍ ପକ୍ଷରୁ ଟୁଇଟ୍ କରାଯାଇଛି।
କୋଏମ୍ବାଟୋର ଓ୍ବେଲିଂଟନସ୍ଥିତ ଡିଫେନ୍ସ ସର୍ଭିସ ଷ୍ଟାଫ କଲେଜ ଅଭିମୂଖେ ଏମ୍ଆଇ-୧୭ ଭି୫ ହେଲିକପ୍ଟର ସୁଲୁର ବାୟୁ ସେନା ବେସରୁ ଅପରାହ୍ନ ୧୧ଟା ୪୫ରେ ଉଡ଼ାଣ ଆରମ୍ଭ କରିବାର କିଛି ସମୟ ମଧ୍ୟରେ ହେଲିକପ୍ଟର ଦୁର୍ଘଟଣାଗ୍ରସ୍ତ ହୋଇଥିଲା। ଏ ନେଇ ଅପରାହ୍ନ ପ୍ରାୟ ୨ଟାରେ ସ୍ପଷ୍ଟ କରିବା ସହ ଦୁର୍ଘଟଣାର ତଦନ୍ତ ନିର୍ଦ୍ଦେଶ ଦେଇଥିଲା ଭାରତୀୟ ବାୟୁ ସେନା।
ଚିଫ୍ ଅଫ୍ ଡିଫେନ୍ସ ଷ୍ଟାଫଙ୍କ ମୃତ୍ୟୁ ନେଇ ଘୋଷଣା ପୂର୍ବରୁ ଦିଲ୍ଲୀସ୍ଥିତ ରାଓ୍ବତଙ୍କ ବାସଭବନକୁ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଓ ସେନା ମୁଖ୍ୟ ଏମ୍ ଏମ୍ ନରାବାଣେ ଯାଇଥିଲେ ବୋଲି ଜଣାପଡ଼ିଛି।
