କେନ୍ଦୁଝର,୨୫ା୫(ସ୍ବ.ପ୍ର.) ସମ୍ପ୍ରତି ଜଙ୍ଗଲକ୍ଷୟ ଏକ ମୁଖ୍ୟ ସମସ୍ୟା ହୋଇଛି। ଜଙ୍ଗଲକ୍ଷୟ ଯୋଗୁ ପରିବେଶ ନଷ୍ଟ ହେବା ସହ ଜଳବାୟୁରେ ପରିବର୍ତ୍ତନ ସମସ୍ତଙ୍କ ଚିନ୍ତା ବଢ଼ାଇଛି। ଏଭଳି ପରିସ୍ଥିତିରେ ଜଙ୍ଗଲ ସୁରକ୍ଷା ସହ ନୂତନ ଜଙ୍ଗଲ ସୃଷ୍ଟି ଉପରେ ଗୁରୁତ୍ୱ ଦିଆଯାଉଛି। ଏଥିପାଇଁ ବିଭିନ୍ନ ଯୋଜନାରେ କୋଟି କୋଟି ଟଙ୍କା ଖର୍ଚ୍ଚ କରି ନର୍ସରି ସ୍ଥାପନା କରାଯାଇ ଚାରା ସୃଷ୍ଟି କରାଯାଉଛି। ତେବେ କେନ୍ଦୁଝର ବନଖଣ୍ଡ ଭୂୟଁା ଜୁଆଙ୍ଗପୀଢ ରେଞ୍ଜ ଅଧୀନ କାଞ୍ଜିପାଣି ସେକ୍ସନ କାଞ୍ଜିପାଣି ବିଟ୍ ତଣ୍ଡିଯୋଡା ନର୍ସରୀରେ ଚାରା ସୃଷ୍ଟି ପାଇଁ ବହୁ ସଂଖ୍ୟାରେ ଶାଳ ଗଜା କାଟି ସେଡ୍ ନିର୍ମାଣ କରାଯାଇଥିବା ଅଭିଯୋଗ ହୋଇଛି।
ସେଡ୍ ନିର୍ମାଣ ପାଇଁ ବହୁ ଅର୍ଥ ଆସୁଥିଲେ ହେଁ ସେଥିରେ ବାଉଁଶ କିଣି ବ୍ୟବହାର କରା ନ ଯାଇ ପାଖ ଜଙ୍ଗଲରୁ ବ୍ୟାପକ ଶାଳ ଗଜା କାଟି ବ୍ୟବହାର କରାଯାଇଥିବା ଅଭିଯୋଗ ହୋଇଛି। କର୍ପୋରେଟ ସୋସିଆଲ ରେଶପନଶିବିଲିଟି (ସିଏସଆର) ସ୍କିମରେ ଏହି ନର୍ସରୀରେ ୧୧ ଲକ୍ଷ ୯୫ ହଜାର ଟଙ୍କା ବ୍ୟୟ ଅଟକଳରେ ୮୮ ହଜାର ଚାରା ସୃଷ୍ଟି କରାଯାଇଛି। ଏହି ଚାରାଗୁଡ଼ିକ ୧୮ ମାସ ପରେ ୨୦୨୩-୨୪ ଆର୍ଥିକ ବର୍ଷ ପାଇଁ ବନୀକରଣ କରାଯିବ। ତେବେ ନର୍ସରୀରେ ସୃଷ୍ଟି କରାଯାଇଥିବା ଚାରାକୁ ଛାଇ କରିବା ପାଇଁ ଉପର ଛାତରେ ଶହ ଶହ ସଂଖ୍ୟାରେ ଶାଳ ଗଛ କାଟି ବ୍ୟବହାର କରାଯାଇଥିବାରୁ ବ୍ୟାପକ ପରିମାଣର ଜଙ୍ଗଲ ନଷ୍ଟ ହୋଇଛି। ସାଧାରଣ ଲୋକ ଗଛ କାଟିଲେ ବନ ବିଭାଗ ପକ୍ଷରୁ କେସ କରି ଗିରଫ କରାଯାଉଥିବାବେଳେ ନର୍ସରୀ ପାଇଁ ଏଭଳି ବେଆଇନ ଗଛ କାଟିଥିବା ବନ କର୍ମଚାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି ହୋଇଛି। କେନ୍ଦୁଝର ବନଖଣ୍ଡ ଅଧିକାରୀ ଏଚ୍ଡି ଧନରାଜ ଏହାର ତଦନ୍ତ କରି ଶାଳ ଗଜା କାଟି ବ୍ୟବହାର କରିଥିବା ବନ କର୍ମଚାରୀଙ୍କ ବିରୋଧରେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ପରିବେଶବିତମାନେ ଦାବି କରିଛନ୍ତି। ଏସମ୍ପର୍କରେ ଡିଏଫ୍ଓ କହିଛନ୍ତି ଏଥିରେ ଶାଳ ଗଛ ବ୍ୟବହାର ହୋଇନାହିଁ। ଏହା ଏକ ଅନ୍ୟ ଜାତିର ଗଛ। ଏହି ଅନାବନା ଗଛ ଜଙ୍ଗଲ ଅଭିବୃଦ୍ଧି ପାଇଁ ସଫା କରାଯାଇଥାଏ।