ଅନୁଗୋଳ ସହର ଠାରୁ ମାତ୍ର ୧୦ କିଲୋମିଟର ଦୂରରେ ରହିଛି ଡେରଜାଙ୍ଗ ପ୍ରୋଜେକ୍ଟ। ଜଳଭଣ୍ଡାରର ନୀଳ ଜଳରାଶି ସାଙ୍ଗକୁ ପର୍ଯ୍ୟଟକଙ୍କୁ ଆକୃଷ୍ଟ କଲା ଭଳି ସମସ୍ତ ବ୍ୟବସ୍ଥା ଏଠାରେ ରହିଛି। ସୁନ୍ଦର ପାର୍କ ସହିତ ଆମୋଦ ପ୍ରମୋଦର ସୁବିଧା କରାଯାଇଛି। ଭୋଜିଭାତ ପାଇଁ ପିଣ୍ଡି ନିର୍ମାଣ ହୋଇଛି। ପାନୀୟ ଜଳ ସମସ୍ୟା ମଧ୍ୟ ଦୂର ହୋଇସାରିଛି। ଏହି ପ୍ରକଳ୍ପର ଅଧିକ ସୌନ୍ଦର୍ଯ୍ୟକରଣ ନିମନ୍ତେ ରାଜ୍ୟ ପର୍ଯ୍ୟଟନ ବିଭାଗ ପକ୍ଷରୁ ୧ କୋଟି ଟଙ୍କା ଖର୍ଚ୍ଚ ହୋଇଛି। ବିଶେଷକରି ଛୋଟ ପିଲାମାନଙ୍କ ଖେଳକୁଦ ପ୍ରତି ସ୍ବତନ୍ତ୍ର ଧ୍ୟାନ ଦିଆଯାଇଛି। ପାଦ ଚଲା ରାସ୍ତା ପାଇଁ ସ୍ବତନ୍ତ୍ର ଟ୍ରାକ୍ ସହ ଜଳଭଣ୍ଡାର ଶୋଭା ବସି ଦେଖିବା ନିମନ୍ତେ ଚେୟାର ବ୍ୟବସ୍ଥା କରାଯାଇଛି। ଭୋଜି ପାଇଁ ଆସୁଥିବା ପର୍ଯ୍ୟଟକଙ୍କ ସୁବିଧାକୁ ଦୃଷ୍ଟିରେ ରଖି ସମସ୍ତ ସହଯୋଗ ଯୋଗାଇ ଦିଆଯାଉଛି। ତଥାପି ଏହାର ଅଧିକ ଉନ୍ନତୀକରଣ ପାଇଁ ଜିଲା ପ୍ରଶାସନ, ପର୍ଯ୍ୟଟନ ବିଭାଗ ଓ ଜଳସେଚନ ବିଭାଗ ପକ୍ଷରୁ ସ୍ବତନ୍ତ୍ର ଯୋଜନା ପ୍ରସ୍ତୁତ ହୋଇଛି। ବିଶେଷକରି ପର୍ଯ୍ୟଟକମାନେ ଏଠାରେ କିପରି ଜଳ କ୍ରୀଡ଼ା କରିପାରିବେ ତାହା ଉପରେ ନଜର ଦିଆଯାଉଛି। ତେବେ ପ୍ରୋଜେକ୍ଟର କେତେକ ସ୍ଥାନରେ ଜଙ୍ଗଲ ଜମି ରହିଥିବାରୁ ଏହାକୁ ପରିବର୍ତ୍ତନ କରାଯିବା ପରେ ଯୋଜନାକୁ ବାସ୍ତବ ରୂପ ଦିଆଯିବର ଲକ୍ଷ୍ୟ ରଖାଯାଇଛି।