କେନ୍ଦୁଝର,୨୨।୩ (ସ୍ବ.ପ୍ର.): କେନ୍ଦୁଝର ଜିଲା ଦେଇ ଯାଇଥିବା ଜାତୀୟ ରାଜପଥ ୪୯ର ଜଗମୋହନପୁରଠାରେ ପ୍ରସ୍ତାବିତ ଓଭରବ୍ରିଜ (ଅଣ୍ଡରପାସ) ନିର୍ମାଣରେ ବିଳମ୍ବ ହେଉଛି। ଏହି ସ୍ଥାନରେ ହାତୀ ବର୍ଷର ସବୁ ସମୟରେ ଯାତାୟାତ କରୁଥିବାରୁ ପିୟୁପି ବା ପାସେଞ୍ଜର ଅଣ୍ଡରପାସ ନକରି ଏକ ବଡ଼ ବ୍ରଜ୍ କରିବାକୁ ବନବିଭାଗ ପ୍ରସ୍ତାବ ଦେଇଥିଲା। ହାତୀ ସୁରକ୍ଷା ସମନ୍ବୟ ବୈଠକରେ ନିଷ୍ପତ୍ତି ଅନୁଯାୟୀ ଏକ କିଲୋ ମିଟର ଦୀର୍ଘ ଓଭରବ୍ରିଜ ମଧ୍ୟରୁ ହାତୀମାନଙ୍କ ପାଇଁ ୫୩୨ ମିଟର ଲମ୍ବ ଯାତାୟାତ ପଥ ରଖିବାକୁ ଏନ୍ଏଚ୍ଏଆଇ ସହମତି ପ୍ରକାଶ କରିଥିଲା। ଇତିମଧ୍ୟରେ ଜାତୀୟ ରାଜପଥ ୪୯ କାମ ଶେଷ ହେବାର ୨ ବର୍ଷ ପରେ ମଧ୍ୟ ବ୍ରିଜ୍ ପାଇଁ ଟେଣ୍ଡର ହୋଇନାହିଁ। ବ୍ରିଜ୍ ହୋଇପାରୁ ନ ଥିବାରୁ ଲୋକଙ୍କ ଯାତାୟାତରେ ମଧ୍ୟ ସମସ୍ୟା ଦେଖାଦେବା ସହ ଧୂଳି ଉଡ଼ି ବାୟୁ ପ୍ରଦୂଷଣ ଜନିତ ସମସ୍ୟା ଦେଖାଦେଉଛି। ବନ ବିଭାଗ ଓ ଏନ୍ଏଚ୍ଏଆଇ ମଧ୍ୟରେ ସମନ୍ବୟ ବୈଠକରେ ଆଲୋଚନା ହେଉଥିଲେ ହେଁ କାର୍ଯ୍ୟକାରୀ ହେଉ ନ ଥିବାରୁ ଅସନ୍ତୋଷ ପ୍ରକାଶ ପାଉଛି। ହାତୀ ରାସ୍ତା ପାର ହେବାକୁ ଅସୁବିଧା ଭୋଗୁଛନ୍ତି ବୋଲି ସ୍ଥାନୀୟ ଲୋକେ ମତବ୍ୟକ୍ତ କରିଛନ୍ତି। ତୁରନ୍ତ ବ୍ରିଜ୍ ନିର୍ମାଣ ନ ହେଲେ ଆଗାମୀ ଦିନରେ ସ୍ଥାନୀୟ ଲୋକେ ଆନ୍ଦୋଳନ ଚେତାବନୀ ଦେଇଛନ୍ତି।