ଯାଜପୁର ରୋଡ,୯ା୯(ଡି.ଏନ.ଏ.): ଯାଜପୁରରୋଡ୍ ରେଳ ଷ୍ଟେଶନର ଉତ୍ତର ପଟେ ଓଭରବ୍ରିଜ ନିର୍ମାଣରେ ବିଳମ୍ବକୁ ନେଇ ଯାଜପୁରରୋଡ୍ ଷ୍ଟେଶନ ମ୍ୟାନେଜରଙ୍କ କାର୍ଯ୍ୟାଳୟରେ ଏକ ବୈଠକ ଅନୁଷ୍ଠିତ ହୋଇଯାଇଛି। ଯାଜପୁରରୋଡ ରେଳ ଷ୍ଟେଶନ ଗସ୍ତରେ ଆସିଥିବା ଡିଭିଜନର ଡିଆର୍ ୟୁସିସି ମେମ୍ବର ବିଜୟ କୁମାର ଧଳ, ରେଳବାଇ ଡେପୁଟି ଇଣ୍ଟେଲିଜେନ୍ସ ଅଫିସର୍ ପ୍ରଶାନ୍ତ କୁମାର ପରିଡ଼ା ଷ୍ଟେଶନ ମ୍ୟାନେଜର ସମୀର ରଞ୍ଜନ ସ୍ବାଇଁଙ୍କ ଉପସ୍ଥିତିରେ ସମସ୍ତ ଦାବି ପୂରଣ ପାଇଁ ପ୍ରତିଶ୍ରୁତି ଦେଇଥିଲେ। ହେଲେ ଓଭର ବ୍ରିଜ କାମ କାହିଁକି ଆଜିଯାଏ ଆରମ୍ଭ ହେଇନାହିଁ ସେ ସଂକ୍ରାନ୍ତରେ ଆଲୋଚନା କରାଯାଇଥିଲା। ଏଥିସହିତ ଯାଜପୁରରୋଡକୁ ଡିଭିଜନ ଘୋଷଣା ସମେତ ୫ ଦଫା ଦାବି ନେଇ ଏକ ସ୍ମାରକପତ୍ର ଡିଆରୟୁସିସି ମେମ୍ବର ଧଳଙ୍କୁ ଦିଆଯାଇଛି। ଏ ସମସ୍ତ ଦାବିକୁ ନେଇ ଅକ୍ଟୋବର ୧୯ରେ ଖୋର୍ଦ୍ଧା ଡିଆରୟୁସିସି ବୈଠକରେ ଡିଆର୍ଏମଙ୍କୁ ପ୍ରଦାନ କରାଯାଇ ବିହୀତ ପଦକ୍ଷେପ ଗ୍ରହଣ କରାଯିବ ବୋଲି ଧଳ ପ୍ରତିଶ୍ରୁତି ଦେଇଛନ୍ତି। ଏଥି ସହିତ ସେଦିନ ମିଳିତ ମଞ୍ଚର ଏକ ପ୍ରତିନିଧି ଦଳ ଖୋର୍ଦ୍ଧା ବୈଠକକୁ ଯାଇ ଦାବିପତ୍ର ପ୍ରଦାନ କରିବାକୁ ନିଷ୍ପତ୍ତି ହୋଇଛି। ଏ ସବୁ ଦାବି ତୁରନ୍ତ ପୂରଣ ନ ହେଲେ ସହରବାସୀ ଏକଜୁଟ ହୋଇ ଜନଆନ୍ଦୋଳନ କରିବେବୋଲି ଚେତାବନୀ ଦିଆଯାଇଛି। ବୈଠକରେ ମିଳିତ ମଞ୍ଚ ଆବାହକ ଆଇନଜୀବୀ ଚନ୍ଦ୍ରଶେଖର ପଣ୍ଡା, ରେଳବାଇ ଷ୍ଟେଶନ ପରାମର୍ଶଦାତା କମିଟି ସଦସ୍ୟ ଚିନ୍ତାମଣି ପାଢ଼ୀ, ସଦାଶିବ ଦାସ, ଡ. ଦୁଷ୍ମନ୍ତ କୁମାର ନାୟକ ପ୍ରମୁଖ ଅଂଶଗ୍ରହଣ କରି ଷ୍ଟେଶନର ବିବିଧ ସମସ୍ୟା ଉପରେ ଆଲୋକପାତ କରିଥିଲେ।