ହରିୟାଣାରେ ଆଇପିଏସ୍ ଅଧିକାରୀଙ୍କ ପଦୋନ୍ନତିରେ ଦେଖାଦେଇଥିବା ଅସମାନତା ସେମାନଙ୍କ କ୍ୟାରିୟର ଉପରେ ଖରାପ ପ୍ରଭାବ ପକାଇଛି। ଏହା ମଧ୍ୟ ବିଭିନ୍ନ ର଼୍ୟାଙ୍କ ମଧ୍ୟରେ ଚିନ୍ତାର ବିଷୟ ପାଲଟିଛି। ନିକଟରେ ପୋଲିସ ମହାନିରୀକ୍ଷକ (ଆଇଜିପି) ର଼୍ୟାଙ୍କ୍ର ୧୯୯୭ ବ୍ୟାଚ୍ର ୨ ଜଣ ଅଧିକାରୀ ଅମିତାଭ ଧିଲନ ଏବଂ ସଞ୍ଜୟ କୁମାରଙ୍କ ପିଟିଶନ ରାଜ୍ୟ ପୋଲିସ ସେବା ମଧ୍ୟରେ ବଢୁଥିବା ନୈରାଶ୍ୟକୁ ଦର୍ଶାଇଛି। ସୂତ୍ରରୁ ଜଣାପଡ଼ିଛି, ଧିଲନ ଏବଂ କୁମାର ପୋଲିସ ମହାନିର୍ଦ୍ଦେଶକ (ଡିଜିପି) ପି.କେ. ଅଗ୍ରୱାଲଙ୍କୁ ଦର୍ଶାଇଛନ୍ତି ଯେ,ଅନ୍ୟ ରାଜ୍ୟରେ ଥିବା ପ୍ରତିପକ୍ଷଙ୍କ ତୁଳନାରେ ହରିୟାଣା କ୍ୟାଡର ମଧ୍ୟରେ ପଦୋନ୍ନତି ପ୍ରକ୍ରିୟା ମନ୍ଥର ରହିଛି। ଆଶ୍ଚର୍ଯ୍ୟର କଥା ହେଉଛି, ଅତିରିକ୍ତ ପୋଲିସ ମହାନିର୍ଦ୍ଦେଶକ (ଏଡିଜିପି) ପଦବୀକୁ ପଦୋନ୍ନତି ପାଇଁ ସୁପାରିସ ସତ୍ତ୍ୱେ ବିଭାଗୀୟ ପଦୋନ୍ନତି କମିଟିର ବୈଠକ ଏ ଯାବତ ହୋଇପାରିନାହିଁ। ଏହି ୨ଜଣ ଅଧିକାରୀ ଗତ ବର୍ଷରୁ ଏଡିଜିପି ପଦୋନ୍ନତି ପାଇଁ ଯୋଗ୍ୟ ହୋଇଥିଲେ। ତେବେ ସେମାନଠାରୁ କନିଷ୍ଠ ୧୯୯୮ ବ୍ୟାଚ୍ର ଆଇପିଏସ୍ ଅଧିକାରୀ ଅନ୍ୟ ରାଜ୍ୟରେ ପଦୋନ୍ନତି ପାଇଥିବାରୁ ଏଭଳି ଅସଙ୍ଗତି ବଢ଼ିଛି। ଚୟନ ଗ୍ରେଡ୍ ଏବଂ ତଦୂର୍ଦ୍ଧ୍ୱରେ ପଦୋନ୍ନତି ପାଇଁ କେନ୍ଦ୍ର ସରକାରଙ୍କ ସ୍ବୀକୃତି ଆବଶ୍ୟକ କରୁଥିବା ନିୟମ ଥିବା ସତ୍ତ୍ୱେ ଏହି ବ୍ୟବସ୍ଥା କାର୍ଯ୍ୟକାରୀ ହୋଇନାହିଁ, ଯାହାଫଳରେ ପଦୋନ୍ନତିରେ ଅବାଞ୍ଛିତ ବିଳମ୍ବ ଘଟୁଛି। ପ୍ରଶାସନିକ ବିଳମ୍ବ ଦ୍ୱାରା ସେମାନଙ୍କ କ୍ୟାରିୟରରେ ପ୍ରତିକୂଳ ପ୍ରଭାବ ପଡ଼ିବା ଉଚିତ ନୁହେଁ ବୋଲି ଧିଲନ ଏବଂ କୁମାର ଯୁକ୍ତି ବାଢିଛନ୍ତି। ଏଠାରେ ମନେ ରଖିବା ଉଚିତ ଯେ, ନିୟମ ଏବଂ ନିୟମାବଳୀ ଅମଲାତନ୍ତ୍ରକୁ ମାର୍ଗଦର୍ଶନ କରୁଥିବାବେଳେ ସେଗୁଡ଼ିକର ପ୍ରଭାବଶାଳୀ କାର୍ଯ୍ୟକାରିତା ଏବଂ ବ୍ୟାଖ୍ୟା ଅଧିକାରୀଙ୍କ କ୍ୟାରିୟର ଗଢ଼ିବା ପାଇଁ ବି ସମାନ ଭାବେ ଗୁରୁତ୍ୱପୂର୍ଣ୍ଣ।
ଏକ ମହତ୍ତ୍ୱପୂର୍ଣ୍ଣ ଘଟଣାକ୍ରମରେ ନିକଟରେ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ନୋଏଡା ଅଥରିଟିର ସିଇଓ ରିତୁ ମାହେଶ୍ୱରୀଙ୍କୁ ଆଗ୍ରା କମିଶନର ଭାବେ ବଦଳି କରିଥିଲେ। ନୋଏଡାରେ ୪ ବର୍ଷ କାର୍ଯ୍ୟକାଳ ମଧ୍ୟରେ ମହେଶ୍ୱରୀ ତାଙ୍କର ପରିବର୍ତ୍ତନକାରୀ ପଦକ୍ଷେପ ପାଇଁ ବେଶ୍ ଜଣାଶୁଣା। ତାଙ୍କର ପ୍ରଭାବକୁ ଅସ୍ବୀକାର କରାଯାଇପାରିବ ନାହିଁ। ସେ ୟୁପି ଗ୍ଲୋବାଲ ଇନ୍ଭେଷ୍ଟର୍ସ ସମ୍ମିଳନୀ ୨୦୨୩ ପୂର୍ବରୁ ନୋଏଡା ପାଇଁ ୧ଲକ୍ଷ କୋଟି ଟଙ୍କାର ପୁଞ୍ଜି ବିନିଯୋଗ ପ୍ରସ୍ତାବ ନିଶ୍ଚିତ କରିବା ସହ ୨୦୨୨-୨୩ ଆର୍ଥିକ ବର୍ଷରେ ୭,୦୦୦ କୋଟି ଟଙ୍କାର ରେକର୍ଡ ପରିମାଣ ରାଜସ୍ବ ସଂଗ୍ରହ କରିଛନ୍ତି, ଯାହା ବିଗତ ୧୨ ବର୍ଷରେ ସବୁଠୁ ଅଧିକ। ମାହେଶ୍ୱରୀ ପ୍ରକାଶ କରିଛନ୍ତି, ୫୫,୦୦୦ କୋଟି ଟଙ୍କା ମୂଲ୍ୟର ନିବେଶ ପ୍ରସ୍ତାବ ବିଚାରାଧୀନ ଅଛି ଏବଂ ଆସନ୍ତା ମାସେ ଭିତରେ ଏହା କାର୍ଯ୍ୟକାରୀ ହେବ ବୋଲି ଆଶା କରାଯାଉଛି। ତାଙ୍କ ବଦଳିକୁ ନେଇ ନୋଏଡା ବାସିନ୍ଦା ଏବଂ ବ୍ୟବସାୟୀଙ୍କ ମିଶ୍ରିତ ପ୍ରତିକ୍ରିୟା ପ୍ରକାଶ ପାଇଛି। ମୁଖ୍ୟ ପଦବୀରୁ ହଠାତ୍ ବିଦାୟ ନେବାରେ କେତେକେ ଚିନ୍ତା ପ୍ରକଟ କରିଛନ୍ତି। ଏହା ଏକ ନିୟମିତ ବଦଳି ବୋଲି ଯୋଗୀ ସରକାର କହିଛନ୍ତି। ଅନ୍ୟପକ୍ଷରେ ସୂତ୍ରରୁ ପ୍ରକାଶ ଯେ, ନୋଏଡା ଅଥରିଟି ଆକାଉଣ୍ଟରୁ ନକଲି ଦଲିଲ ବଳରେ ଜାଲିଆତି କରି ଜଣେ ଠକ ୩.୯ କୋଟି ଟଙ୍କା ଟ୍ରାନ୍ସଫର କରିବାର ୨ ସପ୍ତାହ ପରେ ଏହି ପଦକ୍ଷେପ ନିଆଯାଇଛି। ଯଦିଓ ଏହି ଘଟଣା ସହ ମାହେଶ୍ୱରୀଙ୍କ ବଦଳିର ଏକ ସଂଯୋଗ ଅଛି କି ନାହିଁ ତାହା କହିବା କଷ୍ଟକର। ମାହେଶ୍ୱରୀ କେନ୍ଦ୍ର ଗୃହମନ୍ତ୍ରୀ ଅମିତ ଶାହାଙ୍କ ନିକଟତର ବୋଲି ଜଣାପଡ଼ିଛି। ତେବେ ଏହି ସମ୍ପର୍କ ନିଶ୍ଚିତ ନ ହେଲେ ବି ରାଜନୈତିକ ଏବଂ ବାବୁ ପରିସରକୁ ଦ୍ୱନ୍ଦ୍ୱରେ ପକାଇଛି ଏବଂ କେନ୍ଦ୍ର ଓ ୟୁପି ସରକାର ମଧ୍ୟରେ ଅନେକ ସମୀକରଣକୁ ଏପାଖସେପାଖ କରିପାରେ ବୋଲି କୁହାଯାଉଛି।
ଏକ ଅଣପାରମ୍ପରିକ ନିର୍ଦ୍ଦେଶନାମା ଅନୁଯାୟୀ ପଞ୍ଜାବର ରାଜ୍ୟପାଳ ବଓ୍ବଁରିଲାଲ ପୁରୋହିତ ଶାସନ ପାଇଁ ଏକ ନିଆରା ଧାରା ସୃଷ୍ଟି କରୁଥିବା ଜଣାପଡ଼ିଛି। ଖାଦ୍ୟ ମୂଲ୍ୟ ମୁଦ୍ରାସ୍ଫୀତିର ସମ୍ମୁଖୀନ ହୋଇଥିବା ନାଗରିକଙ୍କ ସହ ରହିଛନ୍ତି ବୋଲି ଦର୍ଶାଇ ସେ ରାଜ ଭବନ ରୋଷେଇଘରେ ଟମାଟୋକୁ ସାମୟିକ ଭାବେ ନିଷିଦ୍ଧ କରିବା ଖବରର ଶିରୋନାମା ପାଲଟିଥିଲା। ଏହାର କିଛିଦିନ ପରେ ପୁରୋହିତ ଏବେ ଚଣ୍ଡିଗଡ଼ ପ୍ରଶାସନିକ ଅଧିକାରୀଙ୍କୁ ସରକାରୀ କାମରେ ଦିଲ୍ଲୀକୁ ବିମାନ ଯାତ୍ରା କରିବା ଏବଂ ପାଞ୍ଚତାରକା ହୋଟେଲରେ ରହିବାକୁ ବାରଣକରି ଏକ ସାହସିକ ପଦକ୍ଷେପ ନେଇଛନ୍ତି। ବିମାନ ଯାତ୍ରା ଉପରେ ନିଷେଧାଦେଶ ଏବଂ ଶତାବ୍ଦୀ ଓ ବନ୍ଦେ ଭାରତ ଟ୍ରେନ୍ ଯିବା ବାଧ୍ୟତାମୂଳକ କରିବାର ଆଦେଶ ସରକାରୀ ଖର୍ଚ୍ଚରେ ମିତବ୍ୟୟିତାର ବାର୍ତ୍ତା ଦେଇଛି। ଏଭଳି ଆର୍ଥିକ ସଂଯମ କେନ୍ଦ୍ର ଶାସିତ ଅଞ୍ଚଳ(ୟୁଟି)ର ରାଜନୈତିକ ଏବଂ ବାବୁ ପରିସରକୁ ଚକିତ କରିଛି। ପୁରୋହିତଙ୍କ ଏହି ଅଜବ ନିର୍ଦ୍ଦେଶ ତାଙ୍କ ଟମାଟୋ ନିଷେଧ ସଦୃଶ, ଯାହା ସାଙ୍କେତିକ ଭାବରେ ନାଗରିକଙ୍କ ଚିନ୍ତାଧାରା ସହ ସମାନ ଥିଲା । ତେବେ ଏହିସବୁ ପଦକ୍ଷେପର ବ୍ୟବହାରିକ ବିଷୟକୁ ନେଇ କିଛି ଉତ୍ସୁକତା ପ୍ରକାଶ ପାଇଥିଲା। ଆହୁରି ମଧ୍ୟ, ଯେଉଁ ସମୟରେ ପୁରୋହିତ ନିଷ୍ପତ୍ତି ନେଲେ ତାହା ପଞ୍ଜାବ ମୁଖ୍ୟମନ୍ତ୍ରୀ ଭଗଓ୍ବନ୍ତ ମାନ୍ଙ୍କ ସହ ଥିବା ତାଙ୍କର ବିବାଦର ଇତିହାସ ଜଟିଳତାରେ ଆଉ ଏକ ଫର୍ଦ୍ଦ ଯୋଡ଼ିଲା। ରାଜ୍ୟପାଳଙ୍କ ବ୍ୟୟବହୁଳ ଜୀବନଶୈଳୀ ଉପରେ ମାନ୍ ବାରମ୍ବାର ଅଭିଯୋଗ ଉଠାଇଛନ୍ତି । ରାଜ୍ୟର ବିମାନ ବ୍ୟବହାର କରିବାରେ ତାଙ୍କର ରେକର୍ଡ ଅଛି ଏବଂ ତାହା ମିତବ୍ୟୟ ଉପରେ ତାଙ୍କ ନିର୍ଦ୍ଦେଶକୁ ରାଜନୈତିକ ରଙ୍ଗ ଦେଇଛି।