ନୂଆଦିଲ୍ଲୀ,୧୭।୧ : ଦେଶର ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳରେ ହିନ୍ଦୁଙ୍କୁ ସଂଖ୍ୟାଲଘୁ ମାନ୍ୟତା ପ୍ରଦାନ ନେଇ ସରକାରଙ୍କ ପକ୍ଷରୁ ରିପୋର୍ଟ ଦାଖଲରେ ବିଳମ୍ବ ହେବାରୁ ସୁପ୍ରିମ୍କୋର୍ଟ ଅସନ୍ତୋଷ ପ୍ରକାଶ କରିଛନ୍ତି। ଶୀର୍ଷ କୋର୍ଟ କହିଛନ୍ତି ଯଦି ସମ୍ପୃକ୍ତ ରାଜ୍ୟ ଏବଂ କେନ୍ଦ୍ର ଶାସିତ ଅଞ୍ଚଳ ଧାର୍ଯ୍ୟ ସମୟ ମଧ୍ୟରେ ଜବାଦ ଦାଖଲ ନ କରନ୍ତି ତେବେ ଗ୍ରହଣ କରାଯିବ ଯେ ସେମାନଙ୍କ ପାଖରେ କହିବାକୁ କିଛି ନାହିଁ।
ଜମ୍ମୁ-କଶ୍ମୀର ଏବଂ ଲାକ୍ଷାଦ୍ୱୀପ ପକ୍ଷରୁ କୌଣସି ଜବାବ ଦାଖଲ କରା ନ ଯିବା ନେଇ କୋର୍ଟ ପ୍ରଶ୍ନ କରିଛନ୍ତି ସେମାନେ କେନ୍ଦ୍ର ଦ୍ୱାରା ଶାସିତ ତଥାପି କାହିଁକି ରିପୋର୍ଟ ଦାଖଲ କ୍ଷେତ୍ରରେ ଅବହେଳା ପ୍ରଦର୍ଶନ କରାଯାଉଛି। ଏହାର ପରବର୍ତ୍ତୀ ଶୁଣାଣି ମାର୍ଚ୍ଚ ୨୧ରେ କରାଯିବ ବୋଲି ବିଚାରପତି ସଞ୍ଜୟ କିଶନ କୌଲଙ୍କ ନେତୃତ୍ୱରେ ଗଠିତ ଖଣ୍ଡପୀଠ ସୂଚିତ କରିଛନ୍ତି।
ସୋଲିସିଟର ଜେନେରୋଲ ଭେଙ୍କଟରମଣି କହିଛନ୍ତି ଯେ ୬ ରାଜ୍ୟ ଆବଶ୍ୟକ ତଥ୍ୟ ପ୍ରଦାନ କରି ନାହାନ୍ତି। କାହିଁକି ଏଭଳି କରାଯାଇଛି ସେ ନେଇ ଆମେ ଚିନ୍ତିତ। ୬ ରାଜ୍ୟ ଏବଂ ୨ କେନ୍ଦ୍ର ଶାସିତ ଅଞ୍ଚଳ ଏଥିରେ ବିଫଳ ରହିଥିବା ସେ କହିଛନ୍ତି।