ସମ୍ବଲପୁର,୩୧ା୧୧(ବ୍ୟୁରୋ): ଦୀର୍ଘ ୫ବର୍ଷ ମିଆଦି ସରିବା ପରେ ପୁଣି ପ୍ରଧାନମନ୍ତ୍ରୀ ଆବାସ ଯୋଜନା ସମ୍ଭାବ୍ୟ ତାଲିକା ପ୍ରକାଶ ପାଇଥିଲା। ହେଲେ ଏଥିରେ ଜିଲାର ପ୍ରାୟ ୨ହଜାର ଅଯୋଗ୍ୟ ହିତଧିକାରୀଙ୍କ ନାମ ରହିଥିବା ଅଭିଯୋଗ ହୋଇଥିଲା। ଯାଞ୍ଚ ପାଇଁ ଗଠନ ହୋଇଥିବା ଟିମ୍ ଓ ଗ୍ରାମସଭାରେ ଅନୁମୋଦନ ହୋଇପାରି ନ ଥିବାରୁ ଜିଲାରେ ଚୂଡାନ୍ତ ତାଲିକା ପ୍ରକାଶ ପାଇ ପାରୁନାହିଁ। ନିୟମ ଅନୁସାରେ ଗ୍ରାମସଭାରେ ଅନୁମୋଦନ ହୋଇପାରୁ ନ ଥିବାରୁ ଏଭଳି ସମସ୍ୟା ଦେଖାଦେଇଛି। ଗ୍ରାମସଭା ପାଇଁ ଗତ ୨୬ତାରିଖ ଧାର୍ଯ୍ୟ କରାଯାଇଥିଲା। ହେଲେ ଜିଲାର ୯ ବ୍ଲକର ୧୩୮ ପଞ୍ଚାୟତରୁ ମାତ୍ର ୯୨ ପଞ୍ଚାୟତରେ ଗ୍ରାମସଭା ହୋଇଥିବା ବେଳେ ବାକି ପଞ୍ଚାୟତରେ ହୋଇପାରି ନ ଥିଲା। ପୁଣି ସୋମବାର ଦିନ ଧାର୍ଯ୍ୟ ହୋଇଥିଲେ ମଧ୍ୟ ଅନେକ ପଞ୍ଚାୟତରେ ଗ୍ରାମସଭା ହୋଇପାରି ନ ଥିଲା। ସ୍ବାସ୍ଥ୍ୟମନ୍ତ୍ର ନବ କିଶୋର ଦାସଙ୍କ ମୃତ୍ୟୁକୁ ନେଇ ଶୋକ ଘୋଷଣା ଅନ୍ୟ ଏକ କାରଣ କୁହାଯାଉଛି। ସେହିପରି ପଞ୍ଚାୟତରେ ସ୍ଥାନୀୟ ଜନ ପ୍ରତିନିଧିଙ୍କ ମଧ୍ୟରେ ମତଭେଦ, ରାଜନୈତିକ ବ୍ୟକ୍ତିବିଶେଷଙ୍କ ହସ୍ତକ୍ଷେପକୁ ମଧ୍ୟ ଦାୟୀ କରାଯାଉଛି। ଅନ୍ୟପଟେ ଟଙ୍କା ଦେଲେ ଘର ପାସ୍ କରାଯିବ ନ ହେଲେ ତାଲିକାରୁ ଅଯୋଗ୍ୟ ଦର୍ଶାଇ କାଟି ଦିଆଯିବ ବୋଲି ସମ୍ଭାବ୍ୟ ତାଲିକାରେ ଥିବା ହିତାଧିକାରୀଙ୍କୁ ସ୍ଥାନୀୟ ନେତା, ପଞ୍ଚାୟତ ସ୍ତରର ଅଧିକାରୀ, ଜନପ୍ରତିିନିଧି କହୁଥିବା ଅଭିଯୋଗ ହେଉଛି। ତାଲିକାରେ ଥିବା ହିତାଧିକାରୀ କାଳେ ତାଲିକାରୁ ବାଦ୍ ପଡିଯିବେ ସେ ନେଇ ସର୍ବସମ୍ମୁଖରେ ମୁହଁ ଖୋଲୁନାହାନ୍ତି। ହେଲେ ବାଦ୍ ପଡିଲେ ସମସ୍ତଙ୍କ ମୁଖା ଖୋଲିଦେବେ ବୋଲି ସେମାନେ କହୁଛନ୍ତି। ତେଣୁ ଚୂଡାନ୍ତ ତାଲିକା ପ୍ରକାଶ ପାଇବାରେ ବିଳମ୍ବ ହୋଇପାରେ ବୋଲି ଆଶଙ୍କା କରାଯାଉଛି। ଏ ସମ୍ପର୍କରେ ଜିଲାପରିଷଦ ମୁଖ୍ୟ ନିର୍ବାହୀ ଅଧିକାରୀ ଦିଲୀପ କୁମାର ବଳଙ୍କୁ ପଚାରିବାରୁ ସେ କହିଥିଲେ, ହୋଇଥିବା ଅଭିଯୋଗ ଉପରେ ଯାଞ୍ଚ କରାଯାଉଛି। ସମ୍ପୂର୍ଣ୍ଣ ହୋଇପାରି ନାହିଁ। ଏହାଛଡା ନିୟମ ଅନୁସାରେ ଅଧିକାଂଶ ପଞ୍ଚାୟତରେ ଗ୍ରାମ ସଭାରେ ଅନୁମୋଦନ ହୋଇ ପାରି ନାହିଁ। ତେଣୁ ସୋମବାର ସମୟ ଦିଆଯାଇଥିଲା। ତାହାର ମଧ୍ୟ ଚୂଡାନ୍ତ ରିପୋର୍ଟ ହସ୍ତଗତ ହୋଇନାହିଁ। ଶୀଘ୍ର ଚୂଡାନ୍ତ ତାଲିକା ପ୍ରକାଶ କରାଯିବ। କୌଣସି ଯୋଗ୍ୟ ହିତାଧିକାରୀ ବାଦ୍ ପଡିବେ ନାହିଁ। କୌଣସି ଲୋକଙ୍କ କଥାରେ ପଡନ୍ତୁ ନାହିଁ ବୋଲି କହିଥିଲେ। ସୂଚନାଯୋଗ୍ୟ, ବିଭିନ୍ନ ବ୍ଲକରେ ସମ୍ଭାବ୍ୟ ତାଲିକାରେ ଅଯୋଗ୍ୟ ହିତାଧିକାରୀ ଥିବା ନେଇ ପ୍ରାୟ ୨ ହଜାର ହିତାଧିକାରୀଙ୍କ ନାମରେ ଅଭିଯୋଗ ହୋଇଥିବା ବେଳେ ସର୍ବାଧିକ ଯୁଯୁମୁରା ବ୍ଲକରେ ଥିବା ଅଭିଯୋଗ ହୋଇଥିଲା। ବାମରା ବ୍ଲକରେ ୨୭୭୩ ସମ୍ଭାବ୍ୟ ତାଲିକା ରହିଥିବା ବେଳେ ୨୭୮ ହିତାଧିକାରୀ ଅଯୋଗ୍ୟ ଥିବା ଅଭିଯୋଗ ହୋଇଛି। ଅନୁରୂପ ଭାବେ ନାକଟିଦେଉଳ ବ୍ଲକରେ ୧୦୬୩ ମଧ୍ୟରୁ ୨୩୩, ରେଢାଖୋଲରେ ୧୨୦୭ରୁ ୨୨୫, ରେଙ୍ଗାଲିରେ ୨୮୧୦ରୁ ୨୫୬, ଧନକଉଡାରେ ୧୮୭୫ରୁ ୧୩୩, କୁଚିଣ୍ଡାରେ ୨୦୧୩ରୁ ୧୨୨, ମାନେଶ୍ୱରରେ ୧୭୦୨ରୁ ୫୫, ଯୁଯୁମୁରାରେ ୨୪୫୩ରୁ ୬୧୨, ଜମନକିରା ବ୍ଲକରେ ୨୮୩୬ରୁ ୬୬ ଅଯୋଗ୍ୟ ଥିବା ନେଇ ଅଭିଯୋଗ ହୋଇଥିଲା।