ମୁମ୍ବାଇ, ୧୨।୪(ପି.ଟି.)- ଚଳିତ ଇଣ୍ଡିଆନ ପ୍ରିମିୟର ଲିଗ୍ରେ ଚେନ୍ନାଇ ସୁପରକିଙ୍ଗ୍ସ ଏହାର ପ୍ରଥମ ମ୍ୟାଚ ଦିଲ୍ଲୀ କ୍ୟାପିଟାଲ୍ସ ନିକଟରୁ ହାରିଯାଇଛି। ଏହି ମ୍ୟାଚରେ ଜୋଶ ହାଜଲେଉଡ୍ଙ୍କ ଅନୁପସ୍ଥିତି ଅନୁଭବ କରିଛନ୍ତି କୋଚ୍ ଷ୍ଟିଫେନ୍ ଫ୍ଲେମିଂ। ହାଜଲେଉଡ୍ ଶେଷ ମୁହୂର୍ତ୍ତରେ ଆଇପିଏଲରୁ ଓହରି ଯାଇଥିବାବେଳେ ତାଙ୍କ ବଦଳ ଖେଳାଳି ଜାସନ ବେହରେନଡର୍ଫ ଏ ପର୍ଯ୍ୟନ୍ତ ପହଞ୍ଚତ୍ ନାହାନ୍ତି। ଦକ୍ଷିଣ ଆଫ୍ରିକାର ଲୁନ୍ଗି ଏନ୍ଗିଡି କ୍ୱାରାଣ୍ଟାଇନ୍ରେ ଥିବାରୁ ଦଳର ପ୍ରଥମ ମ୍ୟାଚ ଖେଳିପାରି ନ ଥିଲେ କିମ୍ବା ଆଗାମୀ ମ୍ୟାଚରେ ମଧ୍ୟ ଉପଲବ୍ଧ ହେବେନାହିଁ। ଏହା ଦଳୀୟ ରଣନୀତିକୁ ବିଗାଡ଼ି ଦେଇଛି ବୋଲି ଫ୍ଲେମିଂ କହିଛନ୍ତି। ପ୍ରକାଶଯୋଗ୍ୟ ଯେ, ହାଜଲେଉଡ୍ ଆଗାମୀ ଅନ୍ତର୍ଜାତୀୟ ମ୍ୟାଚଗୁଡ଼ିକ ପାଇଁ ଫିଟ୍ ରହିବା ଲକ୍ଷ୍ୟରେ ଆଇପିଏଲରୁ ଓହରି ଯିବାକୁ ବିଳମ୍ବରେ ନିଷ୍ପତ୍ତି ନେଇଥିଲେ। ସେହିପରି ପାକିସ୍ତାନ ବିପକ୍ଷ ଦକ୍ଷିଣ ଆଫ୍ରିକାର ଦିନିକିଆ ସିରିଜ ଅଧାରୁ ଆସିଥିବାରୁ ଏନ୍ଗିଡ଼ିଙ୍କ କ୍ୱାରାଣ୍ଟାଇନ୍ ଅବଧି ଶେଷ ହୋଇ ପାରିନାହିଁ। ଏନ୍ଗିଡି ଓ ବେହରେନଡର୍ଫ ଉପଲବ୍ଧ ହେଲେ ଯାଇ ବିଦେଶୀ ଖେଳାଳିଙ୍କୁ ନେଇ ବୋଲିଂ ଲାଇନ୍ଅପ୍ ପ୍ରସ୍ତୁତ ହୋଇପାରିବ। ଏବେ ଅନ୍ତର୍ଜାତୀୟ ଅଭିଜ୍ଞତା ଥିବା ସାମ୍ କୁରାନଙ୍କ ଉପରେ ଅଧିକ ନିର୍ଭର କରିବାକୁ ପଡ଼ୁଛି ବୋଲି ସେ କହିଛନ୍ତି। ଗତ ମ୍ୟାଚରେ ଚେନ୍ନାଇ ପକ୍ଷରୁ ୧୮୯ ରନର ଟାର୍ଗେଟ ଦିଆଯାଇଥିଲେ ହେଁ ଦିଲ୍ଲୀ ୭ ଉଇକେଟରେ ସହଜ ବିଜୟ ହାସଲ କରି ନେଇଥିଲା। ପୃଥ୍ବୀ ଶ’ ଏବଂ ଶିଖର ଧାଓ୍ବନଙ୍କ ଉପରେ ଚେନ୍ନାଇ ବୋଲରମାନେ ଅଙ୍କୁଶ ଲଗାଇପାରି ନ ଥିଲେ।