ମୁମ୍ବାଇ: ବଲିଉଡ୍ ଅଭିନେତା ସୁଶାନ୍ତ ସିଂ ରାଜପୁତ ମାତ୍ର ୩୪ ବର୍ଷ ବୟସରେ ବାନ୍ଦ୍ରାସ୍ଥିତ ଘରେ ଆତ୍ମହତ୍ୟା କରିଥିଲେ। ତାଙ୍କ ଆତ୍ମହତ୍ୟା ପରେ ବିଭିନ୍ନ ଆଡୁ ଖୋଳତାଡ଼ ଆରମ୍ଭ ହୋଇଛି। ଏହି ମାମଲାରେ ପୋଲିସ ବି ଯାଞ୍ଚ ଆରମ୍ଭ କରିଛି। ଏପର୍ଯ୍ୟନ୍ତ ୨୫ରୁ ଊର୍ଦ୍ଧ୍ୱ ଲୋକଙ୍କୁ ଜେରା କରିସାରିଲାଣି ପୋଲିସ। ସୁଶାନ୍ତଙ୍କ ସୋସିଆଲ ମିଡିଆ ପୋଷ୍ଟକୁ ନେଇ ମଧ୍ୟ ଯାଞ୍ଚ ଆରମ୍ଭ ହୋଇଛି। ଏଥିରୁ ଜଣାପଡ଼ିଛି, ସୁଶାନ୍ତ ସୋସିଆଲ ମିଡିଆରେ ରିୟା ଚକ୍ରବର୍ତ୍ତୀଙ୍କ ସହ ଏକ ଫଟୋ ଶେୟାର କରିଥିଲେ। ଯାହାକୁ ସେ ନିଜ ଇନ୍ଷ୍ଟାଗ୍ରାମରୁ ଡିଲିଟ୍ କରିଦେଇଥିଲେ।
ସୁଶାନ୍ତ ଏବଂ ରିୟାଙ୍କୁ ଅନେକ ସ୍ଥାନରେ ଏକାଠି ଦେଖିବାକୁ ମିଳିଥାଏ। ଦୁହେଁ ଦୁହିଁଙ୍କ ଜନ୍ମଦିନ ପାଳନ କରିବା ହେଉ କି ଜିମ୍ ଯିବା ହେଉ। କୁହାଯାଉଛି, ଦୁହେଁ ଦୁହିଁଙ୍କୁ ଡେଟ୍ କରୁଥିଲେ। ଏହି ସମୟରେ ସୁଶାନ୍ତ ରିୟାଙ୍କ ସହ ଏକ ଫଟୋ ଉଠାଇଥିଲେ। ପରେ ରିୟା ଏହି ଫଟୋକୁ ୪ ମେ’୨୦୧୯ରେ ଇନ୍ଷ୍ଟାଗ୍ରାମ୍ରେ ପୋଷ୍ଟ କରିଥିଲେ। ଏଥିରେ କ୍ୟାପଶନ୍ ଲେଖିଥିଲେ, ‘ସୁଖ’ ଶକ୍ତି ପରି ହୋଇଥାଏ।
ଏହି ଫଟୋରେ ସୁଶାନ୍ତ ଏବଂ ରିୟା ଖୁବ୍ ହସୁଥିବା ନଜର ଆସିଛନ୍ତି। ସୁଶାନ୍ତଙ୍କ କୁକୁର ଫଜକୁ ମଧ୍ୟ ଏଥିରେ ଦେଖିବାକୁ ମିଳିଛି। ଫଟୋ ଆଉ କିଛି ଲୋକ ଠିଆ ହୋଇଥିବା ନଜର ଆସିଛି। ମାତ୍ର ସୁଶାନ୍ତ ଏହି ଫଟୋକୁ ନିଜ ଇନ୍ଷ୍ଟାଗ୍ରାମ୍ ପେଜ୍ରୁ ଡିଲିଟ୍ କରିଦେଇଛନ୍ତି। କିନ୍ତୁ ରିୟାଙ୍କ ଇନ୍ଷ୍ଟାଗ୍ରାମରେ ଫଟୋଟି ଆଜି ମଧ୍ୟ ରହିଛି। ଏହି ଫଟୋ ଦେଖି ପ୍ରଶଂସକମାନେ ସୁଶାନ୍ତଙ୍କୁ ବହୁତ ମନେ ପକାଇଛନ୍ତି।
ସ୍ମରଣ ଥାଉକି, ଲକ୍ଡାଉନ୍ ସମୟରେ ରିୟା ସୁଶାନ୍ତଙ୍କ ସହ ଏକାଠି ରହୁଥିଲେ। ସୁଶାନ୍ତ ଆତ୍ମହତ୍ୟା କରିବା କିଛିଦିନ ପୂର୍ବରୁ ଦୁଇଜଣଙ୍କ ମଧ୍ୟରେ କିଛି କଥାବାର୍ତ୍ତା ହୋଇଥିଲା। ଏହା ପରେ ସୁଶାନ୍ତ ରିୟାଙ୍କୁ ଘରକୁ ଚାଲିଯିବାକୁ କହିବାରୁ ସେ ଚାଲିଯାଇଥିଲେ।