ନୂଆଦିଲ୍ଲୀ,୩।୧୦: ଏମ୍ସରେ ଚିକିତ୍ସିତ ହେଉଥିବା ରୋଗୀଙ୍କ ପାଇଁ ଏକ ଖୁସି ଖବର। ଏଣିକି ଏମ୍ସର ଓପିଡି ସେବା ପାଇବା ପାଇଁ ପଞ୍ଜୀକରଣ ଫର୍ମ ଲାଗି ଶୁଳ୍କ ଆଉ ଦେବାକୁ ପଡ଼ିବନି। ନିଶୁଳ୍କରେ ରୋଗୀ ଫର୍ମ ପଞ୍ଜୀକରଣ କରିପାରିବେ। ନଭେମ୍ବର ୧ରୁ ଏହି ନିୟମ ଲାଗୁ ହେବ। ଏତଦ୍ ବ୍ୟତୀତ ଏମ୍ସରେ କୌଣସି ବ୍ୟକ୍ତିଙ୍କୁ ୩୦୦ଟଙ୍କା ପର୍ଯ୍ୟନ୍ତ ଚିକିତ୍ସା ମାଗଣା ରହିବ। ଅଖିଳ ଭାରତୀୟ ଆର୍ୟୁବିଜ୍ଞାନ ସଂସ୍ଥା ଦ୍ୱାରା ନିଆଯାଇଥିବା ଏହି ନିଷ୍ପତ୍ତିରେ ହଜାର ହଜାର ରୋଗୀ ଲାଭବାନ ହୋଇପାରିବେ। ସୂଚନାଯୋଗ୍ୟ, ଏହା ପୂର୍ବରୁ ଓପିଡିର ପଞ୍ଜୀକରଣ ପାଇଁ ଫର୍ମ ବାବଦକୁ ରୋଗୀଙ୍କୁ ୧୦ଟଙ୍କା ଶୁଳ୍କ ଦେବାକୁ ପଡ଼ୁଥିଲା। ସୂଚନା ମୁତାବକ, ଦିଲ୍ଲୀ ଏମ୍ସକୁ ନୂତନ ନିର୍ଦ୍ଦେଶକ ମିଳିବା ପରେ ଏଠାରେ ଅନେକ ପରିବର୍ତ୍ତନ ଦେଖାଯାଉଛି। ଏଠାରେ କର୍କଟ ବିଭାଗର ରୋଗୀଙ୍କ ପାଇଁ ଓପିଡି ପଞ୍ଜୀକରଣର ସମୟ ପରିବର୍ତ୍ତନ କରାଯାଇଛି। ନୂତନ ସମୟ ଅନୁଯାୟୀ, ବର୍ତ୍ତମାନ କର୍କଟ ବିଭାଗର ରୋଗୀଙ୍କ ଫର୍ମ ସକାଳ ୮ଟାରୁ ଦ୍ୱିପ୍ରହର ୧ଟା ପର୍ଯ୍ୟନ୍ତ ଖୋଲା ରହିବ। ଏଥିସହ କର୍କଟ ବିଭାଗରେ ମଧ୍ୟ ପରିବର୍ତ୍ତନ କରାଯାଇ ସନ୍ଧ୍ୟା ୫ଟା ଯାଏ କରାଯାଇଛି।
