ଆବୁଧାବି,୨୪।୧୦(ପି.ଟି.): ଟେବୁଲ ଟପ୍ପର ଦିଲ୍ଲୀ କ୍ୟାପିଟାଲ୍ସ ଓ କୋଲକାତା ନାଇଟ ରାଇଡର୍ସ ଶନିବାର ପରସ୍ପରକୁ ଭେଟିବେ। ଶନିବାର ପ୍ରଥମ ମ୍ୟାଚ୍ରେ ଦୁଇ ଦଳ ଟୁର୍ନାମେଣ୍ଟର ୪୨ତମ ମୁକାବିଲାରେ ମୁହଁ।ମୁହିଁ ହେବେ। ସ୍ଥାନୀୟ ଶେଖ ଜାଏଦ ଷ୍ଟାଡିୟମରେ ଖେଳାଯିବାକୁ ଥିବା ଏହି ମ୍ୟାଚ୍ ଦିଲ୍ଲୀ ଅପେକ୍ଷା କୋଲକାତା ପାଇଁ ଅଧିକ ଗୁରୁତ୍ୱବହନ କରୁଛି। କିଙ୍ଗ୍ସ ଏକାଦଶ ପଞ୍ଜାବଠାରୁ ପରାସ୍ତ ହେବା ପରେ ଦିଲ୍ଲୀ ତା’ର ବ୍ୟାଟିଂରେ ସୁଧାର ଆଣିବାକୁ ପ୍ରୟାସ କରିବ। ଦିଲ୍ଲୀ ଏପର୍ଯ୍ୟନ୍ତ ୧୦ଟି ମ୍ୟାଚ୍ ଖେଳି ୭ ବିଜୟ, ୩ ପରାଜୟ ସହ ୧୪ ପଏଣ୍ଟ ହାସଲ କରି ଉନ୍ନତ ରନ୍ରେଟ୍ ଦୃଷ୍ଟିକୋଣରୁ ତାଲିକାର ଶୀର୍ଷରେ ରହିଛି। ଅଭିଜ୍ଞ ଓପନର ଶିଖର ଧାଓ୍ବନ ଜବରଦସ୍ତ ଫର୍ମରେ ରହିଛନ୍ତି। ସେ କ୍ରମାଗତ ଦୁଇଟି ଶତକ ହାସଲ କରି ଆଇପିଏଲ୍ରେ ଇତିହାସ ସୃଷ୍ଟି କରିଛନ୍ତି। ତେବେ ଏହି ଶତକ ସତ୍ତ୍ୱେ ଦିଲ୍ଲୀ ପରାସ୍ତ ହୋଇଥିଲା। ଅନ୍ୟ ବ୍ୟାଟ୍ସମ୍ୟାନମାନେ ଫେଲ୍ ମାରିଥିଲେ। ଯୁବ ଓପନର ପୃଥ୍ବୀ ଶ ଆଶାନୁରୂପ ପ୍ରଦର୍ଶନ କରିପାରି ନାହାନ୍ତି। ଗତ ୪ଟି ଇନିଂସରେ ସେ ୨ଥର ଶୂନରେ ଆଉଟ ହୋଇଛନ୍ତି। ଅଧିନାୟକ ଶିଖର ଧାଓ୍ବନ ଓ ଉଇକେଟକିପର ବ୍ୟାଟ୍ସମ୍ୟାନ ରିଷଭ ପନ୍ତ ଭଲ ପ୍ରଦର୍ଶନ କରି ନାହାନ୍ତି। ଦିଲ୍ଲୀ ମିଡିଲ ଅର୍ଡର ମେରୁଦଣ୍ଡ କୁହାଯାଉଥିବା ମାର୍କୁସ ଷ୍ଟୋଇନିସଙ୍କୁ ମଧ୍ୟ ଭଲ ଖେଳିବାକୁ ହେବ। କାଗିସୋ ରାବାଡ଼ାଙ୍କ ଅନୁପସ୍ଥିତିରେ ଦ୍ରୁତ ବୋଲର ଅନରିଚ ନୋର୍ଜ ଭଲ ପ୍ରଦର୍ଶନ କରିଛନ୍ତି। କ୍ଲାନ୍ତି ଓ ବ୍ୟସ୍ତତା କାରଣରୁ ରାବାଡ଼ା ଗତ ମ୍ୟାଚ୍ ଖେଳିପାରି ନ ଥିଲେ। ସେ ପ୍ରତ୍ୟାବର୍ତ୍ତନ କଲେ ଦିଲ୍ଲୀ ଆହୁରି ଶକ୍ତିଶାଳୀ ହେବ। ରାବାଡ଼ା ଖେଳିଲେ ଅଷ୍ଟ୍ରେଲିଆ ଦ୍ରୁତ ବୋଲର ଡାନିଏଲ୍ ସାମ୍ସଙ୍କୁ ବେଞ୍ଚ୍ରେ ବସିବାକୁ ପଡିବ।
ଅପରପକ୍ଷରେ କୋଲକାତା ନାଇଟ ରାଇଡର୍ସ ଏପର୍ଯ୍ୟନ୍ତ ୧୦ଟି ମ୍ୟାଚ୍ ଖେଳି ୫ଟି ଲେଖାଏ ବିଜୟ ଓ ପରାଜୟ ସହ ୧୦ ପଏଣ୍ଟ ହାସଲ କରି ତାଲିକାର ଚତୁର୍ଥ ସ୍ଥାନରେ ରହିଛି। ପ୍ଲେ- ଅଫ୍ ଦୌଡ଼ରେ ସ୍ଥିତି ବଜାୟ ରଖିବା ଦଳର ଏବେ ଲକ୍ଷ୍ୟ ରହିଛି। ଗତ ମ୍ୟାଚ୍ରେ ମହମ୍ମଦ ସିରାଜଙ୍କ ଘାତକ ବୋଲିଂ ସହାୟତାରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ଅତି ସହଜରେ କୋଲକାତାକୁ ହରାଇଥିଲା। କୋଲକାତା ମାତ୍ର ୮୪ ରନ କରି ଅଲଆଉଟ ହୋଇଥିଲା। ତେଣୁ ଭଲ ଖେଳି କୋଲକାତା ଆତ୍ମବିଶ୍ୱାସ ତଥା ସନ୍ତୁଳନ ଫେରିପାଇବାକୁ ଓ ତାଲିକାର ଶୀର୍ଷକୁ ଉଠିବାକୁ ପ୍ରୟାସ କରିବ। ଆନ୍ଦ୍ରେ ରସେଲଙ୍କ ଖରାପ୍ ଫର୍ମ ଦଳ ପାଇଁ ଚିନ୍ତା ସୃଷ୍ଟି କରିଛି। ତେବେ ଦ୍ରୁତ ବୋଲର ଲୋକି ଫର୍ଗୁସନଙ୍କ ଦମ୍ଦାର ପ୍ରଦର୍ଶନ ଦଳ ପାଇଁ ଆଶା ସୃଷ୍ଟି କରିଛି। ଦଳଗତ ପ୍ରଦର୍ଶନ ଉପରେ କୋଲକାତାକୁ ଗୁରୁତ୍ୱ ଦେବାକୁ ହେବ। ଏଥିପାଇଁ ଅଧିନାୟକ ଇଅନ ମୋର୍ଗାନଙ୍କ ସମେତ ଦୀନେଶ କାର୍ତ୍ତିକ, ଶୁବମନ ଗିଲ, ନୀତୀଶ ରାଣା ଓ ଅନ୍ୟମାନଙ୍କୁ ଅଧିକ ଭଲ ଖେଳିବାକୁ ହେବ।