ନୂଆଦିଲ୍ଲୀ, ୧୫।୪- ଇଣ୍ଡିଆନ ପ୍ରିମିୟର ଲିଗ୍ର ଦ୍ୱିତୀୟ ରାଉଣ୍ଡ ମ୍ୟାଚ ଆରମ୍ଭ ହୋଇ ଯାଇଥିବାବେଳେ ଦିଲ୍ଲୀ କ୍ୟାପିଟାଲ୍ସ ପେସ୍ ବୋଲର ଏନରିକ ନର୍ଜେ କରୋନାରେ ଆକ୍ରାନ୍ତ ହୋଇଥିବା ଜଣାଯାଇଛି। ଫଳରେ ରିଷଭ ପନ୍ତଙ୍କ ଦଳକୁ ଏହା ଶକ୍ତ ଧକ୍କା ପହଞ୍ଚାଇଛି। ଏହି ଦ୍ରୁତ ବୋଲର ଦକ୍ଷିଣ ଆଫ୍ରିକାରୁ ନେଗେଟିଭ୍ ରିପୋର୍ଟ ଧରି ଆସିବା ପରେ କ୍ୱାରାଣ୍ଟାଇନ୍ରେ ରହିଥିଲେ। ମାତ୍ର ବୁଧବାର ତାଙ୍କ ଟେଷ୍ଟ ରିପୋର୍ଟ ପଜିଟିଭ୍ ଆସିଛି। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)ର ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜିଓର (ଏସ୍ଓପି) ଅନୁସାରେ ପଜିଟିଭ ଆସୁଥିବା ଖେଳାଳି ବାୟୋ ବବ୍ଲ ବାହାରେ ଅତିକମ୍ରେ ୧୦ ଦିନ ଆଇସୋଲେଶନରେ ରହିବେ। ତା’ ପରେ ତାଙ୍କର ଆରଟି-ପିସିଆର ପରୀକ୍ଷା ହେବ। ନର୍ଜେ ପାକିସ୍ତାନ ବିପକ୍ଷ ଦିନିକିଆ ସିରିଜର ୨ଟି ମ୍ୟାଚ ଖେଳିବା ପରେ ଆଇପିଏଲ ପାଇଁ ଭାରତ ଆସିଥିଲେ। ମୁମ୍ବାଇରେ ପହଞ୍ଚତ୍ବା ପରେ ସେ ୭ ଦିନ ବାଧ୍ୟତାମୂଳକ କ୍ୱାରାଣ୍ଟାଇନ୍ରେ ଥିଲେ। ପୂର୍ବରୁ ଅକ୍ଷର ପଟେଲ କରୋନାରେ ଆକ୍ରାନ୍ତ ଥିବାବେଳେ ଏବେ ନର୍ଜେ ଏଥିରେ ସାମିଲ ହେବା ଦିଲ୍ଲୀ ଅଭିଯାନରେ ବାଧା ସୃଷ୍ଟି କରିଛି। ଦଳର ନିୟମିତ ଅଧିନାୟକ ଶ୍ରେୟାସ ଆୟାର କାନ୍ଧରେ ଆଘାତ ପାଇ ଆଇପିଏଲରୁ ଓହରି ଯାଇଛନ୍ତି। ଦିଲ୍ଲୀ ଏହାର ପ୍ରଥମ ମ୍ୟାଚରେ ଚେନ୍ନାଇ ସୁପରକିଙ୍ଗ୍ସକୁ ହରାଇଥିବାବେଳେ ପରବର୍ତ୍ତୀ ମ୍ୟାଚରେ ରାଜସ୍ଥାନ ରୟାଲ୍ସକୁ ଭେଟିବାକୁ ଯାଉଛି।