ଚେନ୍ନାଇ,୨୦।୪ : ପ୍ରଥମେ ବୋଲିଂ ଓ ଫିଲ୍ଡିଂ ତା’ ପରେ ବ୍ୟାଟିଂ ବିଭାଗରେ ମୁମ୍ବାଇ ଇଣ୍ଡିଆନ୍ସକୁ ହରାଇଛି ଦିଲ୍ଲୀ କ୍ୟାପିଟାଲ୍ସ। ଏଥବ ସହ ଗତବର୍ଷରୁ ମୁମ୍ବାଇ ବିପକ୍ଷରେ ଚାଲିଥିବା ପରାଜୟ ଧାରା ଦିଲ୍ଲୀ ଭଙ୍ଗ କରିଛି। ଗତ ସିଜନରେ ଫାଇନାଲ ସମେତ ୪ ଥର ମୁମ୍ବାଇ ଠାରୁ ଦିଲ୍ଲୀ ପରାସ୍ତ ହୋଇଥିଲା। ମୁମ୍ବାଇ ପକ୍ଷରୁ ଧାର୍ଯ୍ୟ ୧୩୮ ରନ୍ର ବିଜୟ ଲକ୍ଷ୍ୟକୁ ଦିଲ୍ଲୀ ୬ ଉଇକେଟ ହାସଲ କରି ନେଇଥିଲା।
ଟସ୍ ଜିତି ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା ମୁମ୍ବାଇ। ଦଳକୁ ଭଲ ଆରମ୍ଭ ଦେଇଥିଲେ ଅଧିନାୟକ ରୋହିତ ଶର୍ମା। ୩ ଲେଖାଏ ଚୌକା ଓ ଛକା ସହାୟତାରେ ସେ ୪୪ ରନ୍ କରିଥିଲେ। କିନ୍ତୁ ମୁମ୍ବାଇ ବ୍ୟାଟିଂ ଲାଇନ ଅପ୍କୁ ପୂରା ବିଗାଡ଼ି ଦେଇଥିଲେ ଅମିତ୍ ମିଶ୍ରା। ୪ ଓଭରରେ ୨୪ ରନ୍ ଦେଇ ହାତେଇଥିଲେ ୪ ଗୁରୁତ୍ୱପୂର୍ଣ୍ଣ ଉଇକେଟ। ତାଙ୍କୁ ସହଯୋଗ କରିଥିଲେ ଅଭେଶ ଖାନ (୨) ଓ ଲଲିତ ଯାଦବ (୧)। ଏଥି ଯୋଗୁ ୬.୫ ଓଭର ସୁଦ୍ଧା ୬୭/୧ ସ୍କୋର କରିଥିବା ମୁମ୍ବାଇ ୯ ଉଇକେଟ ହରାଇ ୧୩୭ ରନ୍ କରିବାକୁ ସକ୍ଷମ ହୋଇଥିଲା। ଜବାବରେ ଆରମ୍ଭରୁ ପୃଥ୍ବୀ ଶ (୭)ଙ୍କ ଉଇକଟ ହରାଇଥିଲା ଦିଲ୍ଲୀ। କିନ୍ତୁ ଶିଖର ଧାଓ୍ବନ (୪୫) ଓ ଷ୍ଟିଭ ସ୍ମିଥ (୩୩) ଦ୍ୱିତୀୟ ଉଇକେଟ ପାଇଁ ଯୋଡ଼ିଥିଲେ ୫୩ ରନ୍। ଏମାନଙ୍କ ଛଡ଼ା ଲଲିତ (୨୨*) ଓ ଶମରନ ହେଟମେୟର (୧୪*) ଛୋଟ ହେଲେ ଗୁରୁତ୍ୱପୂର୍ଣ୍ଣ ଯୋଗଦାନ ଦେଇଥିଲେ। ଫଳରେ ଦିଲ୍ଲୀ ୧୯.୧ ଓଭରରେ ୪ ଉଇକେଟ ହରାଇ ୧୩୮ ରନ୍ କରି ମ୍ୟାଚ୍ ଜିତି ନେଇଥିଲା।
