ମୁମ୍ବାଇ, ୨୫।୩(ପି.ଟି.)- ଇଣ୍ଡିଆନ ପ୍ରିମିୟର ଲିଗ୍ର ୧୪ତମ ସଂସ୍କରଣ ଏପ୍ରିଲ ୯ରୁ ଆରମ୍ଭ ହେବ। ଏହାକୁ ଦୃଷ୍ଟିରେ ରଖି କ୍ୱାରାଣ୍ଟାଇନ୍ ଔପଚାରିକତା ପୂରଣ ପାଇଁ ଦିଲ୍ଲୀ କ୍ୟାପିଟାଲ୍ସ ଖେଳାଳିମାନେ ମଙ୍ଗଳବାର ମୁମ୍ବାଇରେ ଏକାଠି ହୋଇଛନ୍ତି। ଖେଳାଳିମାନେ ଅତିକମ୍ରେ ୭ ଦିନ କ୍ୱାରାଣ୍ଟାଇନ୍ରେ ରହିବାକୁ ବାଧ୍ୟ। ପ୍ରଥମ ପର୍ଯ୍ୟାୟରେ ପହଞ୍ଚତ୍ଥିବା ଖେଳାଳିମାନେ ହେଲେ ଈଶାନ୍ତ ଶର୍ମା, ଉମେଶ ଯାଦବ, ଅଲରାଉଣ୍ଡର ଲଳିତ ଯାଦବ ଓ ଲେଗ୍ ସ୍ପିନର ଅମିତ ମିଶ୍ର। ୟୁନାଇଟେଡ ଆରବ ଏମିରେଟ୍ସ (ୟୁଏଇ)ରେ ହୋଇଥିବା ଗତ ସଂସ୍କରଣର ଫାଇନାଲରେ ପ୍ରବେଶ କରିଥିବା ଦିଲ୍ଲୀ କ୍ୟାପିଟାଲ୍ସ ଆଗାମୀ ଲିଗ୍ରେ ଏହାର ପ୍ରଥମ ମ୍ୟାଚ ଏପ୍ରିଲ ୧୦ରେ ଚେନ୍ନାଇ ସୁପରକିଙ୍ଗ୍ସ ସହିତ ଖେଳିବ। ଖେଳାଳିମାନେ ଅତିକମ୍ରେ ମାର୍ଚ୍ଚ ୩୦ ପର୍ଯ୍ୟନ୍ତ କ୍ୱାରାଣ୍ଟାଇନ୍ରେ ରହିବେ। ଇଂଲଣ୍ଡ ବିପକ୍ଷ ୪ ମ୍ୟାଚ ବିଶିଷ୍ଟ ଟେଷ୍ଟ ସିରିଜ ପରେ ବ୍ରେକ୍ ନେଇଥିବା ଅଜିଙ୍କ୍ୟ ରାହାନେ ମଧ୍ୟ ବାୟୋ-ବବ୍ଲ ଜୀବନ ବିତାଇବା ଦିଗରେ ଅଗ୍ରସର ହୋଇଛନ୍ତି। ” ଦୁଇ ସପ୍ତାହ ଘରେ ରହି ପରିବାର ଓ ବନ୍ଧୁମାନଙ୍କ ସହ ସମୟ ବିତାଇଛି। ଏବେ ପୁଣି କ୍ୱାରାଣ୍ଟାଇନକୁ ଫେରୁଛି ଏବଂ ଆଗାମୀ କିଛି ମାସ କ୍ରିକେଟକୁ ଉପଭୋଗ କରିବାକୁ ବ୍ୟଗ୍ର“ ବୋଲି ରାହାନେ ଟୁଇଟ୍ କରିଛନ୍ତି। ଅଷ୍ଟ୍ରେଲିଆ ବିପକ୍ଷରେ ୨-୧ରେ ଐତିହାସିକ ଟେଷ୍ଟ ସିରିଜ ବିଜୟରେ ରାହାନେ ଭାରତର ନେତୃତ୍ୱ ନେଇଥିଲେ। କ୍ୟାପିଟାଲ୍ସ ଆଇପିଏଲର ପ୍ରଥମାର୍ଦ୍ଧ ନିୟମିତ ଅଧିନାୟକ ଶ୍ରେୟାସ ଆୟାରଙ୍କ ବିନା ଖେଳିବା ଆଶଙ୍କା ଜାତ ହୋଇଛି। ଇଂଲଣ୍ଡ ବିପକ୍ଷ ପ୍ରଥମ ଦିନିକିଆରେ ଫିଲ୍ଡିଂ କରୁଥିବାବେଳେ ଆୟାର ଆହତ ହୋଇଥିଲେ। ତାଙ୍କ କାନ୍ଧ ଖସିଥିବାରୁ ସେ ଦିନିକିଆ ସିରିଜର ଅବଶିଷ୍ଟ ୨ଟି ମ୍ୟାଚରୁ ବାଦ୍ ପଡ଼ିଛନ୍ତି। ଆୟାରଙ୍କ ଅନୁପସ୍ଥିତିରେ ରିଷଭ ପନ୍ତ, ଅଷ୍ଟ୍ରେଲିଆର ଷ୍ଟିଭ୍ ସ୍ମିଥ୍ କିମ୍ବା ସିନିୟର ଅଫ୍ ସ୍ପିନର ରବିଚନ୍ଦ୍ରନ ଅଶ୍ୱିନ ଦିଲ୍ଲୀ ଦଳର ନେତୃତ୍ୱ ନେଇପାରନ୍ତି।