ନୂଆଦିଲ୍ଲୀ, ୧୮।୮: ବିଶ୍ୱର ସବୁଠାରୁ ବ୍ୟୟବହୁଳ ଟି୨୦ କ୍ରିକେଟ୍ ଟୁର୍ନାମେଣ୍ଟ ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍)ର ତ୍ରୟୋଦଶ ସଂସ୍କରଣ ସେପ୍ଟେମ୍ବର ୧୮ରୁ ୟୁଏଇରେ ଆରମ୍ଭ ହେବ। ଏଥିଲାଗି ଦିଲ୍ଲୀ କ୍ୟାପିଟାଲ୍ସ ଦଳରେ ସାମାନ୍ୟ ପରିବର୍ତ୍ତନ କରାଯାଇଛି। ଅଲ୍ରାଉଣ୍ଡର କ୍ରିସ୍ ଓ୍ବକ୍ସଙ୍କ ବଦଳରେ ଦକ୍ଷିଣ ଆଫ୍ରିକା ଦ୍ରୁତ ବୋଲର୍ ଏନ୍ରିଚ ନୋର୍ଜଙ୍କୁ ଦଳରେ ସାମିଲ କରିଛି ଦିଲ୍ଲୀ। ୨୦୧୯ ସିଜନରେ ଏନ୍ରିଚ କୋଲକାତା ନାଇଟ୍ ରାଇଡର୍ସ ଦଳରେ ରହିଥିଲେ। କିନ୍ତୁ କହୁଣିରେ ଆଘାତ କାରଣରୁ ସେ ପ୍ରତିଯୋଗିତାରୁ ବାହାରି ଯାଇଥିଲେ ଏବଂ ଆଇପିଏଲ୍ ପଦାର୍ପଣ କରିବାରୁ ବଞ୍ଚିତ ହୋଇଥିଲେ। ଏକ ବିବୃତ୍ତିରେ ୨୬ ବର୍ଷୀୟ ଏନ୍ରିଚ୍ କହିଛନ୍ତି, ‘ଦିଲ୍ଲୀ କ୍ୟାପିଟାଲ୍ସ ଦଳରେ ଯୋଗଦେଇ ଖୁସି ଅନୁଭବ କରୁଛି। ଏହା ମୋ ଲାଗି ଏକ ବଡ଼ ଅନୁଭୂତି ହେବ। ଦିଲ୍ଲୀ ମ୍ୟାନେଜମେଣ୍ଟ ମୋତେ ସୁଯୋଗ ଦେଇଥିବାରୁ ମୁଁ କୃତଜ୍ଞ।’ ଏହି ଡାହାଣହାତୀ ଦ୍ରୁତ ବୋଲର ଗତ ବର୍ଷ ଭାରତ ବିପକ୍ଷ ଟେଷ୍ଟ ମ୍ୟାଚ୍ ଖେଳି ତାଙ୍କ ଅନ୍ତର୍ଜାତୀୟ କ୍ୟାରିୟର ଆରମ୍ଭ କରିଥିଲେ। ବର୍ତ୍ତମାନ ସୁଦ୍ଧା ସେ ୬ ଟେଷ୍ଟ ମ୍ୟାଚ୍ ଖେଳି ୧୯ ଉଇକେଟ୍ ଅକ୍ତିଆର କରିଛନ୍ତି। ସେ ମଧ୍ୟ ଦକ୍ଷିଣ ଆଫ୍ରିକା ପାଇଁ ୭ ଦିନିକିଆ ଓ ୩ ଟି୨୦ ମ୍ୟାଚ୍ ଖେଳି ଯଥାକ୍ରମେ ୧୪ ଓ ୨ ଉଇକେଟ ନେଇଛନ୍ତି। ଏଠାରେ ଉଲ୍ଲେଖଯୋଗ୍ୟ, ଗତବର୍ଷ ଇଂଲଣ୍ଡ ଅଲ୍ରାଉଣ୍ଡର କ୍ରିସ୍ ଓ୍ବକ୍ସଙ୍କୁ ଦିଲ୍ଲୀ କ୍ୟାପିଟାଲ୍ସ ନିଲାମୀରେ ଦେଢ଼କୋଟି ଟଙ୍କାରେ କ୍ରୟ କରିଥିଲା। କିନ୍ତୁ ସେ ଚଳିତ ବର୍ଷ ପ୍ରାରମ୍ଭରେ ଆଇପିଏଲ୍ ନ ଖେଳି ଅନ୍ତର୍ଜାତୀୟ ପ୍ରତିଯୋଗିତା ଲାଗି ନିଜକୁ ଫିଟ୍ ରଖିବାକୁ ଘୋଷଣା କରିଥିଲେ।
