ମୁମ୍ବାଇ,୧୬।୫: ସ୍ଥାନୀୟ ଡିଓ୍ବାଇ ପାଟିଲ ସ୍ପୋଟର୍ସ ଏକାଡେମୀରେ ସୋମବାର ଖେଳାଯାଇଥିବା ଆଇପିଏଲ ମ୍ୟାଚ୍ରେ ଦିଲ୍ଲୀ କ୍ୟାପିଟାଲ ୧୭ ରନ୍ରେ ପଞ୍ଜାବ କିଙ୍ଗ୍ସକୁ ହରାଇ ଦେଇଛି। ଏହି ବିଜୟ ଯୋଗୁ ଦିଲ୍ଲୀର ପ୍ଲେଅଫ୍ ନିକଟତର ହେବା ସହ ପଏଣ୍ଟ ଟେବୁଲରେ ଚତୁର୍ଥ ସ୍ଥାନ ଅଧିକାର କରିଛି। ଅନ୍ୟପକ୍ଷରେ ପଞ୍ଜାବର ପ୍ଲେଅଫ୍ ଆଶା ପ୍ରାୟତଃ ଶେଷ ହୋଇଛି। ଦିଲ୍ଲୀ କ୍ୟାପିଟାଲ୍ସ ୨୦ ଓଭରରେ ୭ ଉଇକେଟ ହରାଇ ୧୫୯ ରନ୍ କରିଥିଲା। ଜବାବରେ ପଞ୍ଜାବ ୯ ଉଇକେଟରେ ୧୪୨ ରନ୍ କରବାକୁ ସକ୍ଷମ ହୋଇଥିଲା।
ଟସ୍ ଜିତି ମୟଙ୍କ ଅଗ୍ରଓ୍ବାଲ ପ୍ରଥମେ ଫିଲ୍ଡିଂ କରିବାକୁ ନିଷ୍ପତ୍ତି ନେଇଥିଲେ। କିନ୍ତୁ ଦିଲ୍ଲୀ ପ୍ରଥମ ବଲରେ ଡେଭିଡ୍ ଓ୍ବାର୍ନର(୦)ଙ୍କ ଉଇକେଟ ହରାଇଥିଲା। ଅନ୍ୟତମ ସର୍ଫରାଜ ଖାନ (୩୨ ରନ୍, ୫ ଚୌକା ଓ ୧ ଛକା)ଙ୍କ ସହ ମାର୍ଶ ମିଶି ଦଳୀୟ ସ୍କୋରକୁ ୫ ଓଭରରେ ୫୦ ରନ୍ ପାର କରାଇଥିଲେ। ତା’ ପରେ ଲଲିତ ଯାଦବ (୨୪) ଓ ମାର୍ଶ ତୃତୀୟ ଉଇକେଟ ପାଇଁ ୪୭ ରନ୍ ଯୋଡ଼ିଥିଲେ। ଏହାପରେ କ୍ରମାଗତ ବ୍ୟବଧାନରେ ୩ ଉଇକେଟ ପଡ଼ିଯିବାରୁ ଦିଲ୍ଲୀ ବଡ଼ ସ୍କୋର ହାସଲ କରିପାରି ନ ଥିଲା। ଶେଷ ଆଡ଼କୁ ଆଟାକିଂ ବ୍ୟାଟିଂ କରୁଥିବା ମାର୍ଶ (୬୩ ରନ୍, ୪ ଚୌକା ଓ ୩ ଛକା) ୧୯ତମ ଓଭରରେ କାଗିଶୋ ରାବାଡାଙ୍କ ବଲରେ ଆଉଟ୍ ହୋଇଥିଲେ। ପରେ ଅକ୍ଷର ପଟେଲ (୧୭*)ଙ୍କ ଯୋଗୁ ଦିଲ୍ଲୀ ୨୦ ଓଭରରେ ୭ ଉଇକେଟ ହରାଇ ୧୫୯ ରନ୍ କରିବାକୁ ସକ୍ଷମ ହୋଇଥିଲା। ପଞ୍ଜାବ ପାଇଁ ଲିଆମ ଲିଭିଂଷ୍ଟୋନ ଓ ଅର୍ଶଦୀପ ସିଂ ୩ ଲେଖାଏ ଉଇକେଟ ନେଇଥିବା ବେଳେ ରାବାଡା ଗୋଟିଏ ଉଇକେଟ ହାତେଇଥିଲେ। ଜବାବରେ ପଞ୍ଜାବକୁ ୩.୪ ଓଭରରେ ୩୮ ରନ୍ର ବିସ୍ଫୋରକ ଆରମ୍ଭ ଦେଇଥିଲେ ଜନ୍ନି ବେଆରଷ୍ଟୋ(୨୮ ରନ୍, ୪ ଚୌକା ଓ ୧ ଛକା) ଏବଂ ଶିଖର ଧାଓ୍ବନ(୧୯ ରନ୍, ୩ ଚୌକା)। କିନ୍ତୁ ତା’ ପରେ ଦଳ ୬ ଓଭରରେ ୬ ଉଇକେଟ ହରାଇବାରୁ ପଞ୍ଜାବର ବ୍ୟାଟିଂ ଲାଇନ୍ ଦିଗହରା ହୋଇଯାଇଥିଲା। ମାତ୍ର ଜିତେଶ ଶର୍ମା (୪୪ ରନ୍, ୩ ଚୌକା ଓ ୨ ଛକା) ଓ ରାହୁଲ ଚହର (୨୫* ରନ୍, ୨ ଚୌକା ଓ ୧ ଛକା) ଶେଷ ପର୍ଯ୍ୟନ୍ତ ଦଳର ବିଜୟ ଆଶାକୁ ବଞ୍ଚାଇ ରଖିଥିଲେ। ଏହାସତ୍ତ୍ୱେ ପଞ୍ଜାବ ୨୦ ଓଭରରେ ୯ ଉଇକେଟ ହରାଇ ୧୪୨ ରନ୍ କରିପାରିଥିଲା। ଦିଲ୍ଲୀ ପକ୍ଷରୁ ଶାର୍ଦ୍ଦୂଳ ଠାକୁର ୩୬ ରନ୍ ବିନିମୟରେ ୪ ଉଇକେଟ ନେଇଥିଲେ, ଯାହାକି ତାଙ୍କ ଆଇପିଏଲ କ୍ୟାରିୟରର ଶ୍ରେଷ୍ଠ ବୋଲିଂ ପ୍ରଦର୍ଶନ। ତାଙ୍କ ବ୍ୟତୀତ ଅକ୍ଷର ପଟେଲ ଓ କୁଲଦୀପ ଯାଦବ ୨ ଲେଖାଏ ନେଇଥିଲେ।
ସଂକ୍ଷିପ୍ତ ସ୍କୋର: ଦିଲ୍ଲୀ କ୍ୟାପିଟାଲ୍ସ: ୨୦ ଓଭରରେ ୧୫୯/୭(ମିଚେଲ ମାର୍ଶ-୬୩, ସର୍ଫରାଜ ଖାନ-୩୨, ଲଲିତ ଯାଦବ-୨୪, ଲିଆମ ଲିଭିଂଷ୍ଟୋନ-୩/୨୭, ଅର୍ଶଦୀପ ସିଂ-୩/୩୭)।
ପଞ୍ଜାବ କିଙ୍ଗ୍ସ: ୨୦ ଓଭରରେ ୧୪୨/୯(ଜିତେଶ ଶର୍ମା-୪୪, ଜନ୍ନି ବେଆରଷ୍ଟୋ-୨୮, ରାହୁଲ ଚହର-୨୫*, ଶାର୍ଦ୍ଦୂଳ ଠାକୁର-୪/୩୬, ଅକ୍ଷର ପଟେଲ-୨/୧୪, କୁଲଦୀପ ଯାଦବ-୨/୧୪)।