ରାଉରକେଲା ଅଫିସ,୨୦।୫: ରାଉରକେଲାସ୍ଥିତ ବିର୍ସା ମୁଣ୍ଡା ହକି ୨ଷ୍ଟାଡିୟମରେ ଚାଲିଥିବା ୧୩ତମ ହକି ଇଣ୍ଡିଆ ପୁରୁଷ ସବ୍ଜୁନିୟର ଜାତୀୟ ଚାମ୍ପିୟନଶିପ୍ ୨୦୨୩ରେ ଦିଲ୍ଲୀ ହକି, ହକି ଚଣ୍ଡିଗଡ଼ ଓ ହକି ଅରୁଣାଚଳ ସେମାନଙ୍କ ମ୍ୟାଚରେ ବିଜୟ ଲାଭ କରିଛନ୍ତି। ଶୁକ୍ରବାର ଖେଳାଯାଇଥିବା ପ୍ରଥମ ମ୍ୟାଚରେ ଦିଲ୍ଲୀ ହକି ୫-୨ ଗୋଲ୍ରେ ଆସାମ ହକିକୁ ପରାସ୍ତ କରିଛି। ବିଜୟୀ ଦଳ ପକ୍ଷରୁ ଆଫ୍ରିଦୀ (୮ମ,୧୧ତମ, ୨୬ତମ ଓ ୩୪ତମ) ବ୍ୟକ୍ତିଗତ ୪ଟି ଗୋଲ ସ୍କୋର କରିଥିବା ବେଳେ ଅନ୍ୟ ଗୋଲଟିକୁ ଆର୍ଯ୍ୟନ ଦେଇଥିଲେ। ପରାଜିତ ଆସାମ ହକି ଦଳ ତରଫରୁ ରିତି ପଟିର (୨୩ତମ) ଓ ରୋହତ ଯାଦବ (୪୦) ଗୋଟିଏ ଲେଖାଏଁ ଗୋଲ୍ ଦେଇଥିଲେ। ଦିନର ଦ୍ୱିତୀୟ ଗେମ୍ରେ ହକି ଚଣ୍ଡିଗଡ଼ ୧୯-୦ ଗୋଲରେ ହକି ରାଜସ୍ଥାନକୁ ହରାଇ ଦେଇଛି। ଏହି ଏକତରଫା ମ୍ୟାଚରେ ବିଜୟୀ ଦଳର ଗୁରଜିତ ସିଂ ୯ଟି ଗୋଲ୍ ସ୍କୋର କରିଥିବା ବେଳେ ପ୍ରଭଜୋତ ସିଂ ସଇନି ୩ଟି ଗୋଲ ସ୍କୋର କରିଛନ୍ତି। ପଙ୍କଜ ଶର୍ମା ଓ ଗୁରଜିତ ସିଂ ଦୁଇଟି ଲେଖାଏଁ ଏବଂ ସୁଖପ୍ରୀତ ସିଂ, ସୁଖମନପ୍ରୀତ ସିଂ ଏବଂ ସୁରଜ କୁମାର ସା’ ଗୋଟିଏ ଲେଖାଏଁ ଗୋଲ୍ ଦେଇଥିଲେ। ଶୁକ୍ରବାର ଅନୁଷ୍ଠିତ ତୃତୀୟ ମ୍ୟାଚରେ ହକି ଅରୁଣାଚଳ ୧୩-୦ ଗୋଲ୍ରେ ହକି ଗୁଜରାଟକୁ ପରାସ୍ତ କରିଛି।