ଜୟପୁର,୧।୯: ରାଜନୀତି ଯୋଗୁ ଦିନକୁ ଦିନ ବୃଦ୍ଧି ପାଉଥିବା ଚାପକୁ ଦୂର କରିବା ପାଇଁ ରାଜନେତାମାନେ ବିଭିନ୍ନ ପଦକ୍ଷେପ ନେଉଛନ୍ତି। କିଛି ନେତା ପରିବାର ସହିତ ଭ୍ରମଣରେ ଯାଉଛନ୍ତି ତ କିଛି ନେତା ଏଥିପାଇଁ ନିୟମିତ ଯୋଗ କରୁଛନ୍ତି। ଏବେ ଚାପରୁ ମୁକ୍ତି ପାଇଁ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଭିପାସନା କେନ୍ଦ୍ରର ଆଶ୍ରୟ ନେଇଛନ୍ତି। ଏଥିପାଇଁ କେଜ୍ରିୱାଲ ଦଶ ଦିନ ସକ୍ରିୟ ରାଜନୀତିରୁ ଛୁଟି ନେଇଛନ୍ତି। ଦିଲ୍ଲୀ ଠାରୁ ପ୍ରାୟ ତିନି ଶହ କିଲୋମିଟର ଦୂରରେ ଥିବା ଜୟପୁରର ଗାଲଟା ଉପତ୍ୟକାର ଧାମଥାଲି ଭିପାସାନା କେନ୍ଦ୍ରରେ ମନକୁ ନିୟନ୍ତ୍ରଣ କରିବା ଏବଂ ଆତ୍ମ ଅବଲୋକନ କରିବା ପାଇଁ କେଜ୍ରିଓ୍ବାଲ ଚେଷ୍ଟା କରୁଛନ୍ତି। କେଜ୍ରିଓ୍ବାଲ ଦୁଇ ଦିନ ପୂର୍ବରୁ ଜୟପୁରରେ ପହଞ୍ଚିଛନ୍ତି ଏବଂ ସେ ଏହି ଭିପାସାନା କେନ୍ଦ୍ରରେ ଚାଲିଥିବା ଦଶ ଦିନିଆ ଶିବିରରେ ଯୋଗ ଦେଉଛନ୍ତି। ଯଦିଓ କେଜ୍ରିଓ୍ବାଲ ଜଣେ ମୁଖ୍ୟମନ୍ତ୍ରୀ ହେତୁ ରାଜ୍ୟ ଅତିଥି ମାନ୍ୟତା ପାଇଛନ୍ତି, କିନ୍ତୁ ଭିପାସାନା କେନ୍ଦ୍ର ଭିତରେ କେଜ୍ରିଓ୍ବାଲଙ୍କ ସିଏମ ପ୍ରୋଟୋକଲ ଆଦୌ ପ୍ରଭାବଶାଳୀ ନୁହେଁ ଏବଂ ସେ ଏକ କୋଠରୀରେ ଏକୁଟିଆ ରହୁଛନ୍ତି।
ଉଲ୍ଲେଖଥାଉ କି, ଏହି ଦଶ ଦିନରେ କେଜ୍ରିଓ୍ବାଲ୍ଙ୍କ ନିତ୍ୟକର୍ମ କ’ଣ ହେବ ତାହା କହିବା କଷ୍ଟକର। ଏହି ଭିପାସାନା କେନ୍ଦ୍ରକୁ ସିଏମ କେଜ୍ରିଓ୍ବାଲ୍ଙ୍କ ଦ୍ୱିତୀୟ ଗସ୍ତ। ଏହାପୂର୍ବରୁ ପ୍ରାୟ ଅଢେଇ ବର୍ଷ ପୂର୍ବେ କେଜ୍ରିଓ୍ବାଲ୍ ତାଙ୍କର ଘନିଷ୍ଠ ସହଯୋଗୀ ତଥା ଦିଲ୍ଲୀର ଉପମୁଖ୍ୟମନ୍ତ୍ରୀ ମନୀଷ ସିସୋଦିଆଙ୍କ ସହ ଏହି ଭିପାସାନା କେନ୍ଦ୍ରରେ ଆଧ୍ୟାତ୍ମିକ ଅଭ୍ୟାସ କରିଥିଲେ। କେଜ୍ରିଓ୍ବାଲ୍ ଏହି ଭିପାସାନା କେନ୍ଦ୍ରରେ ଦଶ ଦିନ ରହିବେ।