ନୂଆଦିଲ୍ଲୀ,୨୧।୯: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିଓ୍ବାଲ ହ୍ବାଟସଆପ ଚ୍ୟାନେଲରେ ଯୋଡି ହୋଇଯାଇଛନ୍ତି। ହ୍ବାଟସ ଆପ ଚ୍ୟାନେଲରେ ଯୋଗଦେବାର କିଛି ଘଣ୍ଟା ମଧ୍ୟରେ ମୁଖ୍ୟମନ୍ତ୍ରୀଙ୍କର ୨୩ହଜାରରୁ ଅଧିକ ଫଲୋୟର୍ସ ହୋଇଯାଇଛନ୍ତି। ବର୍ତ୍ତମାନ ଦେଶର ଜନତା ହ୍ବାଟସ ଆପ ଚ୍ୟାନେଲ ମାଧ୍ୟମରେ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲଙ୍କ ସହ ସିଧାସଳଖ ଯୋଗାଯୋଗ କରିପାରିବେ। ସୋସିଆଲ ମିଡିଆରେ ସକ୍ରିୟ ରହିବା ଏବଂ ଜନସାଧାରଣଙ୍କ ସହ ସମ୍ପର୍କ ରଖିବା ଲକ୍ଷ୍ୟରେ ମୁଖ୍ୟମନ୍ତ୍ରୀ ହ୍ବାଟସ ଆପ ଚ୍ୟାନେଲରେ ଯୋଗ ଦେଇଛନ୍ତି। ହ୍ବାଟସ ଆପ ଚ୍ୟାନେଲରେ ଯୋଗଦାନ କରି ଖୁସି ବ୍ୟକ୍ତ କରି କେଜରିୱାଲ ଦିଲ୍ଲୀ ତଥା ଦେଶର ଲୋକଙ୍କୁ ଏଥିରେ ଯୋଗଦେବାକୁ ନିବେଦନ କରିଛନ୍ତି।
ଦିଲ୍ଲୀର ମୁଖ୍ୟମନ୍ତ୍ରୀ ମଧ୍ୟ ତାଙ୍କ ହ୍ବାଟସ ଆପ ଚ୍ୟାନେଲରେ ରାମେଶ୍ୱରର ତୀର୍ଥଯାତ୍ରା କରିଥିବା ଦିଲ୍ଲୀର ବରିଷ୍ଠ ନାଗରିକଙ୍କୁ ଭେଟିବାର କିଛି ଚିତ୍ର ସେୟାର କରିଛନ୍ତି। ଦିଲ୍ଲୀ ସରକାର ଏହି ବରିଷ୍ଠ ନାଗରିକଙ୍କୁ ନିଜ ଖର୍ଚ୍ଚରେ ତୀର୍ଥଯାତ୍ରା ପାଇଁ ପଠାଇଛନ୍ତି। ହ୍ବାଟସ ଆପ ଚ୍ୟାନେଲରେ ଯୋଗଦେବା ପରେ କେଜରିଓ୍ବାଲ କହିଛନ୍ତି ଯେ ଏହି ଚ୍ୟାନେଲ ମାଧ୍ୟମରେ ଆପଣଙ୍କ ସହ ଯୋଡି ହେବା ଅତ୍ୟନ୍ତ ଆନନ୍ଦଦାୟକ।