ନୂଆଦିଲ୍ଲୀ,୧୫।୪: ଦିଲ୍ଲୀ ବିଧାନସଭାରେ ୧୭ ଏପ୍ରିଲ(ସୋମବାର)କୁ ଦିନିକିଆ ବିଶେଷ ଅଧିବେଶନ ଡକାଯାଇଛି। ଏହି ବିଶେଷ ଅଧିବେଶନ ଦିଲ୍ଲୀ ସରକାରଙ୍କ ପକ୍ଷରୁ ଡକାଯାଇଛି। ମୁଖ୍ୟମନ୍ତ୍ରୀ ଅରବିନ୍ଦ କେଜରିଓ୍ବାଲଙ୍କୁ ସିବିଆଇ ପକ୍ଷରୁ ସମନ ମିଳିବା ପରେ ଏହି ବିଶେଷ ଅଧିବେଶନ ଡକାଯାଇଛି। ସୂଚନାଯୋଗ୍ୟ, ଆମ ଆଦମୀ ପାର୍ଟି(ଏଏପି)ର ସଂଯୋଜକ ତଥା ଦିଲ୍ଲୀର ମୁଖ୍ୟମନ୍ତ୍ରୀ ଅରବିନ୍ଦ କେଜରିଓ୍ବାଲଙ୍କୁ ୧୬ ଏପ୍ରିଲ ସକାଳ ୧୧ଟାରେ ହାଜର ହେବାକୁ ସିବିଆଇ ନୋଟିସ ଦେଇଛି। ଏହାର ଗୋଟିଏ ଦିନ ପରେ ଅର୍ଥାତ୍ ସୋମବାର ୧୭ ଏପ୍ରିଲରେ ଦିଲ୍ଲୀ ବିଧାନସଭାର ବିଶେଷ ଅଧିବେଶନ ଡକାଯାଇଛି। ମୁଖ୍ୟମନ୍ତ୍ରୀ କେଜରିଓ୍ବାଲଙ୍କୁ ସମନ ମିଳିବା ପରେ ଏବେ ଏହାକୁ ନେଇ ରାଜନୀତି ବି ସକ୍ରିୟ ହୋଇଯାଇଛି। ଏବେ ଏହାକୁ ନେଇ ଭାରତୀୟ ଜନତା ପାର୍ଟି(ଭାଜପା) ଓ ଏଏପି ମଧ୍ୟରେ କଥା କଟାକଟି ଜାରି ରହିଛି। ଉଭୟ ଦଳ ପକ୍ଷରୁ ଜଣେ ଜଣକ ଉପରେ ଅଭିଯୋଗ-ପ୍ରତିଅଭିଯୋଗ ଲଗାଇ ଚାଲିଛନ୍ତି।