ଦିଲ୍ଲୀକୁ ମିଳିପାରେ ଏସସି ମୁଖ୍ୟମନ୍ତ୍ରୀ, ରେସ୍ରେ ଆତିଶି, ଖୋଲିବ କୁଲଦୀପଙ୍କ ଭାଗ୍ୟ!
02 ନୂଆଦିଲ୍ଲୀ,୧୬।୯: ଏବେ ସବୁଠି ଗୋଟିଏ ପ୍ରଶ୍ନ ଉଙ୍କି ମାରୁଛି କିଏ ହେବେ ଦିଲ୍ଲୀର ମୁଖ୍ୟମନ୍ତ୍ରୀ। କୁହାଯାଉଛି ଅନୁସୂଚିତ ଜାତିରୁ ଦିଲ୍ଲୀ ଏହାର ପ୍ରଥମ ମୁଖ୍ୟମନ୍ତ୍ରୀ ପାଇପାରେ। ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲଙ୍କ ଇସ୍ତଫା ଘୋଷଣା ପରେ ଏଏପି ଏହି ସମ୍ପ୍ରଦାୟରୁ ଆସିଥିବା କୁଲଦୀପ କୁମାରଙ୍କ ଉପରେ ବାଜି ଲଗାଇପାରେ। ବିଶେଷଜ୍ଞମାନେ ବିଶ୍ୱାସ କରନ୍ତି ଯେ ଯଦି ଏଏପି ଏହି ରଣନୀତି ସହିତ ଆଗକୁ ବଢେ, ତେବେ ଏହା ଜାତୀୟ ସ୍ତରରେ ଏକ ବଡ ରାଜନୈତିକ ବାର୍ତ୍ତା ପଠାଇବ। ବିଶେଷକରି ହରିୟାଣା ଏବଂ ମହାରାଷ୍ଟ୍ରକୁ। ଏଥି ସହିତ, ଏହି ନିଷ୍ପତ୍ତି ଦିଲ୍ଲୀ ବିଧାନସଭା ନିର୍ବାଚନରେ ପ୍ରଭାବ ପକାଇବାର ସମ୍ଭାବନା ରହିଛି। ପାର୍ଟି ସୂତ୍ରରୁ ପ୍ରକାଶ ଯେ ବର୍ତ୍ତମାନର ମନ୍ତ୍ରୀ ଆତିଶି ଏବଂ ସୌରଭ ଭରଦ୍ବାଜ ମଧ୍ୟ ନୂତନ ମୁଖ୍ୟମନ୍ତ୍ରୀ ପାଇଁ ଦୌଡ଼ରେ ଅଛନ୍ତି। ଶୀର୍ଷ ନେତୃତ୍ୱ ତଥାପି ଏହାର ସମସ୍ତ ବିକଳ୍ପ ଖୋଲା ରଖିଛନ୍ତି। ପରବର୍ତ୍ତୀ ଦୁଇ ଦିନରେ ଏଏପି ସମ୍ଭାବ୍ୟ ବିକଳ୍ପଗୁଡ଼ିକ ମଧ୍ୟରୁ ସର୍ବୋତ୍ତମ ବାଛିବ।
ପାର୍ଟି ରଣନୀତିଜ୍ଞମାନେ ବିଶ୍ୱାସ କରନ୍ତି ଯେ ଦିଲ୍ଲୀ ଏବଂ ପଞ୍ଜାବ ପରେ ଅନ୍ୟ ରାଜ୍ୟଗୁଡ଼ିକରେ ନିଜର ସ୍ଥିତିକୁ ଦୃଢ କରିବା ଦିଗରେ ଜାତୀୟ ସ୍ତରର ଦଳ ଏଏପି ଯୋରସୋର କାର୍ଯ୍ୟ କରୁଛି। ବର୍ତ୍ତମାନ ହରିୟାଣା ବିଧାନସଭା ନିର୍ବାଚନକୁ ପ୍ରାଥମିକତା ଦିଆଯାଇଛି। ଏଥି ସହିତ ନଭେମ୍ବରରେ ମଧ୍ୟ ମହାରାଷ୍ଟ୍ରରେ ନିର୍ବାଚନ ଅନୁଷ୍ଠିତ ହେବ। ଉଭୟ ରାଜ୍ୟରେ ବହୁ ସଂଖ୍ୟକ ଅନୁସୂଚିତ ଜାତି ଭୋଟର ଅଛନ୍ତି। ହରିୟାଣାରେ, ଏହି ସମ୍ପ୍ରଦାୟର ୨୧ ପ୍ରତିଶତ ଭୋଟରଙ୍କ ସହିତ ୧୭ ଟି ସିଟ ସଂରକ୍ଷିତ ଅଛି। ଏଥି ସହିତ ମହାରାଷ୍ଟ୍ରରେ ସଂରକ୍ଷିତ ଆସନ ସଂଖ୍ୟା ୨୯ ଏବଂ ଏସସି ଭୋଟର ପ୍ରାୟ ୧୩ ପ୍ରତିଶତ। ଏଭଳି ସ୍ଥିତିରେ ଦିଲ୍ଲୀର ଏହି ସମ୍ପ୍ରଦାୟର ମୁଖ୍ୟମନ୍ତ୍ରୀ କରି ଦଳ ଦୃଢ ଭାବରେ ନିଜର ଆଭିମୁଖ୍ୟ ଉପସ୍ଥାପନ କରିବ। ଏଥି ସହିତ ଲୋକ ସଭା ନିର୍ବାଚନରେ ଦିଲ୍ଲୀର ସଂରକ୍ଷିତ ଆସନରେ ଖରାପ ପ୍ରଦର୍ଶନ କରିଥିବା ଏଏପି ଦିଲ୍ଲୀ ନର୍ବାଚନରେ ମଧ୍ୟ ଏଥିରୁ ଲାଭବାନ ହେବ।