ନୂଆଦିଲ୍ଲୀ,୮।୨: ଏମ୍ବିଏ ଛାତ୍ରଙ୍କ ଆତ୍ମହତ୍ୟା ଉଦ୍ୟମର ଦୁଇ ଦିନ ପରେ ତାଙ୍କୁ ଅପହରଣ ପରେ ବନ୍ଧୁକ ଦେଖାଇ ନ୍ୟୁଡ୍ ଭିଡିଓ ଶୁଟ୍ କରି ବ୍ଲାକମେଲ କରୁଥିବା ଅଭିଯୁକ୍ତଙ୍କୁ ଗିରଫ କରାଯାଇଛି। ଏହି ଘଟଣାରେ ସମ୍ପୃକ୍ତ ଥିବା ଅନ୍ୟ ଦୁଇ ଜଣ ଅଭିଯୁକ୍ତଙ୍କୁ ଧରିବା ଲାଗି ପ୍ରୟାସ ଚାଲିଥିବା ପୋଲିସ ଅଧିକାରୀ କହିଛନ୍ତି।
ଦକ୍ଷିଣ ଦିଲ୍ଲୀରେ ରହୁଥିବା ଛାତ୍ର ଫିନାଇଲ ପିଇ ଆତ୍ମହତ୍ୟା ଉଦ୍ୟମ କରିଥିଲେ। ସମୟ ଥାଉ ଥାଉ ପରିବାର ବର୍ଗ ତାଙ୍କୁ ହସ୍ପିଟାଲ ନେଇଯିବାରୁ ତାଙ୍କ ଜୀବନ ବଞ୍ଚି ପାରିଥିଲା। ତା’ ପରେ ଏକ ଭିଡିଓ ପାଇଁ ତାଙ୍କୁ ବ୍ଲାକମେଲ ଓ ଧମକ ଦିଆଯାଉଥିବା ଘଟଣା ସାମ୍ନାକୁ ଆସିଥିଲା।
୨୦୨୦ ଅକ୍ଟୋବର ୨୩ ତାରିଖରେ ୩ ଅଭିଯୁକ୍ତ ବନ୍ଧୁକ ଦେଖାଇ ତାଙ୍କୁ ଅପହରଣ କରି ନେଇଥିଲେ। ସେମାନେ ଗଞ୍ଜେଇ, ଚରସ ଓ ପିସ୍ତଲ ସହ ଭିଡିଓ କରିଥିଲେ। ପରେ ସେମାନେ ତାଙ୍କ ନାମରେ ମିଛ ମାମଲା ରୁଜୁ କରିବାକୁ ଧମକ ଦେଇଥିଲେ ଏବଂ ଏଥିଲାଗି ମାଗିଥିଲେ ୨୦ ଲକ୍ଷ ଟଙ୍କା।
ପୀଡ଼ିତ ପରିବାର ୫ ଲକ୍ଷ ଦେବା ପରେ ମଧ୍ୟ ଛାତ୍ରଙ୍କ ନ୍ୟୁଡ୍ ଭିଡିଓ ତାଙ୍କ ସମ୍ପର୍କୀୟ ଓ ସାଙ୍ଗମାନଙ୍କ ମଧ୍ୟରେ ଶେୟାର କରି ଦେଇଥିଲେ। ଗତ ୧ ତାରିଖରେ ବଳକା ଟଙ୍କା ନ ଦେଲେ ଛାତ୍ରଙ୍କୁ ହତ୍ୟା କରିବାକୁ ଧମକ ଦେଇଥିଲେ। ଛାତ୍ର ଜଣଙ୍କ ଏ ସମ୍ପର୍କରେ ପୋଲିସରେ ଅଭିଯୋଗ କରିଥିଲେ। କିନ୍ତୁ ପୋଲିସ କନଷ୍ଟେବଳ ଧମରମପାଲ ଛାତ୍ରଙ୍କୁ ଧମକାଇଥିଲେ। ଏଥିରେ ସେ ହତାଶ ହୋଇ ଫିନାଇଲ ପିଇ ଆତ୍ମହତ୍ୟା ଉଦ୍ୟମ କରିଥିଲେ।
ଏଭଳି ଘଟଣା ପରେ ପୋଲିସ ରବିବାର ଛାତ୍ରଙ୍କ ଅଭିଯୋଗ ରେଜିଷ୍ଟର କରିଥିଲା। ପୋଲିସ ମୁଖ୍ୟ ଅଭିଯୁକ୍ତଙ୍କୁ ପଚରାଉଚରା କରିବା ପରେ ତାଙ୍କୁ ଗିରଫ କରିଛି। ପୀଡ଼ିତ ଛାତ୍ରଙ୍କ ପରିବାର ସୋମବାର ପୋଲିସକୁ ଭେଟିଥିଲେ। ଉକ୍ତ କନଷ୍ଟେବଳଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ନିଆଯିବ ବୋଲି ଜଣେ ବରିଷ୍ଠ ପୋଲିସ ଅଧିକାରୀ ଆଶ୍ୱାସନା ଦେଇଛନ୍ତି।