ନୂଆଦିଲ୍ଲୀ,୨୭।୧୨: ବଢୁଥିବା ଥଣ୍ଡା ମଧ୍ୟରେ ଦିଲ୍ଲୀ ସମେତ ପୂରା ଏନ୍ସିଆରରେ ଘନ କୁହୁଡି ଯାତାୟାତ ଉପରେ ପ୍ରଭାବ ପକାଉଛି। ଯାନବାହାନରେ ଯାତ୍ରା କରୁଥିବା ଲୋକମାନେ ଏହି ସମୟରେ ବିଶେଷ ସମସ୍ୟାର ସମ୍ମୁଖୀନ ହେଉଛନ୍ତି। ଦିଲ୍ଲୀ-ନୋଏଡା ରାସ୍ତାରେ ବୁଧବାର ସକାଳେ ଘନ କୁହୁଡି ଦେଖାଯାଇଛି।
ଜାନୁୟାରୀ ପାଖେଇ ଆସୁଛି ଏବଂ ଡିସେମ୍ବର ପ୍ରାୟ ଶେଷ ହେବାକୁ ଯାଉଛି। ଏଭଳି ପରିସ୍ଥିତିରେ ଦିଲ୍ଲୀ-ଏନସିଆରରେ ଶୀତଲହର ଜାରି ରହିଛି। ଶୀତଦିନେ ଘନ କୁହୁଡି ଲୋକଙ୍କ ପାଇଁ ଅସୁବିଧାର କାରଣ ପାଲଟିଛି। ଏପରିକି କୁହୁଡି କାରଣରୁ ଦୁର୍ଘଟଣାର ଭୟ ମଧ୍ୟ ରହିଥାଏ। ଆଜି ଦିଲ୍ଲୀ-ଏନସିଆରର ଅଧିକାଂଶ ସ୍ଥାନରେ ଘନ କୁହୁଡି ଦେଖାଯାଇଛି। ଗୋଟିଏ ପଟେ ଶୀତ ହେତୁ ତାପମାତ୍ରା ହ୍ରାସ ପାଉଥିବା ବେଳେ ଅନ୍ୟ ପଟେ କମ ଦୃଶ୍ୟମାନତା ଯୋଗୁ ଫ୍ଲାଇଟ୍ ଏବଂ ଟ୍ରେନ ମଧ୍ୟ ବିଳମ୍ବ ହେଉଛି।
ବୁଧବାର ଦିଲ୍ଲୀ ବିମାନବନ୍ଦରରେ ୧୧୦ରୁ ଅଧିକ ବିମାନ ପ୍ରଭାବିତ ହୋଇଛି। ଏଥି ସହିତ ଉତ୍ତର ରେଲଓ୍ବେ କହିଛି ଯେ, ଦିଲ୍ଲୀ ଅଭିମୁଖେ ଯାଉଥିବା ୨୫ଟି ଟ୍ରେନ ବିଳମ୍ବରେ ଚାଲୁଛି। କହିରଖୁଛୁ ଯେ, ଶୀତଲହର ଜାରି ରହିଥିବାରୁ ଜାତୀୟ ରାଜଧାନୀରେ ଅତ୍ୟଧିକ ଘନ କୁହୁଡି ସମ୍ବନ୍ଧରେ ପାଣିପାଗ ବିଭାଗ ଏକ ରେଡ ଆଲର୍ଟ ଜାରି କରିଛି।