ନୂଆଦିଲ୍ଲୀ,୨୦।୧୦: ବର୍ତ୍ତମାନଠାରୁ ରାଜ୍ୟରେ ସର୍ବସାଧାରଣ ସ୍ଥାନରେ ମାସ୍କ ପିନ୍ଧିବା ଆଉ ବାଧ୍ୟତାମୂଳକ ନୁହେଁ। ଗୁରୁବାର ଦିଲ୍ଲୀ ବିପର୍ଯ୍ୟୟ ପରିଚାଳନା ପ୍ରାଧିକରଣ (ଡିଡିଏମ୍ଏ) ବାଧ୍ୟତାମୂଳକ ମାସ୍କ କଟକଣାକୁ ସେପ୍ଟେମ୍ବର ୩୦ରୁ ଆଉ ବୃଦ୍ଧି ନ କରିବାକୁ ନିଷ୍ପତ୍ତି ନେଇଛି। ଏଥିସହ ସେପ୍ଟେମ୍ବର ୩୦ ପରେ ମାସ୍କ ନ ପିନ୍ଧିଲେ ଆଉ ୫୦୦ ଟଙ୍କା ତଣ୍ଡ ଗଣିବାକୁ ପଡ଼ିବ ନାହିଁ ବୋଲି ଡିଡିଏମ୍ଏ ଏକ ନିର୍ଦ୍ଦେଶ ଜାରି କରିଛି। ଏନେଇ ଦିଲ୍ଲୀ ସ୍ବାସ୍ଥ୍ୟ ଏବଂ ପରିବାର କଲ୍ୟାଣ ବିଭାଗ ପକ୍ଷରୁ ସୂଚନା ଦିଆଯାଇଛି। ରାଜ୍ୟରେ କରୋନା ମାମଲାରେ ଲଗାତର ବ୍ୟାପକ ହ୍ରାସକୁ ଦୃଷ୍ଟିରେ ରଖି ଡିଡିଏମ୍ଏ ଏହି ନିଷ୍ପତ୍ତି ନେଇଛି। ନିକଟରେ କରୋନା ସମ୍ବନ୍ଧରେ ଡିଡିଏମ୍ଏ ଏକ ସମୀକ୍ଷା ବୈଠକ କରିଥିଲା। ଏହି ବୈଠକରେ ମାସ୍କ ନ ପିନ୍ଧିବାରୁ ଜରିମାନା ଆଦାୟ କରିବାର ବ୍ୟବସ୍ଥାକୁ ପ୍ରତ୍ୟାହାର କରାଯିବା ନେଇ ଆଲୋଚନା ହୋଇଥିଲା। ପୂର୍ବରୁ ସର୍ବସାଧାରଣ ସ୍ଥାନରେ ମାସ୍କ ନ ପିନ୍ଧିଲେ ଲୋକଙ୍କଠାରୁ ୫୦୦ଟଙ୍କା ଜରିମାନା ଆଦାୟ କରାଯାଉଥିଲା।
