ନୂଆଦିଲ୍ଲୀ,୧୩ ।୧୦: ଦିଲ୍ଲୀ ପୋଲିସ ଗୁରୁବାର ଆମ ଆଦମୀ ପାର୍ଟି(ଏଏପି) ଗୁଜରାଟର ଅଧ୍ୟକ୍ଷ ଗୋପାଳ ଇଟାଲିଆଙ୍କୁ ରାଷ୍ଟ୍ରୀୟ ମହିଳା ଆୟୋଗଙ୍କ କାର୍ଯ୍ୟାଳୟ ନିକଟରୁ ନେଇ ଅଟକ ରଖିଛି । ଗୋପାଳ ଇଟାଲିଆଙ୍କୁ ପୋଲିସ ତା’ ଜିପରେ ବସାଇ ନେଇ ଯାଇଥିବା ଦେଖାଯାଇଥିଲା । ଏହା ପୂର୍ବରୁ ଏଏପି କର୍ମୀମାନେ ଏନସିଡବ୍ଲୁ(ରାଷ୍ଟ୍ରୀୟ ମହିଳା ଆୟୋଗ)ର ଅଧ୍ୟକ୍ଷା ରେଖା ଶର୍ମାଙ୍କ କାର୍ଯ୍ୟାଳୟ ବାହାରେ ବିରୋଧ ପ୍ରଦର୍ଶନ କରୁଥିଲେ ।
ଏନସିଡବ୍ଲୁ ଗୁରୁବାର ଏକ ଭିଡିଓ ସମ୍ପର୍କରେ ଗୁଜରାଟ ଏଏପି ମୁଖ୍ୟ ଇଟାଲିଆଙ୍କୁ ଡକାଇଥିଲା । ଯେଉଁଥିରେ ସେ ପ୍ରଧାନମନ୍ତ୍ରୀ ମୋଦିଙ୍କ ସମ୍ପର୍କରେ ଅପମାନଜନକ ଶବ୍ଦ ବ୍ୟବହାର କରିଥିବା ଦେଖାଯାଇଥିଲା । ଏହି ସମ୍ପର୍କରେ ଜାତୀୟ ମହିଳା ଆୟୋଗର ଅଧ୍ୟକ୍ଷା ରେଖା ଶର୍ମା କହିଥିଲେ ଜବାବ ପ୍ରସ୍ତୁତ ହୋଇ ରହିଛି ।
ରେଖା ଶର୍ମା ଆହୁରି ମଧ୍ୟ କହିଛନ୍ତି, ଉକ୍ତ ଭିଡିଓରେ ସେ ତାଙ୍କ ଉପସ୍ଥିତିକୁ ଅସ୍ୱୀକାର କରି ଦେଇଛନ୍ତି । ହେଲେ ଏହାର ଜବାବରେ ସେ ଟୁଇଟ କରିଥିବା ସ୍ୱୀକାର କରିଛନ୍ତି । ସେ ଭିଡିଓରେ ନାହାନ୍ତି ବୋଲି ଦାବି କରିଛନ୍ତି । ତାଙ୍କର ବୟାନ ଓ ଲିଖିତ ବୟାନ ମେଳ ଖାଉନହିଁ । ସେ ଉପଯୁକ୍ତ ଜବାବ ଦେଉ ନାହାନ୍ତି ।
