ନୂଆଦିଲ୍ଲୀ,୨୧।୧୧: ବହୁ ଚର୍ଚ୍ଚିତ ଶ୍ରଦ୍ଧା ହତ୍ୟା ମାମଲା ଦିନକୁ ଦିନ ଭିନ୍ନ ମୋଡ଼ ନେଉଛି। ଏଭଳି ସ୍ଥିତିରେ ଅଭିଯୁକ୍ତ ଅଫ୍ତାବଙ୍କ ନାର୍କୋ ଟେଷ୍ଟ ପୂର୍ବରୁ ପଲିଗ୍ରାଫ୍ ଟେଷ୍ଟ କରିବାକୁ କୋର୍ଟ ମଞ୍ଜୁରୀ ପ୍ରଦାନ କରିଛନ୍ତି। ସୂଚନା ମୁତାବକ, ସୋମବାର ଦିଲ୍ଲୀ ପୋଲିସ ସାକେତ କୋର୍ଟରେ ଶ୍ରଦ୍ଧା ହତ୍ୟାକାଣ୍ଡ ମାମଲାର ଅଭିଯୁକ୍ତ ଅଫ୍ତାବଙ୍କ ପଲିଗ୍ରାଫ୍ ଟେଷ୍ଟ ପାଇଁ ଆବେଦନ କରିଥିଲା। ପଚରାଉଚରା ବେଳେ ଅଫ୍ତାବ କେତେକ ପ୍ରଶ୍ନର ବିଭ୍ରାନ୍ତିକର ଉତ୍ତର ଦେଉଥିବା ନେଇ ଉକ୍ତ ଆବେଦନରେ ଉଲ୍ଲେଖ କରାଯାଇଛି। ତେବେ ପୋଲିସର ଏହି ଆବେଦନକୁ କୋର୍ଟ ମଞ୍ଜୁରୀ ପ୍ରଦାନ କରିଛନ୍ତି। ଏହାପରେ ଅଫ୍ତାବଙ୍କ ନାର୍କୋ ଟେଷ୍ଟ ପୂର୍ବରୁ ହେବାକୁ ଥିବା ପଲିଗ୍ରାଫ୍ ଟେଷ୍ଟ ପାଇଁ ଏବେ ସମସ୍ତ ବାଟ ଫିଟିଯାଇଛି। ସୂଚନା ମୁତାବକ, ଦିଲ୍ଲୀ ପୋଲିସ ଏପର୍ଯ୍ୟନ୍ତ ଶ୍ରଦ୍ଧାଙ୍କ ପ୍ରାୟ ୧୩ଟି ହାଡ଼ ଓ ମୁହଁର କିଛି ଅଂଶ ପାଇଛି। ଏହି ସବୁର ଯାଞ୍ଚ ପାଇଁ ସିଏଫ୍ଏସ୍ଏଲ୍କୁ ପଠାଯାଇଛି। ଅଫ୍ତାବଙ୍କ ନାର୍କୋ ଓ ପଲିଗ୍ରାଫ୍ ଟେଷ୍ଟ ଏଫ୍ଏସ୍ଏଲ୍ରେ କରାଯିବ ବୋଲି ଜଣାପଡ଼ିଛି।