ନୂଆଦିଲ୍ଲୀ,୨୦।୧୧: ଶ୍ରଦ୍ଧା ୱାଲ୍କର ହତ୍ୟା ମାମଲାର ଯାଞ୍ଚ କରୁଥିବା ଦିଲ୍ଲୀ ପୋଲିସ ଅଭିଯୁକ୍ତ ଅଫ୍ତାବ ପୁନାୱାଲାଙ୍କୁ ପଚରାଉଚରା ବେଳେ କିଛି ଗୁରୁତ୍ୱପୂର୍ଣ୍ଣ ତଥ୍ୟ ହାସଲ କରିଛି। ରବିବାର ଦକ୍ଷିଣ ଦିଲ୍ଲୀର ମଇଦାନ ଗଢିରେ ଅବସ୍ଥିତ ଏକ ପୋଖରୀକୁ ପୋଲିସ ଶୁଖାଉଛି। ଅଫ୍ତାବ ଶ୍ରଦ୍ଧାଙ୍କ ମୁଣ୍ଡକୁ ଏହି ପୋଖରୀରେ ପକାଇ ଦେଇଥିବା କୁହାଯାଉଛି। ମ୍ୟୁନିସିପାଲିଟି କର୍ପୋରେସନ ଟିମ ଘଟଣାସ୍ଥଳରେ ପହଞ୍ଚି ପୋଖରୀର ଜଳ ନିଷ୍କାସନ ପ୍ରକ୍ରିୟାରେ ନିୟୋଜିତ ଅଛନ୍ତି।
ଏହାପୂର୍ବରୁ ମେହରୁଲି ଜଙ୍ଗଲରେ ପୋଲିସର ସର୍ଚ୍ଚ ଅପରେଶନ୍ ଜାରି ରଖିଥିଲା। ଜଙ୍ଗଲରୁ ମିଳିଥିବା ଏକ ଏକ ଲମ୍ବା ହାଡ଼, ଯାହା ଶ୍ରଦ୍ଧାଙ୍କ ଜଙ୍ଘର ହାଡ଼ ବା ଫେରମ ବୋନ୍ ହୋଇଥିବା ପୋଲିସ କହିଛି। ଛତରପୁର ଅଞ୍ଚଳକୁ ଲାଗିଥିବା ମେହରୁଲି ଜଙ୍ଗଲରୁ ହାତ ହାଡ଼, ପାଟେଲା (ନି କ୍ୟାପ୍) ପୋଲିସ ଜବତ କରିଛି। ମିଳିଥିବା ହାଡ଼ରେ କଟା ଦାଗ ଦେଖିବାକୁ ମିଳିଛି, ଯାହାକୁ ଏକ ବଡ଼ ଧାରୁଆ ଅସ୍ତ୍ରରେ ଖଣ୍ଡ ଖଣ୍ଡ କରାଯାଇଥିବା ପୋଲିସ ସନ୍ଦେହ କରୁଛି। ହାଡ଼ ସବୁ ଶ୍ରଦ୍ଧାଙ୍କ କି ନୁହେଁ ତାହା ଏ ପର୍ଯ୍ୟନ୍ତ ସ୍ପଷ୍ଟ ହୋଇ ନ ଥିବାବେଳେ ଫୋରେନ୍ସିକ୍ ଟେଷ୍ଟ ପରେ ହାଡ଼ର ଚିହ୍ନଟ ସମ୍ଭବ ବୋଲି ପୋଲିସ ଉଚ୍ଚାଧିକାରୀ କହିଛନ୍ତି।