ନୂଆଦିଲ୍ଲୀ,୨୯।୯: ଦିଲ୍ଲୀ ପୋଲିସର ଜଣେ ସବ ଇନ୍ସପେକ୍ଟର ଏବେ ହତ୍ୟାକାରୀ ପାଲଟିଛି। ଅବୈଧ ସମ୍ପର୍କ ଜାଲରେ ପଡ଼ିଥିବା ସବ-ଇନ୍ସପେକ୍ଟର ସନ୍ଦୀପ ଦାହିଆ ପ୍ରଥମେ ତାଙ୍କ ପ୍ରେମିକାଙ୍କୁ ଦିଲ୍ଲୀରେ ଗୁଳି ମାରିଥିଲେ ଏବଂ ପରେ ବାପଘଷର ରହୁଥିବା ସ୍ତ୍ରୀଙ୍କୁ ହତ୍ୟା କରିବା ପାଇଁ ରୋହତକରେ ପହଞ୍ଚିଥିଲେ। ସେଠାରେ ସ୍ତ୍ରୀଙ୍କ ନ ପାଇବାରୁ ଶ୍ୱଶୁରଙ୍କୁ ଗୁଳି ମାରି ହତ୍ୟା କରିଥିଲେ। ଅଭିଯୁକ୍ତ ସବ-ଇନ୍ସପେକ୍ଟରଙ୍କ ଖୋଜିବା ପୋଲିସ ଅନେକ ସ୍ଥାନରେ ଚଢାଉ କରୁଛି।
ପ୍ରେମ, ଝଗଡା ଏବଂ ଅବୈଧ ସମ୍ପର୍କ ସେପ୍ଟେମ୍ବର ୨୭ରେ ରକ୍ତାକ୍ତ ମୋଡ଼ ନେଇଥିଲା। ସେଦିନ ଦିଲ୍ଲୀର ଆଲିପୁର ଅଞ୍ଚଳରେ ଦିଲ୍ଲୀ ପୋଲିସର ଏସଆଇ ସନ୍ଦୀପ ଦାହିଆ ତାଙ୍କ ପ୍ରେମିକାଙ୍କୁ ଗୁଳି କରି ଗୁରୁତର ଆହତ କରିଥିଲେ। ଏହି ଆକ୍ରମଣ ପରେ ରାଜପଥରେ ଥିବା ସାଇ ବାବା ମନ୍ଦିର ନିକଟରେ ଯୁବତୀ ଜଣଙ୍କ ରକ୍ତ ଜୁଡୁବୁଡୁ ଅବସ୍ଥାରେ ପଡ଼ିଥିବାର ଦେଖିବାକୁ ମିଳିଥିଲା। ଘଟଣାସ୍ଥଳ ଦେଇ ଯାଉଥିବା ଦିଲ୍ଲୀ ପୋଲିସର ଜଣେ ଅଧିକାରୀ ଦେଖି ତାଙ୍କୁ ଶାଲିମାର ବାଗ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ଯୁବତୀ ଜଣକ କହିଥିଲେ ଯେ, ସନ୍ଦୀପ ଦାହିଆ ତାଙ୍କ ଉପରେ ଆକ୍ରମଣ କରିଛନ୍ତି। ସନ୍ଦୀପ ଦହିୟା ହେଉଛନ୍ତି ୨୦୧୦ ବ୍ୟାଚର ଏସ୍ଆଇ। ସନ୍ଦୀପଙ୍କ ଲାହୋରୀ ଗେଟ ପୋଲିସ ଷ୍ଟେସନରେ ପୋଷ୍ଟିଂ କରାଯାଇଛି। ଘରଣାଦିନ ସନ୍ଦୀପ ସରକାରୀ ପିସ୍ତଲ ସହିତ ଡ୍ୟୁଟିରେ ଅନୁପସ୍ଥିତ ଥିଲେ। କୁହାଯାଉଛି ଯେ ସନ୍ଦୀପ ତାଙ୍କ ସ୍ତ୍ରୀଙ୍କଠାରୁ ଛାଡପତ୍ର ନେବା ପାଇଁ ଚାହୁଁଛନ୍ତି। ଏବେ ମାମଲା କୋର୍ଟରେ ଚାଲିଛି। ଏକ ବର୍ଷ ପୂର୍ବେ ସନ୍ଦୀପ ଏକ ଘରୋଇ କମ୍ପାନୀରେ କାମ କରୁଥିବା ଅର୍ଚ୍ଚନାଙ୍କୁ ଭେଟିଥିଲେ। ଦୁହେଁ ଘଟଣାଦିନ ବୁଲିବାକୁ ଯାଉଥିଲେ ଏବଂ ଏହି ସମୟରେ ଝଗଡା ଲାଗିଥିଲା। ଏହି କାରଣରୁ ସନ୍ଦୀପ ଯୁବତୀଙ୍କୁ ଗୁଳି ମାରିଥିଲେ।
