ନୂଆଦିଲ୍ଲୀ, ୨୮।୧୧: ରାଜଧାନୀ ଦିଲ୍ଲୀର ବହୁଚର୍ଚ୍ଚିତ ଶ୍ରଦ୍ଧା ଓ୍ବାଲକର ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ଆଫତାବ ପୁନାଓ୍ବାଲାଙ୍କୁ ଆକ୍ରମଣ କରିବାକୁ ଉଦ୍ୟମ କରାଯାଇଛି। ସୋମବାର ସନ୍ଧ୍ୟାରେ ପୋଲିସ ଭ୍ୟାନ୍ରେ ଆଫତାବଙ୍କୁ ଫୋରେନ୍ସିକ ସାଇନ୍ସ ଲାବରେଟୋରୀରୁ ଜେଲ ଅଭିମୁଖେ ନେଇ ଯାଉଥିବା ବେଳେ ଗୋଟିଏ କାର୍ରେ ୫ ଯୁବକ ଆସି ପୋଲିସ ଭ୍ୟାନ୍ ଆଗରେ ଗାଡ଼ି ରଖିଥିଲେ। ଜଣେ ଜଣେ ଯୁବକ ହାତରେ ଖଣ୍ଡା ଧରି ଭ୍ୟାନ୍ ଆଡକୁ ମାଡ଼ିଆସିଥିଲେ। ଏବଂ ଭ୍ୟାନ୍ ଉପରକୁ ଆକ୍ରମଣ କରିଥିଲେ। ସମ୍ପୃକ୍ତ ଯୁବକ ତାଙ୍କୁ ଆଘାତ ଦେବା ଉଦ୍ଦେଶ୍ୟରେ ଏପରି କରିଥିବା ଜଣାପଡ଼ିଛି। ତେବେ ଭ୍ୟାନ୍ରେ ଥିବା ପୋଲିସ ଯୁବକଙ୍କୁ କାବୁ କରିବା ସହ ଆଫତାବ ସୁରକ୍ଷିତ ଥିବା କହିଛନ୍ତି। ଉକ୍ତ ଘଟଣାରେ ସମ୍ପୃକ୍ତ ଯୁବକଙ୍କ ମଧ୍ୟରୁ ୨ ଜଣଙ୍କୁ ପୋଲିସ ଅଟକ ରଖିଛି। ସମ୍ପୃକ୍ତ ଯୁବକମାନେ ହିନ୍ଦୁ ସେନା ସଂଗଠନର ହୋଇଥିବା ଜଣାପଡ଼ିଛି। ସଂଗଠନର ଜାତୀୟ ସଭାପତି ବିଷ୍ଣୁ ଗୁପ୍ତା କହିଛନ୍ତି, ଆଫତାବ ଯେଉଁଭଳି ଭାବେ ହିନ୍ଦୁ ଯୁବତୀ ଶ୍ରଦ୍ଧାଙ୍କୁ ହତ୍ୟା କରି ୩୫ଖଣ୍ଡ କରି ଫୋପାଡ଼ିବା ଘଟଣା ଦେଶବାସୀଙ୍କୁ ମର୍ମାହତ କରିଛି। ଯେଉଁପରି ଭାବେ ଶ୍ରଦ୍ଧାଙ୍କୁ ଆଫତାବ ହତ୍ୟା କରିଛି ସେଭଳି ଆଫତାବଙ୍କୁ ୭୦ଖଣ୍ଡ କରି ହତ୍ୟା କରାଯିବ ବୋଲି ଆକ୍ରମଣକାରୀ କହିଛନ୍ତି। ଅନ୍ୟପଟେ ଶ୍ରଦ୍ଧାଙ୍କ ମୃତଦେହକୁ କାଟିବାରେ ବ୍ୟବହାର କରାଯାଇଥିବା ଛୁରି ପୋଲିସକୁ ମିଳିଛି।