ନୂଆଦିଲ୍ଲୀ,୨୯।୪ : ଫୋନ ପାସଓ୍ବାର୍ଡ ଦେବାକୁ ମନା କରି ଦେବାରୁ ଜଣେ ଦ୍ୱାଦଶ ଶ୍ରେଣୀର ଛାତ୍ରଙ୍କୁ ପାର୍କରେ ବେକ ଚିପି ହତ୍ୟା କରିଛି ସାଙ୍ଗ। ଦିଲ୍ଲୀର ପିତମପୁରା ଅଞ୍ଚଳରୁ ସାମ୍ନାକୁ ଆସିଛି ଏଭଳି ଘଟଣା। ଏହି ଘଟଣା ଗତ ୨୧ ତାରିଖରେ ଘଟିଥିଲା। ଅଭିଯୁକ୍ତ ମୟଙ୍କ ସିଂ ଜଣେ ବିବିଏ ଛାତ୍ର। ତାଙ୍କୁ ସୋମବାର ଉତ୍ତରପ୍ରଦେଶରୁ ଗିରଫ କରାଯାଇଥିବା ପୋଲିସ ପକ୍ଷରୁ କୁହାଯାଇଛି।
ମୃତ ନାବାଳକ ୨୧ ତାରିଖ ଦିନ ବାହରକୁ ଯିବା ପରେ ଘରକୁ ନ ଫେରିବାରୁ ତାଙ୍କ ବାପା ନିଖୋଜ ଅଭିଯୋଗ କରିଥିଲେ। ପୋଲିସକୁ ରବିବାର ଦିଲ୍ଲୀର ପିତମପୁରା ପାର୍କରୁ ମିଳିଥିଲା ଉକ୍ତ ନାବାଳକଙ୍କ ଗଳିତ ମୃତଦେହ। ଘଟଣା ସ୍ଥଳରୁ ବଡ଼ ଟେଡି ବିୟର ସହ ଡ୍ରାଗ୍ସ ମଧ୍ୟ ଜବତ କରାଯାଇଥିବା ବରିଷ୍ଠ ପୋଲିସ ଅଧିକାରୀ କହିଛନ୍ତି।
ଅଭିଯୁକ୍ତ ମୟଙ୍କ ୨୩ ତାରିଖରୁ ନିଖୋଜ ଥିଲେ। ତାଙ୍କୁ ୟୁପିର ପିଲଖୁଓ୍ବା ଅଞ୍ଚଳରୁ ଗିରଫ କରାଯିବା ପରେ ମୃତକକୁ ପାର୍କରେ ଭେଟିଥିବା ସ୍ବୀକାର କରିଥିଲା। ମୟଙ୍କ ମୃତକଙ୍କୁ ଫୋନର ପାସଓ୍ବାର୍ଡ ମାଗିଥିଲେ। ମାତ୍ର ସେ ମନା କରିବାରୁ ପ୍ରଥମେ ପଥରରେ ଆକ୍ରମଣ କରିଥିଲେ। ଏହାପରେ ଏକ କପଡ଼ାରେ ବେକ ଚିପି ହତ୍ୟା କରିଥିବା ଅଭିଯୁକ୍ତ ପୋଲିସ ଆଗରେ ସ୍ବୀକାର କରିଛନ୍ତି।