କୋରାପୁଟ,୧୧ା୧୦(ଅମିତାଭ ବେହେରା): କୋରାପୁଟ ଜିଲାର ଆଦିମ ଅଧିବାସୀମାନେ ବ୍ୟବହାର କରୁଥିବା ଜଙ୍ଗଲୀ କନ୍ଦାରୁ ଗୁଣାତ୍ମକ ଓ ସୁସ୍ବାଦ କୁକିଜ୍ (ବିସ୍କୁଟ) ଓ ନମ୍କିନ୍ ହୋଇପାରିବ ବୋଲି କହିଛନ୍ତି କେନ୍ଦ୍ରୀୟ ବିଶ୍ୱବିଦ୍ୟାଳୟର ଜୈବ ବିବିଧତା ଓ ପ୍ରାକୃତିକ ସମ୍ପଦ ସଂରକ୍ଷଣ ବିଭାଗ ସହାୟକ ପ୍ରଫେସର ଡ.ଦେବବ୍ରତ ପଣ୍ଡା। ସେ ଦୀର୍ଘ ୧୦ ବର୍ଷ ଧରି କୋରାପୁଟ ମାଳଭୂମିର ଆଦିବାସୀମାନେ ବ୍ୟବହାର କରୁଥିବା ବିଭିନ୍ନ କନ୍ଦାକୁ ନେଇ ଗବେଷଣା କରୁଥିଲେ। ଆଦିବାସୀମାନେ ପ୍ରାୟ ୮ ପ୍ରକାର ଜଙ୍ଗଲୀ କନ୍ଦା ଯଥା କଷା କନ୍ଦା, ପିଟ୍ କନ୍ଦା, ଶିକା କନ୍ଦା, କୁଳିଆ କନ୍ଦା, ଚେରେଙ୍ଗା କନ୍ଦା, ସୋରନ୍ଦା କନ୍ଦା, ତାରଗାଈ କନ୍ଦା ଏବଂ ପିତାକନ୍ଦାକୁ ଖାଦ୍ୟ ଓ ଔଷଧ ରୂପେ ବ୍ୟବହାର କରୁଛନ୍ତି ବୋଲି ଡ. ପଣ୍ଡା କହିଛନ୍ତି। ଏଥିରୁ ଦୁଇଟି କନ୍ଦା କଷା କନ୍ଦା ଓ ସୋରନ୍ଦା କନ୍ଦାରୁ ସୁସ୍ବାଦ କୁକିଜ୍ ବିସ୍କୁଟ ଓ ନମ୍କିନ୍ ପ୍ରସ୍ତୁତ ହୋଇପାରିବ। ଏହା ଅଧିକ ପୋଷାକଯୁକ୍ତ ଓ ପୁଷ୍ଟିକର ବୋଲି ସେ ଦର୍ଶାଇଛନ୍ତି। ଏଥିରେ ଅଧିକ ପରିମାଣରେ ପ୍ରୋଟିନ, ଫାଇବର, ଆଣ୍ଟିଅକ୍ସିଡାଣ୍ଟ ଓ ଭିଟାମିନ ରହିଛି। ଏ ସମ୍ପର୍କରେ ଫୁଡ୍ ଆଣ୍ଡ ହୁମାନିଟି ଜର୍ନାଲରେ ପ୍ରକାଶିତ ତାଙ୍କ ରିସର୍ଚ୍ଚ ସ୍କଲାର ଡ. ବନ୍ଦନା ପଧାନ, ମୋନାଲି ନନ୍ଦ, ଅନ୍ତର୍ଯାମୀ ସାହୁ ଓ ଡ.ଜୟନ୍ତ ନାୟକଙ୍କ ସହ ମିଶି ପ୍ରକାଶ କରିଛନ୍ତି। ଏହାର ଅଧିକ ପ୍ରଚାରପ୍ରସାର ଓ ବ୍ୟବହାର ଉପରେ ଧ୍ୟାନଦେବାକୁ ପଣ୍ଡା ଗୁରୁତ୍ୱାରୋପ କରିଛନ୍ତି। କୋରାପୁଟର କଫି,କଳାଜିରା ଧାନ, ମାଣ୍ଡିଆ ଭଳି ଏହି ଜଙ୍ଗଲୀ କନ୍ଦାର କୁକିଜ୍ ବିସ୍କୁଟ ଓ ନମ୍କିନ ପ୍ରଚାରପ୍ରସାର ହୋଇପାରିଲେ ଏହା କୋରାପୁଟକୁ ଏକ ସ୍ବତନ୍ତ୍ର ପରିଚୟ ଦେବ ବୋଲି ସେ ଆଶା ପ୍ରକାଶ କରିଛନ୍ତି।
