ଭୁବନେଶ୍ୱର,୨୨ା୮(ବ୍ୟୁରୋ): ବ୍ରହ୍ମପୁର ସର୍କଲ ଜେଲ ଅଧୀକ୍ଷକ (ସୁପରିଣ୍ଟେଣ୍ଡେଣ୍ଟ) ନିଜ କର୍ତ୍ତବ୍ୟରେ ଅବହେଳା କରିଥିବା ଅଭିଯୋଗ ହୋଇଛି। ତେଣୁ ତାଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ନେବାକୁ କେରଳ ହାଇକୋର୍ଟ ରେଜିଷ୍ଟ୍ରାର ଜେନେରାଲ ଓଡ଼ିଶା ପୋଲିସ ଡିଜିଙ୍କୁ ଚିଠି ଲେଖିଛନ୍ତି। ଚିଠି ପାଇବା ପରେ ଗତ ୧୯ତାରିଖରେ କ୍ରାଇମ୍ବ୍ରାଞ୍ଚ ଜେଲ ମହାନିର୍ଦ୍ଦେଶକଙ୍କୁ ଅଧୀକ୍ଷକଙ୍କ ବିରୋଧରେ ଉପଯୁକ୍ତ କାର୍ଯ୍ୟାନୁଷ୍ଠାନ ନେବାକୁ କହିଛି।
ସୂଚନାଅନୁଯାୟୀ, କେରଳ ମାଠିଲାକମ୍ ଥାନା ଅଞ୍ଚଳରେ ଶ୍ରମିକ ଭାବେ କାମ କରୁଥିବା ଗଞ୍ଜାମ ଜିଲା ଗଙ୍ଗପୁର ଥାନା ଅନ୍ତର୍ଗତ ଜାହାଡ଼ା ଗ୍ରାମର ତୁଫାନ୍ ମଲ୍ଲିକ ତାଙ୍କ ୩ ସହଯୋଗୀଙ୍କ ସହ ମିଶି ୨୦୧୯ରେ ସେଠାକାର ଜଣେ ୨୪ ବର୍ଷୀୟ ଯୁବକଙ୍କୁ ହତ୍ୟା କରିଥିଲେ। ଏନେଇ ସ୍ଥାନୀୟ ପୋଲିସ ଏକ ମାମଲା (ନଂ.୫୮୩/୨୦୧୯) ରୁଜୁ କରି ତୁଫାନ୍ଙ୍କ ସମେତ ଅନ୍ୟ ଅଭିଯୁକ୍ତଙ୍କୁ ଗିରଫ କରି ଜେଲ ପଠାଇଥିଲା। ତେବେ ୨୦୨୧ ମାର୍ଚ୍ଚ ୧୮ରେ ତୁଫାନ୍ଙ୍କୁ ଜାମିନ ମିଳିଥିଲା। କୋର୍ଟଙ୍କ ବିନା ଅନୁମତିରେ ତୁଫାନ କେରଳ ଛାଡ଼ିବେ ନାହିଁ ଏବଂ ଆବଶ୍ୟକ ସମୟରେ ପୋଲିସ ନିକଟରେ ହାଜର ହେବାକୁ ଜାମିନରେ ସର୍ତ୍ତ ରହିଥିଲା। ତେବେ ତୁଫାନ ଏହାକୁ ଅବଜ୍ଞା କରି ଓଡ଼ିଶା ଚାଲି ଆସିଥିଲେ। ପରେ ଜଣେ ନାବାଳିକାଙ୍କୁ ଯୌନ ଉତ୍ପୀଡ଼ନ ଦେବା ଅଭିଯୋଗରେ ପୋକ୍ସ ଆଇନର ଦଫା ୮ରେ ଗଞ୍ଜାମ ପୋଲିସ ତୁଫାନଙ୍କୁ ଗିରଫ କରିଥିଲା। ତାଙ୍କୁ ୨୦୨୧ ଜୁନ ୫ରେ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଥିଲ। ଅନ୍ୟପକ୍ଷେ କେରଳ ଇରିଞ୍ଜଲାକୁଡ଼ା କୋର୍ଟ ବ୍ରହ୍ମପୁର ସର୍କଲ୍ ଜେଲ କର୍ତ୍ତୃପକ୍ଷଙ୍କ ନିକଟକୁ ଅଭିଯୁକ୍ତ ତୁଫାନଙ୍କ ବିରୋଧରେ ୨୦୨୨ ଫେବୃୟାରୀ ୨୩ରେ ଏକ ୱାରେଣ୍ଟ ପଠାଇଥିଲେ। ଜେଲ କର୍ତ୍ତୃପକ୍ଷ ୱାରେଣ୍ଟ ପାଇବା ପରେ କୌଣସି ପଦକ୍ଷେପ ଗ୍ରହଣ କରି ନ ଥିଲେ। ଏହାପରେ ଅସଦାଚରଣ ମାମଲାରେ ତୁଫାନ ଜାମିନ ପାଇ ଏପ୍ରିଲ ୫ରେ ଜେଲରୁ ବାହାରିଥିଲେ। ହେଲେ ତୁଫାନ୍ ଜାମିନରେ ଆସିବା ପୂର୍ବରୁ ତାଙ୍କ ବିରୋଧରେ କେରଳ କୋର୍ଟଙ୍କ ୱାରେଣ୍ଟ ଆସିଥିଲେ ମଧ୍ୟ ଏନେଇ ଜେଲ କର୍ତ୍ତୃପକ୍ଷ କୌଣସି ପଦକ୍ଷେପ ନ ନେଇଥିବା ସମ୍ପର୍କରେ ଇରିଞ୍ଜଲାକୁଡ଼ା କୋର୍ଟ କେରଳ ହାଇକୋର୍ଟଙ୍କୁ ଅବଗତ କରିଥିଲେ।