ନୂଆଦିଲ୍ଲୀ,୪।୨: ଆମେରିକୀୟ ଶର୍ଟ ସେଲର ହିଣ୍ଡେନ୍ବର୍ଗ ରିସର୍ଚ୍ଚ ଜାନୁୟାରୀ ୨୪ରେ ଆଦାନୀ ସମୂହ ବିରୋଧରେ ଷ୍ଟକ୍ସ ଓ ଆକାଉଣ୍ଟସ୍ ହେରଫେର ଅଭିଯୋଗ ଆଣିବା ପରଠୁ ବିଶିଷ୍ଟ ଶିଳ୍ପପତି ଗୌତମ ଆଦାନୀ ୧୨୦ ବିଲିୟନ୍ରୁ ଊର୍ଦ୍ଧ୍ୱ ଡଲାର କ୍ଷତି ସହିଲେଣି। ଆଦାନୀ ଗ୍ରୁପ୍ ଅଧୀନ ୧୦ କମ୍ପାନୀ ସମେତ ଅନ୍ୟ ବିଜ୍ନେସ୍ ହାଉସ୍ଗୁଡ଼ିକର ଶେୟାର ମୂଲ୍ୟ ମଧ୍ୟ ଖସିଛି। ଗତ ୭ ଟ୍ରେଡିଂ ସେସନରେ ଆଦାନୀ ଏଣ୍ଟରପ୍ରାଇଜେସ୍ ଶେୟାର ୬୬% ତଳକୁ ଖସିଛି। ଏହି କୃତ୍ରିମ କ୍ରାଶ୍ ପାଇଁ ହିଣ୍ଡେନ୍ବର୍ଗ ମାଲିକ ନାଥନ୍ ଆଣ୍ଡର୍ସନଙ୍କୁ ଦାୟୀ କରି ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବା ପାଇଁ ସୁପ୍ରିମକୋର୍ଟରେ ଏକ ପିଟିଶନ ଦାଖଲ ହୋଇଛି।
ପୁଞ୍ଜିବଜାରରେ ଶର୍ଟ ସେଲିଂ ପାଇଁ ଷ୍ଟକ୍ସ କିଣିବାକୁ ପଡ଼ି ନ ଥାଏ। ଧାରରେ ଶେୟାର ନେଇ ବିକ୍ରି କରାଯାଇଥାଏ। ପରବର୍ତ୍ତୀ ସମୟରେ ଷ୍ଟକ୍ସ ମୂଲ୍ୟ ହ୍ରାସ ପାଇଲେ ତାକୁ କମ୍ ଅର୍ଥରେ କିଣିବା ଦ୍ୱାରା ଭଲ ମିଳେ। ହିଣ୍ଡେନ୍ବଗ୍ ଗୋଷ୍ଠୀ ଗବେଷଣା କରି ରାତାରାତି କମ୍ପାନୀଗୁଡ଼ିକର ବଜାର ମୂଲ୍ୟକୁ ତଳକୁ ଟାଣିନେଇଥାଏ। ଏହା ଏକ ମଣିଷକୃତ ବିପର୍ଯ୍ୟୟ ବୋଲି ସୁପ୍ରିମକୋର୍ଟରେ ଆଇନଜୀବୀ ଏମ୍.ଏଲ୍. ଶର୍ମା ଏକ ଜନସ୍ବାର୍ଥ ମାମଲା (ପିଆଇଏଲ୍) ଦାଖଲ କରିଛନ୍ତି। ଶର୍ଟ ସେଲିଂକୁ ନିବେଶକମାନଙ୍କ ବିରୋଧରେ ଏକ ଅପରାଧ ରୂପେ ବିବେଚନା କରାଯାଉ। ଶର୍ଟ ସେଲରଙ୍କ ବିରୋଧରେ ଭାରତୀୟ ପିଙ୍ଗଳ କୋଡ୍ (ଆଇପିସି) ଦଫା ୪୨୦ (ଠକେଇ) ଏବଂ ଭାରତୀୟ ପ୍ରତିଭୂତି ବିନିମୟ ବୋର୍ଡ (ସେବି) ଆଇନ ବଳରେ ମାମଲା ରୁଜୁ ନିମନ୍ତେ ଶୀର୍ଷ ଅଦାଲତ ନିର୍ଦ୍ଦେଶ ଦିଅନ୍ତୁ ବୋଲି ଶର୍ମା ନିବେଦନ କରିଛନ୍ତି। ଭାରତୀୟ ନାଗରିକଙ୍କ ସ୍ବାର୍ଥ ଦୃଷ୍ଟିରୁ ଶର୍ଟ ସେଲରଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବା ଜରୁରୀ ବୋଲି ସେ ନିଜ ପିଟିଶନରେ ଉଲ୍ଲେଖ କରିଛନ୍ତି।
ଆଦାନୀଙ୍କ ଉପରୁ ନିବେଶକମାନଙ୍କ ଆସ୍ଥା ତୁଟିବା ଏକ ଜାତୀୟ ପ୍ରସଙ୍ଗ ପାଲଟିଗଲାଣି। ବିରୋଧୀ ଦଳଗୁଡ଼ିକ ଏହା ଉପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଜବାବ ମାଗୁଛନ୍ତି। ଯୁଗ୍ମ ସଂସଦୀୟ କମିଟି (ଜେପିସି) କିମ୍ବା ସୁପ୍ରିମକୋର୍ଟ ଦ୍ୱାରା ନିଯୁକ୍ତ ପ୍ୟାନେଲ ଜରିଆରେ ଏହି ଅନିୟମିତତାର ତଦନ୍ତ ଦାବିରେ କଂଗ୍ରେସ ସମେତ ୯ ବିରୋଧୀ ଦଳ ପାର୍ଲାମେଣ୍ଟରେ ହଟ୍ଟଗୋଳ କରୁଛନ୍ତି। ଶୁକ୍ରବାର ବଜେଟ ଅଧିବେଶନର ଚତୁର୍ଥ ଦିନରେ ବିରୋଧୀଙ୍କ ହଟ୍ଟଗୋଳ ଯୋଗୁ ଉଭୟ ଲୋକ ସଭା ଓ ରାଜ୍ୟ ସଭାକୁ ପୁଣି ଦିନକ ପାଇଁ ମୁଲତବୀ କରାଯାଇଛି।