ନୂଆଦିଲ୍ଲୀ ,୧୯।୧୨ (ଆଇଏଏନ୍ଏସ୍) : ସାମ୍ପ୍ରତିକ ଭୂରାଜନୈତିକ ସ୍ଥିତିକୁ ନେଇ ଚଳିତ ବର୍ଷ ୫୮ ପ୍ରତିଶତ ଭାରତୀୟ ‘ମେକ୍ ଇନ୍ ଚାଇନା’ ସାମଗ୍ରୀ କିଣା ହ୍ରାସ କରିଛନ୍ତି। ଫେଶନ, ପୋଷାକ, ଯାନ ଉପକରଣ ଏବଂ ଯନ୍ତ୍ରାଂଶ ବର୍ଗରେ ଭାରତୀୟ ବିକଳ୍ପ ଭଲ ଦାମ୍ ଏବଂ ଉତ୍ତମ ମାନରେ ମିଳୁଥିବା ୨୬ ପ୍ରତିଶତ ଭାରତୀୟ କହିଛନ୍ତି। ୫୯ ପ୍ରତିଶତ ଭାରତୀୟ ସେମାନଙ୍କ ମୋବାଇଲ ଫୋନ୍ରେ କୌଣସି ଚାଇନା ଆପ୍ ରଖି ନ ଥିବା ସର୍ଭେରୁ ଜଣାପଡ଼ିଛି। ତେବେ ୨୯ ପ୍ରତିଶତ ସେମାନଙ୍କ ଫୋନ୍ରେ ଗୋଟିଏ କିମ୍ବା ଅଧିକ ଚାଇନା ଆପ୍ ରଖିଥିବା ସ୍ବୀକାର କରିଛନ୍ତି। ସୋସିଆଲ କମ୍ୟୁନିଟି ଏନ୍ଗେଜ୍ମେଣ୍ଟ ପ୍ଲାଟ୍ଫର୍ମ ‘ଲୋକାଲ ସର୍କଲ୍ସ’ ଏହି ତଥ୍ୟ ଦେଇଛି। ମୋଟ ୩୧୯ ଜିଲାର ୪୦ ହଜାରରୁ ଊର୍ଦ୍ଧ୍ୱ ସର୍ଭେରେ ଭାଗ ନେଇଥିଲେ।
ସର୍ଭେ ଅନୁଯାୟୀ ଚାଇନା ସାମଗ୍ରୀ ତୁଳନାରେ ଏହାର ଭାରତୀୟ ବିକଳ୍ପ ମୂଲ୍ୟ ଏବଂ ମାନ ଦୃଷ୍ଟିରୁ ଭଲ ହୋଇଥିବାବେଳେ ଉତ୍ତମ ଗ୍ରାହକ ସେବା ମିଳୁଥିବା ୨୮ ପ୍ରତିଶତ କହିଛନ୍ତି। ୧୧ ପ୍ରତିଶତ ଉତ୍ତମ ମାନର ଭାରତୀୟ ସାମଗ୍ରୀ କିଣିବାକୁ ଚାହୁଁଥିବାବେଳେ ୮ ପ୍ରତିଶତ ବିଦେଶୀ ବିକଳ୍ପ ଚାହିଁଛନ୍ତି। ବଜାର, ଷ୍ଟୋର ଏବଂ ଅନ୍ଲାଇନରେ ମେକ୍ ଇନ୍ ଚାଇନା ସାମଗ୍ରୀ ନ ପାଇ ୮ ପ୍ରତିଶତ ଅନ୍ୟ ଦେଶର ସାମଗ୍ରୀ କିଣିବାକୁ ଆଗ୍ରହ ପ୍ରକାଶ କରୁଥିବା କହିଛନ୍ତି। ଗତ ୧୨ ମାସରେ ଚାଇନାର ବୈଦ୍ୟୁତିକ ଉପକରଣ ସର୍ବାଧିକ ୩୫ ପ୍ରତିଶତ କିଣିଥିବାବେଳେ ୧୪ ପ୍ରତିଶତ କେବଳ ପାର୍ବଣ ଋତୁରେ ବିଦ୍ୟୁତ୍ ଲାଇଟିଂ ଓ ଲ୍ୟାମ୍ପ୍ ଆଦି ସାମଗ୍ରୀ କିଣିଛନ୍ତି। ଚାଇନା ଖେଳନା ଏବଂ ମନୋହରି ସାମଗ୍ରୀ ମାତ୍ର ୫ ପ୍ରତିଶତ କିଣୁଥିବାବେଳେ ୫ ପ୍ରତିଶତ ଚାଇନା ଗିଫ୍ଟ କିଣୁଥିବା କହିଛନ୍ତି। ଚଳିତ ବର୍ଷ ମାତ୍ର ୩ ପ୍ରତିଶତ ଚାଇନା ପ୍ରସ୍ତୁତ ବ୍ୟାଗ, ପୋଷାକ ଓ ଅନ୍ୟାନ୍ୟ ଆନୁଷଙ୍ଗିକ ସାମଗ୍ରୀ କିଣିଛନ୍ତି, ଯାହା ଗତବର୍ଷ ୧୧ ପ୍ରତିଶତ ଥିଲା। ଭାରତ ଓ ଚାଇନା ମଧ୍ୟରେ ବାଣିଜ୍ୟ ନିଅଣ୍ଟ ବଢ଼ୁଥିବାବେଳେ ଏହି ସର୍ଭେ କରାଯାଇଥିଲା। ଚଳିତ ଆର୍ଥତ୍କ ବର୍ଷର ଏପ୍ରିଲରୁ ଅକ୍ଟୋବର ମଧ୍ୟରେ ବାଣିଜି୍ୟକ ନିଅଣ୍ଟ ୫୧.୧ ବିଲିୟନ ଡଲାର ହୋଇଛି, ଯାହା ଗତବର୍ଷ ଏହି ସମୟରେ ୭୩.୩୧ ବିଲିୟନ ଡଲାର ଏବଂ ୨୦୨୦-୨୧ରେ ୪୪.୦୩ ବିଲିୟନ ଡଲାର ଥିଲା।
ସୂଚନାଯୋଗ୍ୟ, ଭାରତ ଓ ଚାଇନା ମଧ୍ୟରେ ସୀମା ବିବାଦ ବଢ଼ିବା ପରେ ଦ୍ୱିପାକ୍ଷିକ ବାଣିଜ୍ୟ ଉପରେ ଏହାର ପ୍ରଭାବ ପଡ଼ିଛି। ୨୦୨୦ ଜୁନ୍ରେ ଦୁଇ ଦେଶର ସେନା ମଧ୍ୟରେ ଗଲଓ୍ବାନ୍ ଉପତ୍ୟକାରେ ରକ୍ତାକ୍ତ ସଂଘର୍ଷ ହୋଇଥିବାବେଳେ ଗତ ୯ ତାରିଖରେ ଅରୁଣାଚଳ ପ୍ରଦେଶ ଅନ୍ତର୍ଗତ ପ୍ରକୃତ ନିୟନ୍ତ୍ରଣ ରେଖାରେ ଦୁଇ ପକ୍ଷର ଯବାନ ମୁହଁାମୁହିଁ ହୋଇଥିଲେ। ଆଗାମୀ ଦିନରେ ଅଧିକ ଭାରତୀୟ ମେକ୍ ଇନ୍ ଚାଇନା ସାମଗ୍ରୀ ବର୍ଜନ କରିପାରନ୍ତି ବୋଲି ସର୍ଭେରେ କୁହାଯାଇଛି।