ମାଲକାନଗିରି,୩ା୭(ଡି.ଏନ୍.ଏ.): ମାଲକାନଗିରି ଜିଲା ଅମଲା ସଂଘ ପକ୍ଷରୁ ଶନିବାର ଜିଲାପାଳ ବିଶାଳ ସିଂଙ୍କ ଜରିଆରେ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ସେମାନଙ୍କୁ କରୋନା ଯୋଦ୍ଧା ଭାବେ ଘୋଷଣା ପାଇଁ ଦାବିପତ୍ର ପ୍ରଦାନ କରାଯାଇଛି। ଜିଲାରେ ଲକ୍ଡାଉନ ଶଟ୍ଡାଉନ ଚାଲିଥିବା ବେଳେ ଅମଲାମାନେ ପ୍ରତ୍ୟକ୍ଷ ଭାବେ ନିଜର ସେବା ନିରନ୍ତର ଯୋଗାଇ ଆସୁଛନ୍ତି। ଅନେକ ଅମଲା ମଧ୍ୟ କରୋନାରେ ଆକ୍ରାନ୍ତ ହୋଇଛନ୍ତି। ବସ୍ ଷ୍ଟାଣ୍ଡ ହେଉ କିମ୍ବା ତନଖି ଫାଟକ ହେଉ ବିଭିନ୍ନ ରାଜ୍ୟ ସୀମାରେ ଏବଂ କଣ୍ଟ୍ରୋଲ ରୁମ୍ରେ ନିରବଚ୍ଛିନ୍ନ ଭାବେ କାର୍ଯ୍ୟ ତୁଲାଇ ଆସୁଛନ୍ତି ବୋଲି ଦାବିପତ୍ରରେ ଉଲ୍ଲେଖ ରହିଛି। ଏହି ଦାବିପତ୍ର ପ୍ରଦାନ ସମୟରେ ସଭାପତି ବସନ୍ତ ପଟ୍ଟନାୟକ, କାର୍ଯ୍ୟକାରୀ ସଭାପତି କୁନା ନାୟକ, ସଦସ୍ୟ ମନୋରଞ୍ଜନ ନାୟକ, ହୃଷୀକେଶ ପଣ୍ଡା, ଜୟଦେବ ଦାସ, ମନୋହର ସୁଗ୍ରି, ଟୁକୁନା ପଢିଆରୀ, କିଶୋର ସୁନାନୀ, ଶ୍ୟାମସୁନ୍ଦର ପଣ୍ଡା, ପ୍ରଶାନ୍ତ କୁମାର ପୃଷ୍ଟି ପ୍ରମୁଖ ଉପସ୍ଥିତ ଥିଲେ।
