ଖୋର୍ଦ୍ଧା ଅଫିସ,୧୫।୧୨: ଶୀତୁଆ ସକାଳେ ଚାହା ଟିକିଏ ମିଳିଗଲେ ମନ ଖୁସି ହୁଏ। ତେଣୁ ରାତି ପାହିଲେ ଲୋକେ ଚା’ ଦୋକାନରେ ଭିଡ଼ ଜମାନ୍ତି। ଖୋର୍ଦ୍ଧା ସହରରେ ଏବେ ମାଟିପାତ୍ର ଚା’ର ଚାହିଦା ବୃଦ୍ଧି ପାଇଛି। ପୁରୁଣା ମେଡିକାଲ ଛକ ପେଟ୍ରୋଲ ପମ୍ପ ନିକଟରେ ରହିଛି କାଳିଚରଣ ଭୂୟାଁଙ୍କ ପାନଦୋକାନ। କାଳିଚରଣଙ୍କ ହାତ ତିଆରି ମାଟିପାତ୍ରରେ ଚା’ ପିଇବା ଲାଗି ସକାଳୁ ବେଶ୍ ଭିଡ଼ ଜମୁଛି। ଗତ କିଛି ବର୍ଷ ହେବ ସେ ଏଠାରେ ଦୋକାନ ଖୋଲିଛନ୍ତି। ଗତ ଦୁଇମାସ ହେଲା ମାଟିପାତ୍ରରେ ଚା’ ବିକିବା ଆରମ୍ଭ କରିଛନ୍ତି। ପ୍ରଥମେ ବେପାର ହେଉ ନ ଥିଲା। ଏବେ କିନ୍ତୁ ଚାହିଦା ବଢ଼ିଛି। କାଳିଚରଣ କହିଛନ୍ତି, କୋଲକାତାରୁ ଏଠାକୁ ଆସିଥିବା ଜଣେ ବ୍ୟବସାୟୀ ପ୍ରଥମେ ମାଟିପାତ୍ରରେ ଚା’ ଦେବାକୁ କହିଥିଲେ। ଏହାପରେ ମୁଁ ମାଟିପାତ୍ରରେ ଚା’ ବିକିବା କଥା ଚିନ୍ତା କରିଥିଲି। ଏଠାରେ ଏଭଳି ବ୍ୟବସାୟ ହେବ କି ନାହିଁ ସେ ନେଇ ଆଶଙ୍କା ରହିଥିଲା। ମାତ୍ର ଧୀରେ ଧୀରେ ଲୋକଙ୍କ ଆଗ୍ରହ ବଢିଲା। କାଗଜକପ୍ ଚା’ର ମୂଲ୍ୟ ୫ଟଙ୍କା ଥିବାବେଳେ ମାଟିପାତ୍ର ଚାହା ୭ଟଙ୍କାରେ ବିକ୍ରି କରୁଛି। ଦୈନିକ ୨ରୁ ୩ଶହ ମାଟିପାତ୍ର ଚା’ ବିକ୍ରି ହେଉଛି। ପୂର୍ବରୁ ଯେଉଁମାନେ କାଗଜକପ୍ରେ ଚା’ ପିଉଥିଲେ ଏବେ ସେମାନେ ମଧ୍ୟ ମାଟିପାତ୍ରରେ ଦେବାକୁ କହୁଛନ୍ତି। ଏପରି କି ମାଟିପାତ୍ରରେ ଚା’ ଧରି ସେଲ୍ଫି ନେବାକୁ କେତେଜଣ ପଛାଉ ନାହାନ୍ତି। ଆଗକୁ ଏହି ବ୍ୟବସାୟକୁ ବ୍ୟାପକ କରିବାର ଯୋଜନା ରଖିଥିବା କାଳିଚରଣ ପ୍ରକାଶ କରିଛନ୍ତି।
