କେନ୍ଦୁଝର,୧୨ା୨(ସ୍ବ.ପ୍ର.): କେନ୍ଦୁଝର ଜିଲା ବାଂଶପାଳ ବ୍ଲକ ଅନ୍ତର୍ଗତ ଶୁଆକାଟିସ୍ଥିତ ଗନ୍ଧମାର୍ଦ୍ଦନ ଖଣିରୁ ଲୁହାପଥର ପରିବହନ ପାଇଁ ଏନ୍ଏଚ୍ ୪୯ ରାସ୍ତା ଟ୍ରକ୍ ଦ୍ୱାରା ଜାମ୍ ଯୋଗୁ ସାଧାରଣ ଯାତାୟାତ ବ୍ୟାହତ ହେଉଛି। ଫଳରେ ଏହି ମୁମ୍ବାଇ-କୋଲକାତା ଜାତୀୟ ରାଜପଥ ବିପଦପୂର୍ଣ୍ଣ ଅବସ୍ଥାରେ ରହିଥିବାବେଳେ ଯାତାୟାତ କରୁଥିବା ଯାତ୍ରୀ/ପର୍ଯ୍ୟନ୍ତ ଜାମ୍ରେ ଫସି ହୀନସ୍ତା ହେବାକୁ ପଡୁଛି। ହଜାର ହଜାର ସଂଖ୍ୟାରେ ଟ୍ରକ୍ ଦୁଇ/ତିନି ଲାଇନ୍ରେ ଏହି ରାସ୍ତାରେ ଦୀର୍ଘ ସମୟ ଧରି ଲୁହାପଥର ଲୋଡିଂ ପାଇଁ ଛିଡ଼ା ହେବାକୁ ପଡୁଛି। ତେବେ ଏହାକୁ ସୁଧାରିବା ପାଇଁ ନା ପୋଲିସ ବିଭାଗ ନା ଖଣି ସଂସ୍ଥା ପଦକ୍ଷେପ ନେଉ ନ ଥିବାରୁ ଅସନ୍ତୋଷ କୁହୁଳୁଛି। ଫଳରେ ଏହି ରାସ୍ତା ଉପରେ ନିର୍ଭରଶୀଳ ଆଖପାଖ ଅଞ୍ଚଳବାସୀ ତଥା ଯାତାୟାତ କରୁଥିବା ଲାଇନ ଟ୍ରକ୍, ଯାତ୍ରୀ ତଥା ପର୍ଯ୍ୟଟକମାନେ ଅକଥନୀୟ ଦୁର୍ଦ୍ଦଶା ଭୋଗୁଛନ୍ତି। ବାରମ୍ବାର ଦୁର୍ଘଟଣା ଘଟି ଧନ ଜୀବନ ହାନି ଘଟିଥିଲେ ହେଁ ନିରାକରଣ କରାଯାଉନାହିଁ। ବିଶେଷକରି ଶୁଆକାଟି ଖଣି ଛକ ଓ ପୁତୁଲୁପାଣି ଖଣି ଛକ ଏହି କାରଣରୁ ବିପଦପୂର୍ଣ୍ଣ ଅବସ୍ଥାରେ ରହିଥିବାବେଳେ ଶୁଆକାଟିରୁ ଅଞ୍ଜର ପର୍ଯ୍ୟନ୍ତ ରାସ୍ତାର ଅବସ୍ଥା ଗୁରୁତର ରହିଛି। ଅନେକ ଗାଡ଼ି ଜାମ୍ ଯୋଗୁ ଭୁଲ ରାସ୍ତାରେ ଯାତାୟାତ କରୁଥିବା ବେଳେ ଭୁଲ ରାସ୍ତାରେ ଗାଡ଼ି ଲମ୍ବା ଧାଡ଼ିରେ ଛିଡ଼ା ହେଉଥିବା ଦେଖିବାକୁ ମିଳୁଛି। ଏଣୁ ଏହି ରାସ୍ତାର ଅନେକ ସ୍ଥାନରେ ହାତୀମାନଙ୍କ ଯାତାୟାତ ପାଇଁ ସୂଚନାଫଳକ ଲାଗିଥିଲେ ଲମ୍ବା ଟ୍ରକ୍ ଲାଇନ ଯୋଗୁ ହାତୀମାନେ ଚଳପ୍ରଚଳ କରିପାରୁ ନ ଥିବାରୁ ପରିବେଶବିତ୍ମାନେ ଅସନ୍ତୋଷ ବ୍ୟକ୍ତ କରିବା ସହ ଫ୍ଲାଏ ଓଭର ନିର୍ମାଣ ଦାବି କରିଛନ୍ତି।