ତାଳଚେର, ୨୧ା୩ (ନି.ପ୍ର,): ତାଳଚେର ଦେଇ ଯାଇଥିବା ଜାତୀୟ ରାଜପଥରୁ ମେସିନ ସାହାଯ୍ୟରେ ଧୂଳି ଉଠାଇବା ଏବଂ ପାଣି ସଞ୍ଚନ କରିବା ଦାବି ନେଇ ସୋମବାର ଉପଜିଲାପାଳଙ୍କ କାର୍ଯ୍ୟାଳୟ ପରିସରସ୍ଥିତ ସଭାଘର ଠାରେ ଆୟୋଜିତ ଜିଲାପାଳଙ୍କ ମିଳିତ ଜନଶୁଣାଣି ଶିବିରରେ ସ୍ମାରକପତ୍ର ପ୍ରଦାନ କରାଯାଇଛି। ଏହି ଶିବିରରେ ଅତିରିକ୍ତ ଜିଲାପାଳ ସନ୍ତୋଷ ପ୍ରଧାନ, ଜିଲା ଆରକ୍ଷୀ ଅଧୀକ୍ଷକ ସୁଧାଂଶୁ ଶେଖର ମିଶ୍ର, ତାଳଚେର ଉପଜିଲାପାଳ ବିଶ୍ୱରଞ୍ଜନ ରଥ ପ୍ରମୁଖ ଉପସ୍ଥିତ ଥିଲେ। ଦାବିପତ୍ରରେ ଉଲ୍ଲେଖ କରାଯାଇଛି, ଜାତୀୟ ରାଜପଥର ବାଙ୍କଧରା ଠାରୁ ଚାଇଁପାଳ ପର୍ଯ୍ୟନ୍ତ ଦୈନନ୍ଦିନ ସହସ୍ରାଧିକ କୋଇଲା ଟ୍ରକ୍ ଯାତାୟାତ କରୁଥିବାରୁ ରାସ୍ତାରେ ମାତ୍ରାଧିକ ଧୂଳି ଜମାହୋଉଛି। ଫଳରେ ଗମନାଗମନ ବେଳେ ଜନସାଧାରଣ ଘୋର ଅସୁବିଧାର ସମ୍ମୁଖୀନ ସହ ଦୁର୍ଘଟଣାମାନ ଘଟୁଛି। ରାଜପଥର ଉଭୟ ପାର୍ଶ୍ୱରେ ସ୍କୁଲ, କଲେଜ ଏବଂ ବିଭିନ୍ନ ଅଫିସ ମଧ୍ୟ ରହିଛି। ପିଲାମାନେ ସ୍କୁଲ ଓ କଲେଜକୁ ଯିବାରେ ଅସୁବିଧାର ସମ୍ମୁଖୀନ ହେଉଛନ୍ତି। ତେଣୁ ରାଜପଥରେ ଯାତାୟାତ କରୁଥିବା କୋଇଲା ବୋଝେଇ ଟ୍ରକ୍ଗୁଡିକ ସର୍ବନିମ୍ନ ୨୦ ସ୍ପିଡ୍୍ରେ ଯାତାୟାତ କରାଯାଉ। ଏହି ଦାବିପତ୍ର ଉପରେ ବିଚାର କରି ଆଗାମୀ ଦିନରେ ସମସ୍ୟା ସମାଧାନ କରାଯିବ ବୋଲି ଅତିରିକ୍ତ ଜିଲାପାଳ ପ୍ରତିଶ୍ରୁତି ଦେଇଥିଲେ। ଏହି ଦାବିପତ୍ର ପ୍ରଦାନ ବେଳେ ଯୁବନେତା ସଂଗ୍ରାମ କେଶରୀ କୁଅଁର, ସାମାଜିକ କର୍ମୀ ଗୋପବନ୍ଧୁ ସାହୁ, ପରିବେଶବିତ୍ ବାଉରୀବନ୍ଧୁ ବେଜ, ଆଇନଜୀବୀ ଜମ୍ବେଶ୍ୱର ପଟ୍ଟନାୟକ, ବିନୋଦ ଲାଲ ପ୍ରମୁଖ ଉପସ୍ଥିତ ଥିଲେ।
