କେନ୍ଦୁଝର,୨ା୧୨(ସ୍ବ.ପ୍ର.): କେନ୍ଦୁଝର ଜିଲାର ଅରାଧ୍ୟ ଶ୍ରୀଶ୍ରୀ ବଳଦେବଜିଉଙ୍କ ଜମିକୁ ଜବରଦଖଲ ଉଚ୍ଛେଦ କରିବାକୁ ଦାବି ହୋଇଛି। ଏ ନେଇ ଗୁରୁବାର ସ୍ଥାନୀୟ ଅଧିବାସୀଙ୍କ ସହ କାଉନ୍ସିଲର ଉପଜିଲାପାଳ ତଥା ଦେବୋତ୍ତର ନିର୍ବାହୀ ଅଧିକାରୀଙ୍କୁ ଦାବିପତ୍ର ପ୍ରଦାନ କରିଛନ୍ତି।
ମନ୍ଦିରଠାରୁ ମାତ୍ର ୫୦୦ ମିଟର ଦୂରରେ ଥିବା ବଳଦେବଜିଉଙ୍କ ରେକର୍ଡ ଭୁକ୍ତ ଧନୁର୍ଯ୍ୟୟପୁର ମୌଜାର ଖତିୟାନ ନଂ. ୧୧୬ ଓ ପ୍ଲଟ ନଂ. ୪୭୩ ଖାସମାହାଲ ଜମି ( ବାଘୁଆବେଡ଼ା)ରେ ଥିବା ୩ ଏକର ୮୦ ଡେସିମିଲ ମଧ୍ୟରୁ ପ୍ରାୟ ଦେଡ଼ ଏକର ଜମିକୁ ୩ ଜଣ ବ୍ୟକ୍ତି ଦଖଲକରି ରଖିଛନ୍ତି। ଜମିରେ ଘର, ବଗିଚା, ପୋଖରୀ, ଗୋଶାଳ, କୁକୁଡ଼ା ଘର ନିର୍ମାଣ କରାଯାଉଥିଲେ ହେଁ ପ୍ରଶାସନ ଚୁପ ରହିଛି। ମନ୍ଦିର ନିକଟରେ ଠାକୁରଙ୍କ ଜମିର ଅବସ୍ଥା ଏଭଳି ହୋଇ ଥିବା ବେଳେ ଜିଲା ବାହାରେ ଠାକୁରଙ୍କ ମୂଲ୍ୟବାନ ଜମିକୁ ଦେବୋତ୍ତର ବିଭାଗ କିପରି ସୁରକ୍ଷା କରୁଛି ବୋଲି ସ୍ଥାନୀୟ ଲୋକେ ପ୍ରଶ୍ନ କରିଛନ୍ତି। ତୁରନ୍ତ ଏ ଦିଗରେ ପଦକ୍ଷେପ ନେବାକୁ କାଉନସିଲର ନିହାର ରଞ୍ଜନ ଦାସ, ସ୍ଥାନୀୟ ବାସିନ୍ଦା ସନତ ସାହୁ, ମୀତା ମହାନ୍ତି, ମୀନା ପଲେଇ, ପଙ୍କଜ ଦ୍ୱିବେଦୀ, ନବକିଶୋର ସାହୁଙ୍କ ସମେତ ବହୁ ବରିଷ୍ଠ ନାଗରିକ ଠାକୁରଙ୍କ ଜମିର ସୁରକ୍ଷା ଦାବି କରିଛନ୍ତି।