ନବରଙ୍ଗପୁର,୨।୯(ବି.ପ୍ର.):ଲୋକେ ଧୀରେ ଧୀରେ ଇକୋ ଫେଣ୍ଡ୍ଲି ହେଲେଣି। ପ୍ଲାଷ୍ଟିକ୍ ଅପେକ୍ଷା ଖଲି, ପତ୍ରଥାଳିକୁ ପସନ୍ଦ କରୁଛନ୍ତି। ଏହାକୁ ନଜରରେ ରଖି ନବରଙ୍ଗପୁର ଜିଲା ପାପଡ଼ାହାଣ୍ଡି ବ୍ଲକ ସେମଳା ଗାଁର ମହିଳାମମାନେ ଜଙ୍ଗଲରୁ ଶିଆଳିପତ୍ର ଆଣି ଖଲି ଓ ପତ୍ରଥାଳି ପ୍ରସ୍ତୁତ କରୁଛନ୍ତି। ଓର୍ମାସ ସେମାନଙ୍କ ପାଇଁ ବଜାର ବ୍ୟବସ୍ଥା କରାଇଛି। ମହିଳାମାନଙ୍କଠାରୁ ଖଲି ପ୍ଲେଟ୍ ନେଇ ସୁଦୂର ହାଇଦ୍ରାବାଦରେ ବିକ୍ରି କରାଯାଉଛି। ସେଠାରେ ଏହି ଖଲି ପ୍ଲେଟ୍ର ଚାହିଦା ବେଶ୍ ରହିଛି। ଗାଁର ମହିଳାମାନେ ମାତୃକୃପା ନାମରେ ଏକ ସ୍ବୟଂ ସହାୟକ ଗୋଷ୍ଠୀ ଗଠନ କରି ଏହି କାର୍ଯ୍ୟ କରୁଛନ୍ତି। ସେମାନଙ୍କ ସଫଳତା ବିଷୟରେ ଜାଣି ମାଲକାନଗିରି ଜିଲା ମୁଦୁଲିପଡ଼ା ଗାଁର ବଣ୍ଡା ସମ୍ପ୍ରଦାୟ ମହିଳାମାନେ ସେମଳା ଗାଁକୁ ଆସି ଖଲି କିଭଳି ପ୍ରସ୍ତୁତ ହେଉଛି ଓ ଏହାର ବଜାର ବ୍ୟବସ୍ଥା କିଭଳି ରହିଛି ତାହା ଦେଖି ଫେରିଛନ୍ତି।
ବର୍ତ୍ତମାନ ପଲିଥିନ ବ୍ୟବହାର ଓ ବିକ୍ରି ବେଆଇନ ହେବାରେ ଲାଗିଛି । ପତ୍ରରେ ତିଆରି ଖଲି, ଦନା ଆଦିର ଚାହିଦା ବଢିଛି। ତେଣୁ ମାତୃକୃପା ଏସ୍ଏଚ୍ଜି ମହିଳାମାନେ ଜଙ୍ଗଲରୁ ଶିଆଳିପତ୍ର ସଂଗ୍ରହକରି ସେଥିରୁ ଖଲି ପ୍ରସ୍ତୁତ କରୁଛନ୍ତି। କିସ୍ ପକ୍ଷରୁ ୫୦ଟି ସିଲେଇ ମେଶିନ ଓ ଗୋଟିଏ ପ୍ରେସ୍(ବୋଫେଟ୍) ମେଶିନ ଯୋଗାଇ ଦିଆଯାଇଛି। ଓର୍ମାସ ପକ୍ଷରୁ ବଜାର ବ୍ୟବସ୍ଥା ସହ ନୂଆ ଢାଞ୍ଚାରେ ଖଲି ପ୍ରସ୍ତୁତ ତାଲିମ ଦିଆଯାଇଛି। ବଜାରକୁ ଆଧାରକରି ଦର ନିର୍ଦ୍ଧାରଣରେ ଓର୍ମାସ ସହଯୋଗ କରୁଛି। ଏହାଛଡ଼ା ହାଇଦ୍ରାବାଦରେ ବଜାର ବ୍ୟବସ୍ଥା କରାଇଛି ଓର୍ମାସ। ସଚିନ୍ଦର ଏଣ୍ଟରପ୍ରାଇଜେସ ପ୍ରତି ମାସରେ ୧୨ରୁ ୧୫ହଜାର ଖଲି ସେମଳା ମାତୃ ଶକ୍ତି ଏସ୍ଏଚ୍ଜିଠାରୁ ନେଉଛି । ନବରଙ୍ଗପୁରରୁ ହାଇଦ୍ରାବାଦ ସିଧାସଳଖ ବସ୍ ସୁବିଧା ରହିଥିବାରୁ ପରିବହନ ସୁବିଧା ମଧ୍ୟ ହେଉଛି ବୋଲି ନବରଙ୍ଗପୁର ଓର୍ମାସର ଉପ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଏ. ଉମା ମହେଶ ଜଣାଇଛନ୍ତି। ପ୍ରତି ସଭ୍ୟା ମାସିକ ୪୦୦୦ ଖଲି ପ୍ରସ୍ତୁତ କରୁଛନ୍ତି। ଏ ବାବଦକୁ ସେମାନେ ମାସିକ ୩୫୦୦ ଟଙ୍କା ରୋଜଗାର କରିପାରୁଛନ୍ତି। ଭବିଷ୍ୟତ ଉତ୍ପାଦନ ପାଇଁ ପ୍ରତ୍ୟେକ ମହିଳା ଜମାନିଧି ପାଣ୍ଠି ବାବଦକୁ ପ୍ରତି ମାସରେ ୨୦୦ ଟଙ୍କା ବ୍ୟାଙ୍କଖାତାରେ ଜମା କରୁଛନ୍ତି। ପ୍ରତି ଖଲି ଏକ ଟଙ୍କାରେ ବିକ୍ରି ହେଉଛି। ପ୍ରତି ବିଡାରେ ୧୦୦ ଖଲି ରହୁଛି। ୪୫ ମହିଳାଙ୍କୁ ନେଇ ଉତ୍ପାଦନ ଗ୍ରୁପ୍ ଗଠନ କରାଯାଇଛି । ମାସିକ ୨୦ଦିନ ମହିଳାମାନେ ଖଲି ପ୍ରସ୍ତୁତ କାମ କରୁଛନ୍ତି। ଅନ୍ୟ ଦିନଗୁଡ଼ିକରେ ପତ୍ର ସଂଗ୍ରହ କରିବାକୁ ନିକଟ ଜଙ୍ଗଲକୁ ଯାଉଛନ୍ତି। ହାଇଦ୍ରାବାଦକୁ ଖଲି ପଠାଯାଉଛି ଓ ସ୍ଥାୟୀ ବଜାରରେ ମଧ୍ୟ ବିକ୍ରି କରାଯାଉଛି ବୋଲି ଏସ୍ଏଚ୍ଜି ସମ୍ପାଦିକା ଚଞ୍ଚଳା ମାଝି କହିଛନ୍ତି। ଏସ୍ଏଚ୍ଜି ମହିଳାମାନେ କିଭଳି ସମୟ ଦେଇ ରୋଜଗାରକୁ ବଢ଼ାଇବେ ସେଥିପ୍ରତି କାମ କରାଯାଉଛି ବୋଲି ଜୀବିକା ପ୍ରୋତ୍ସାହନ କର୍ମୀ ଚିତ୍ରସେନ ମାଝି କହିଛନ୍ତି।