କେନ୍ଦୁଝର,୭ା୧୧(ସ୍ବ.ପ୍ର.): ବାଂଶପାଳ ବ୍ଲକ ଟଣ ପଞ୍ଚାୟତର ବେଣିଡିହି ଗ୍ରାମରେ ପଥର କ୍ୱାରୀ ଲିଜ୍ ଓ କ୍ରସର ବସାଇବାକୁ ଆଦିବାସୀମାନେ ବିରୋଧ କରି ସୋମବାର ଜିଲାପାଳ ଆଶିଷ ଠାକରେଙ୍କୁ ଲିଖିତ ଅଭିଯୋଗପତ୍ର ପ୍ରଦାନ କରିଛନ୍ତି। ଉକ୍ତ ଗ୍ରାମରେ ୩୭୫ ଆଦିବାସୀ ପରିବାର ବସବାସ କରୁଛନ୍ତି। ୨୦୧୬-୧୭ରେ ଏଠାରେ ପଥର ଖଣି ଲିଜ୍ ଓ କ୍ରସର ଅନୁମତି ଦିଆଯାଇଥିଲା। ଫଳରେ ସେଠାରେ କାମ କରୁଥିବା ଲୋକମାନେ ବିଭିନ୍ନ ପ୍ରକାର ଅନୀତିକର କାର୍ଯ୍ୟ କରିବା ସହ ଗ୍ରାମର ଯୁବତୀମାନଙ୍କ ସହିତ ଅନ୍ୟାୟ ଅତ୍ୟାଚାର କରିଥିଲେ। ଏପରିକି ଜଣେ ପିଲାର ମୃତ୍ୟୁ ହୋଇଥିଲା ବୋଲି ଅଭିଯୋଗ କରିଛନ୍ତି।
ସେହିପରି ଖଣି ଓ କ୍ରସର ଦ୍ୱାରା ଜଙ୍ଗଲ ଓ ପରିବେଶ ନଷ୍ଟ ହେବା ସହ ଆଦିବାସୀଙ୍କ ଜଙ୍ଗଲ ଅର୍ଥନୀତି କ୍ଷତିଗ୍ରସ୍ତ ହେଉଛି। ଏଣୁ ଗ୍ରାମ ନିକଟରେ କୌଣସି ଖଣି ଲିଜ୍ କିମ୍ବା କ୍ରସର ଅନୁମତି ଦିଆଯାଉନାହିଁ ବୋଲି ଦୀର୍ଘ ପ୍ରାୟ ୮୦କିମି ଦୂରରୁ ମହିଳା ଓ ପୁରୁଷମାନେ ଆସି ଜିଲାପାଳଙ୍କ ଅଭିଯୋଗ ପ୍ରକୋଷ୍ଠରେ ଜଣାଇଛନ୍ତି। ଟଣ ପଞ୍ଚାୟତ ସରପଞ୍ଚଙ୍କ ସମେତ ବହୁ ଲୋକ ଦସ୍ତଖତ କରି ଜିଲାପାଳଙ୍କୁ ଦାବିପତ୍ର ଦେଇଛନ୍ତି।
ପ୍ରକାଶ ଯେ, ଆଦିବାସୀ ଅଧ୍ୟୁଷିତ ବାଂଶପାଳ ବ୍ଲକ ଟଣ ପଞ୍ଚାୟତର କାକଡ଼ଇମ୍ଭା, ଟୁଙ୍ଗୁରୁବାହାଳ, ରୁଗୁଡିହି, ଜନସନପୁର, ଜଟା ଆଦି ଗ୍ରାମର ଆଦିବାସୀମାନେ ବିଶେଷ କରି ଜଙ୍ଗଲପାହାଡ଼ ଉପରେ ନିର୍ଭର କରି ଚଳୁଛନ୍ତି। ଜଙ୍ଗଲରୁ କାଠପତ୍ର, ଚେରମୂଳି ଔଷଧ, କେନ୍ଦୁପତ୍ର, ମହୁଲ, ଶାଗ, ଆଳୁ ଆଦି ବିଭିନ୍ନ ପ୍ରକାରର ଫଳମୂଳ ସଂଗ୍ରହ କରି ସେସବୁ ବଜାରରେ ବିକି ପରିବାର ଗୁଜୁରାଣ ମେଣ୍ଟାଇ ଆସୁଛନ୍ତି। ସେହିପରି ଗୋରୁଗାଈ, ଛେଳି, ମଇଁଷି ଆଦି ଜଙ୍ଗଲରେ ଚରାବୁଲା କରିଥାନ୍ତି। ଏଣୁ ଉକ୍ତ ଅଞ୍ଚଳରେ ପଥର ଖଣି ଲିଜ୍ ଓ କ୍ରସର ପ୍ରତିଷ୍ଠା କରାଗଲେ ସେମାନଙ୍କ ଜୀବନଜୀବିକା କ୍ଷତିଗ୍ରସ୍ତ ହେବା ସହ ଗୃହପାଳିତ ପଶୁ , ବନ୍ୟଜନ୍ତୁ ଆଦି କ୍ଷତିଗ୍ରସ୍ତ ହେବେ ବୋଲି କହିଛନ୍ତି।