ଢେଙ୍କିକୋଟ,୩ା୧(ଡି.ଏନ୍.ଏ): କେନ୍ଦୁଝର ଜିଲା ଘଟଗାଁ ଥାନା ଅଧୀନସ୍ଥ ଢେଙ୍କିକୋଟ ପୋଲିସ ବିଟ୍ ହାଉସକୁ ୪୦ ବର୍ଷ ପୁରିଲା। ମାଓବାଦୀ ଚଳପ୍ରଚଳକୁ ନଜରରେ ରଖି ଘଟଗାଁ ଥାନା ଅଧୀନରେ ବିଟ୍ ହାଉସ ପ୍ରତିଷ୍ଠା ହୋଇଥିଲା। ବର୍ତ୍ତମାନ ମାଓବାଦୀଙ୍କ ଚଳପ୍ରଚଳ କମିଥିଲେ ମଧ୍ୟ ଚୋରି, ଡକାୟତି ବୃଦ୍ଧି ପାଇଛି। ଜନ ସଂଖ୍ୟା ବୃଦ୍ଧି କାରଣରୁ ଆଇନଶୃଙ୍ଖଳା ବିଗୁଡୁଛି। ଏହାକୁ ଦୃଷ୍ଟିରେ ରଖି ବିଟ୍ ହାଉସକୁ ଥାନା ମାନ୍ୟତା ପ୍ରଦାନ କରିବାକୁ ଢେଙ୍କିକୋଟ୍ ବିକାଶ ମଞ୍ଚ ପକ୍ଷରୁ ସଭାପତି ଯୁଗୋଳ କିଶୋର ଦାସ ଦାବି କରିଆସୁଛନ୍ତି।
ଢେଙ୍କିକୋଟ୍ କେନ୍ଦୁଝର ଜିଲାର ମଧ୍ୟମସ୍ଥଳ ଏବଂ ଜାତୀୟ ରାଜପଥ ୨୦ ନଂ. ଓ ଜାତୀୟ ରାଜପଥ ୨୨୦ ନଂ.ର ମିଳନସ୍ଥଳ। ଏଠାରେ ବ୍ୟବସାୟିକ ବଜାର, ସ୍କୁଲ, କଲେଜ, ପ୍ରଥମିକ ସ୍ବାସ୍ଥ୍ୟକେନ୍ଦ୍ର, ପଶୁ ଡାକ୍ତରଖାନା, ପୋଷ୍ଟ ଅଫିସ, ଅନେକ ବ୍ୟାଙ୍କ, ଆଦି ରହିଛି। ବଜାର ଉପରେ ଘଟଗାଁ ବ୍ଲକ୍ର ୨୭ ପଞ୍ଚାୟତରୁ ୧୫, ପାଟଣା ବ୍ଲକ୍ର ୫ ପଞ୍ଚାୟତର ଜନ ସାଧାରଣ ନିର୍ଭର କରିଥାନ୍ତି। ପୋଲିସ ବିଟ୍ ହାଉସ ଅଧୀନରେ ୨୭ ଟି ଗ୍ରାମ ରହିଥିବା ବେଳେ ପ୍ରାୟ ଗ୍ରାମର ଦୂରତା ବିଟ୍ ହାଉସଠାରୁ ୨୫ ରୁ ୩୦ କି.ମି. ରହିଛି। ଜଣେ ମାତ୍ର ସବ୍ ଇନ୍ସପେକ୍ଟର, ୩ ଜଣ ମହିଳା ଏବଂ ୩ ଜଣ ପୁରୁଷ କନଷ୍ଟେବଳ ଥିବାରୁ ଅଭିଯୁକ୍ତଙ୍କୁ ଧରିବାରେ ବିଫଳ ହେଉଛନ୍ତି। ଅନ୍ୟପକ୍ଷେ ବିଟ୍ ହାଉସର ନିଜସ୍ବ ଘର ନ ଥିବାରୁ ଭଡ଼ାଘରେ ଚାଲୁଛି। ନିଜସ୍ବ ଘର ଓ ଥାନା ମାନ୍ୟତା ଦାବିରେ ବିକାଶ ମଞ୍ଚ ପକ୍ଷରୁ ବହୁବାର ଜିଲାପାଳ ଓ ଏସପିଙ୍କୁ ଦାବିପତ୍ର ଦିଆଯାଇଛି। ଏପର୍ଯ୍ୟନ୍ତ ଥାନା ମାନ୍ୟତା ମିଳି ପାରି ନ ଥିବା ବେଳେ କିଛି ଦିନ ହେବ ଘରନିର୍ମାଣ ପାଇଁ ଜମି ଚିହ୍ନଟ ପ୍ରକ୍ରିୟା ଶେଷ ହୋଇଥିବା କୁହାଯାଉଛି। ଅଞ୍ଚଳର ଜନସଂଖ୍ୟାକୁ ଦୃଷ୍ଟିରେ ରଖି ତୁରନ୍ତ ଥାନା ପ୍ରତିଷ୍ଠା ପାଇଁ ଦାବି ହେଉଛି।